Rabbi Yitzchak Meir Alter, Khidushei Harim tia jong kihepa'n, hitin asei'e: Ajihchu Parashat Ki Tissa ahi Khet Ha'Egel (Sin of the Golden Calf) thu kisei'a, chuleh hiche Khet Ha'Egel ahi Levi phungmi tilou Israel jouse ana chonse uvah ahi. Parashat Ki Tissa sung'a Khet Ha'Egel chungchang kijih nachan, tichu a pasuk 91 nachan chu Kohen holeh Levi ho'n, apu apa teu hiche chonsetna'a ana jaolou jih uva asim uvah ahi. Kohen leh Levi hilou Israel mi maimai khat in sim taleh "Ngai uvin, kapu kapa te'n etobang jachat um chonsetna ana bol uvam, tua hi ken kahin simdoh ding ahi.." ati tobang hiding, jachat umtah thil hithei ahibou'e.
Hiche Khet Ha'Egel hi Torah sung'a thu kisei lah'a pohnat umtah loi khat ahi. Chuleh lungdon umtah chu epi ham eti leh Aharon heng'a mipi ho ahung uva, "Moshe khel ding nei siempeh uvin.." tia ahung sei uva chu ama'n mipi ho phosal tah sang'a athu uh ana nun chu ahi. Hiche sang'a lungdon umcheh kit chu epi ham eti leh hiche bongnou lim asiem nung jieng ajong P-thien in Aharon, Kohen Gadol ding'a alhendoh'a, ama leh asuon chilhah hobou Kohen hina chanvou kipeh kit chu ahi'e.
Khakhamim ho seidan leh Midrash'a kimu dan in Aharon heng'a ahung masang uchun Israel mipi hochu Hur jah'ah ahung uve. Amaho'n Hur heng'ah "P-thien ding neisem peh uvin.." tia ahung sei uva ahileh Hur chun mipi ho ana phohsal in. Avodah Zarah kiti chu P-thien mitmu'a thilphalou tah leh thet umtah ahi tia asei'a, mipi ho thilgon ana noppeh louphat chun amahon Hur chu ana thalo tauve.
Aharon jong chu Hur bang'a P-thien ading'a pangdet'a, mipi hochu ana phosal joh'a hilou ham? Lamkai khat hina'a Hur bang achu P-thien min suhthieng nading'a a hinkho ana phaldoh jieng'a phajo lou ham? E atile hiche bongnou lim asiem nung jieng ajong Aharon chu Kohen Gadol panmun chang thei nalai ahidem?
Khakhamim hon asei na uvah eti dan'a Aharon chu bongnou lim asep nung jieng ajong Kohen Gadol hithei nalai ham ti ahipon, Aharon chun Bongnou lim ana sep jih jaal'a Kohen Gadol panmun joh chang'ah ahi.
Eti dan'a Aharon chu hiche Bongnou lim asep jal'a Kohen gadol panmun kipe ahi kiti thei ham leh? Egel leh ahet hahsai hinla ahetthiem nading in Zechariah ben Yehoyada thusim veu hite. Yehuda lenggam'a lengvai anapo, Yehoash kitipa lal laiya Kohen Gadol ana hi chu Zechariah pa Yehoyada anahiy. Phat ahung chien, Yehoyada athi tan, hichun aman khel in achapa Zechariah in Kohen Gadol panmun ahin tuhtai. Zechariah kitipa hi Kohen Gadol bep hilou'a thiemgao jong anahi'e.
Yehoash lengpa hi ahikit le aneo laiya ama don'a ana pangnu (Yehoyada jinu Yehosheva) in, David innsung mite Atalya kitinu'n thabei ding ana got pet achu, Beith Ha'Mikdash sung'a Kodesh ha'Kodashim munna kum 6 sung ving veng ana sel ahi'e. Hitichun Yehoyada thiempu pa athi chun Yehuda gam'a lengpa semang pachong ho ahung uvin Yehoash masang'ah ahung boh khup taove.
Divrei Ha'Yamim(Chronicles) ah hitin aki jih'e: "Yehoyada thi thi'n Yehuda gamsung'a lamkai ho lengpa masang'ah ahung uvin amai ah ahung bohkhup taove, hichun lengpa'n jong amaho thusei angaipeh tai" (Divrei ha'Yamim II 24:17). Radak in hiche pasuk Khakhamim ho thusei pansan'a ahilchetna'ah hitin asei'e: HicheYehuda gam lamkai hohin Yehoash jah'a hitin ahung sei uve " Koi hile Kohen hilou'a Kodesh Ha'Kodashim sung'a lut taphot thiding ahi akitin, E atile nang kum 6 tah ema tilou hiel'a naum thei ham?". Yehoash lengpa'n jong adonbut didan ahetlou phat in amaho'n "Khuti ahileh nang ma hi P-thien nahi bou'e. Nangma phatsah ahile keihon nang nahou tau ving kate." tin asei tauve. Hiche Yehuda gam lamkai ho thusei chu Yehoash lengpa'n joh angaipeh/apompeh tan, hiti chun ama hojong lengpa mai achun aboh khup uvin lengpa chu P-thien dan in ahou taovin ahi.
