" וַיֹּאמֶר משֶׁה אֶל בְּנֵי יִשְׂרָאֵל רְאוּ קָרָא יְהֹוָה בְּשֵׁם בְּצַלְאֵל בֶּן אוּרִי בֶן חוּר לְמַטֵּה יְהוּדָה""Moshe'n Israel chate jah'ah asei'e: Veu'vin, P-thien in Yehuda phung akuon Hur chapa Uri chapa Betzal'el chu amin in akoutai.." (Shemot 35:30)
Moshe'n Israel chate akou khawm'a, Mishkan sahna ding toh kisai'a avel'a athuhil kit na'ah mijouse hetding in Mishkan kisahna'a khutthep thil kibol jouse leh natoh jouse vetup ding Betzalel ahidan aphongdoh'e. Hinla hiche thudol'a lungdon umtah chu ahileh E atileh Moshe'n hiche thuhi mipi hetding'a aphondoh ngai khel khel ahidem? Gahsei ding'a tulai khang toh kitoh in kisei taleh Hou inn ham ahilouleh Community Hall ham khat akisah tieng hiche naa kitong ho chung'a lamkai ahilouleh a vetup'a pangpa chu mijouse hetding'a phondoh ngaise lou ah ahi'e.
Midrash'a kisei dan in P-thien in Mishkan sahding'a Moshe thu apeh chun ajah'ah "Hiche Mishkan kisahna leh asung'a thil um ding ho kisep na chunga lamkai ding in Betzal'el kalheng doh'e. Pha nasah hinam?" tin adong'e. Hat chungnung P-thien, vaan leh leiset chuleh asung'a um thil jouse siempa amatah in Moshe, phe le vou mai mai, angaidan ahin doh chu Moshe'n adonbut didan ahevah pon, P-thien jah'ah "Vaan leh Lesiet jouse siempa, nangma'n lhing nasah'a nalhen doh ahileh keima lunggel ajong lhing ahi jieng'e" atiy. Hichun P-thien in Moshe jah'a Israel mipi ho jong aga doh ding in ahil'e.
Moshe'n Israel mipi ho akokhawm'a ajah uva thu um dan asei'a, alunggel uh adoh phat chun mipi hon jong "P-thien in alhing'e tia alhendoh'a, nang in jong alhing'e nati leh kinielna bei hiel'a keiho mitmu leh lunggel ajong lhing'ah ahitai" ati'uve. Hitia chu Betzal'el chu P-thien leh Moshe chuleh Israel mipi ho jouse'n ana lhendoh uh ahi tin Khakhamim hon asei uve.
Epi ding'a Betzal'el pa min leh pu min chu Moshe'n mipi ho heng'a asei khel khel ahidem? Rashi'n aseina'ah ajihchu Betzal'el pu Hur chu Moshe sopinu Naomi chapa hi'a. Ejo khat leh miho'n asopinu tu-sawn (great grandson) ahijih'a Moshe'n ama thutah'a akilhen doh hinte tia agel lou nading uva ahi.
Chuleh Hur kitipa hi koi hija ham? Moshe Sinai muol'a akal doh'a ni 40 leh jaan 40 aga vaitham kah'a Israel chate hon Bongnou lim siemthu ana hou uva chu Hur kitipa hi mipi ho'n ana tha uvah ahi. Israel chate hon P-thien lim siemthu hou ding agot uva, Hur heng'a ahung sei uchun amapa'n mipi ho ana phohsal in, athilphalou bolgot uchu ana daal go'n ahi. Hitichun Mipi hoto chun akiboi in, mipi lung sousang hochun Hur chu ana thalo taove. Hitia P-thien min suhthieng nading'a Hur kipehdoh jou jaal ajong chu atupa Betzal'el P-thien in Mishkan sa ding'a alhen doh ahi.
Chuleh hiche Mishkan kisahna ding'a Betzal'el tilou'a P-thien in alhedon khat kit chu Dan phung akuon mi Ohaliab ahi'e. Betzal'el toh Ohaliab kilhendoh na chung chang'ah Khakhamim hon hitin asei uve: Phung 12 lah'a alenpen khat Yehuda akuon Betzal'el leh phung 12 lah'a aneopen loi'a kisei Dan akoun Ohaliab teni kilhendoh hin eihil nuom uh um ah ahie. Hichu epi ham eti leh Mishkan sah ding ham ahilouleh P-thien kin/Mitzvah bol ding ham ahitieng alien aneo, ahou avai ti'a kikhen na aumpon, mi jouse akibang soh kei'e ti hi ahi.
Shabbat Shalom Lekulam
