Aharon chapa teni thi'na chungchang thudol'ah Torah in tuchung Parasha'ah hitin asei'e:
"וַיִּקְחוּ בְנֵי אַהֲרֹן נָדָב וַאֲבִיהוּא אִישׁ מַחְתָּתוֹ...וַיַּקְרִיבוּ לִפְנֵי יְהֹוָה אֵשׁ זָרָה......וַיָּמֻתוּ לִפְנֵי יְהֹוָה "
"Aharon chapa teni, Nadav leh Avihu'n ameilheng lhon akichoi lhon'n......Pakai mai'ah mei jaatchuom(ivrit'a Esh Zara) ahin tohdoh lhon'e.....Pakai angsung'a athi lhontai". (Vayikra 10:1-2)
Hiche Nadav leh Avihu thina chung ahin Khakhamim hon ajih tampi tah apeu've. Khenkhat in Aharon chapa teni thilo najih chu amani sang'a chungnungjo/lienjo (Moshe Rabbeinu kiseina) masang'a acham cham'a achaloh lhon'a, amani deidan tah'a Halakha a posek jih lhon ahi atiuve. Hiche akuon ahi Khakhamim ho'n e Rav Pa um namun'a, ama donglou'a, a-masang'a eiman Halakha edei dan tah'a ki posek hi asur ahidan ahin lahdoh uvah ahi'e.
Khenkhat in ahi kitle Aharon chapa teni chu Ju khamsa'a munthieng sung'a agalut lhon jih'a P-thien akuon hung koulha mei chun agovaam lhon'a thilhon ah ahi atiuve. Hichu hoi akon kihethei am eti leh hiche Aharon chapa teni thi jou chun P-thien in Aharon jah'ah ama hihen achapate ahing lai ho hitale "Ju khamsa'a kihouna Inn sung'a nahun lut thei lou diu ahi; achutile nathi lo diu ahi" (Vayikra 10:9) tin giihna abol'e.
Ngaidan dangkhat chu ahikitleh Aharon chapa teni'n thiempu ho kivonna ding doltah'a kivon lou'a pumgaw thilto toh ding'a munthieng thou sung'a alut lhon jih'a thilo lhon ah ahi ti ahie. Hitichun Mefarshim ho'n Nadav leh Avihu thina chung chang ahin ngaidan tampi tah ape uve. Amani chonsetna leh athi lhon na jih dihtah chu hiche hi ahi tia seithei chet ema aumpoi. Hinla hiche ho akon hetdoh thei chu ahile Torah sung'a kisei bang'a "mei jaatchoum(Esh Zara) ahin todoh" lhon jih vang'a thilon ah ahipoi.
Ahileh eti dan'a Mefarshim ho khuti lungdon uva, Aharon chapa teni thina chungchang ahi ngaidan tamtah leh athina lhon jih jat chuom chuom asei uh ahidem? Nadav leh Avihu teni hi etobang mi hilhon aham? Mi phalou le mi chonse tah khattou hihon aham?
Aharon chapa teni mihina leh etobang mi hilhon ham ti hetdoh nading in E Parasha uva kon pasuk, anoi'a kipe hi veu hite. Chuleh hiche Pasuk hi Nadav leh Avihu thi kisei jou jou'a kisuh ahin, Moshe Rabbeinu'n asopipa Aharon alhamonna thu ahi:
"Chuin Moshe'n Aharon jah'ah hitin asei'e: Hiche thudol ahin P-thien in hitin asei'e 'Kakawm naiya umte jaal'a athieng'a kakilah'a, japi mitmu'a vahchoi'a kaum ding ahi' tia P-thien in asei chu hiche ahi". (Vayikra 10:3)
Eti dan'a Moshe Rabbeinu in asopipa Aharon, hiche achung'a kisun pasuk ahi achapa teni thina chung'a alhamon thei ahidem? Midrash Rabbah in hitin asei'e: P-thien in hiche thudol ahi Moshe ana houpi'a, aheng'a ana seisa ahitai. Hinla Mishkan kithienso nitieng lechun koipen chu P-thien loupina kilahna ding'a P-thien in akilah ding ham tivang asei pehpoi. Hitichun Moshe lunggel'ah ama ahi lou leh asopipa Aharon khat joh joh vang hitei hon ding ahi tin ana gel'e. Moshe'n asopipa Aharon jah'ah, "Mishkan kithienso nading'a P-thien in ama ding'a adeilhenpen mi akilah ding ahi ti kanahe'n. Kei kahilou leh nang khat joh joh ehi teiding in kana koi'e. Hinla tun vang kahetai Nadav leh Avihu hi eini sang in athupi jo lhon'e" tia asei ahi.
Khakhamim hon hitin asei uve: Khuti ahileh Nadav leh Avihu teni hi mi maimai hilou'a, Tzaddikim Gedolim ahilhon'e ti akimudoh thei'e. Hiche bep hilou'a Moshe Rabbeinu leh Aharon sang'a jong thupi jo nalai hon ah ahi. P-thien in mihem jouse hi ama mihina dung jui cheh'a thu atan khum ahi- Tzaddik hochu neokhat abol khel jongle gotna sangtah tah kipe uvah ahi'e. Hiche bang achu amani lhagao lang'a ami hina lhon asan vaal tah jih achu midang ding'a chonsietna hilou jong chu amani adinga chonsietna'a kisiem peh ahitai. Hiche jih pentah ahi Mefarshim hon athina lhon jih asei tieng uleh "Nadav leh Avihu in hiche chosietna abollhon jih'a thilhon ahi..." tia ajih chuomcheh apeh joh uva ahi'e.
Shabbat Shalom lekulam