Hiche tobang thet umtah thil kibol jih chun Zechariah in Yehoash chu aphohsal tan ahileh mipi hon amapa chu Beith Ha'Mikdash'a maicham thil kitodoh jiy namun achun suong in asep lih tauve. Hiche Zechariah kitha nikho chu Shabbat ni, Yom Kippur toh kitoh kit nalai ahi'e.
Hitia Kohen Gadol chuleh thiemgao jong hi Zechariah kitha chu khonung'a gotna etobang lhung tam?
Gemara ah hitin akijih'e: Nebuchadnezzar sepai lamkai apang Nebuzaradan kitipan Jerusalem asuhset got'a Beit ha'Mikdash mun ahin phah chun maicham thilto kito namun'ah thiisan sou (boiling blood) khat amui. Aman "Hiche thii hi epi thii ham?" tia adoh leh Thiempu hochun "Kilhaina gancha kithat ho thisan ahi" atiuve. Hinla Nebuzaradan in tahsan joulou in "Nakilhai na jiy uva naman uh gancha hochu hinchoi uvin.." tin aban aban in gancha hochu athat in, athiisan uh avet kah leh akibang tapoi.
Hichun Nebuzaradan jong alung ahang in "Thutah neisei peh uvin..hiche thiisan hi epi thisan ham?" atileh achai chaina'n Thiempu hon jong amapa jah'ah "Masang'a Kohen Gadol leh Thiemgao ana hi Zechariah kitha nanunga athiisan kiveiden, amangthei talou chu ahi.." ati tauve. Hiche Zechariah kitha pet'a athisan ana luongdoh ho chu umden'a, etobang'a suhthieng ding agot vang uva mangthei lou'a twi sou bang'a souden ahitai.
Nebuzaradan in jong Zechariah lhagao kipana ding atin Thiempu ho jouse athat in, Lamkai ho jouse athat in, Nungah Gollhang ho akai khawm in athat in, Chapang sen lai kisan hojong athat in...hitichun mi 940,000 lang atha gei in jong Zechariah thiisan chu asou jing nalai in,amang deh tapoi. Chuphat chun Nebuzaradan in "Zechariah...Zechariah....Mi jouse kathabei tokah se'a nalung lhai lou ding hitam?" tia asei leh thiiisan chu ahungthip in, amang thei pan bep in ahi.
Hiche akuon achu epi kijil doh thei am? Kohen Gadol leh thiemgao kitha'a, thiisan kiso akoun P-thien in etobang'a nasa leh gimnei'a thu atan aham tichu akimudoh thei'e. Khuti ahileh Hur bol bang in Aharon jong chun mipi hochu ana phohsal taleh, Hur tuo mabang atuo ding, mipi hochun ama jong athalo ding uh ahi. Aharon chun P-thien min suhthieng nading'a ahinkho aphal tah jih achu Olam Haba lut tei ding ahi. Hinla Israel chate chula epi ati tadiu vem? Hiche leiset hihen ahung lhung ding leiset hita jong leh achanmun jouse kilahpeh ding uvah ahitai.
Hiche thu hi Aharon in gao'a amu'a ahet kiu ahi'e. Aman hitin agel tai "Israel ten kei eithat taleu, Olam Haba'a achanmun ding uh umtalou ding...hiche sang chun Avoda Zarah hita jong leh milim septhu joh houmai tau hen. Milim semthu houjih achu P-thien akuon ngaidam akithum uva leh chang kit thei uh ahin, hinla Kohen Gadol leh Thiemgao khat atha khah uva ahileh amasang uh kichai ah ahitai. Kei kahileh amaho sochat nading ahipou leh hiche leiset hihen ahung lhung ding leiset hita jong leh kachanmun ding jouse ei ki lahpeh ding chu khoh kasapoi..".
Hitia chu Aharon in thilsao tah gelpum'a athilbol hochu, Avodah Zarah hijieng tajong leh, anabol ahi'e. Lamkai ahina chingthei tah'a amanchah'a, ama manthah ding jong khohsa lou hiel'a amite ding gelna'a ana kipehdoh jih jal achu Aharon chu Kohen Gadol hina panmun kipe'a, chutah jongle ama suon leh chilhah hochu Kohen hina kipe uva ahi. Aharon chu Bongnou lim siem jieng tajong leh ti hilou'a hiche Bongnou lim asep najih jaal'a panmun poimotah, Kohen Gadol hina chu kipe ah ahitai.
Shabbat Shalom Lekulam
(Tu Shabbat Parasha hilchetna hi HaRav Shlomo Levenstein kitipa Drasha pehna akuon hung kiladoh ahi.)
