Yitro in Israel chate ahung villhah achu epi asei am? Tuchung Parasha ah hitin aki sun'e, "Tun kahetai, P-kai chu P-thien dang jouse sang'a loupi jo ahi ti.."(Shemot 18:11). Rashi'n hitin asei'e: Hiche hin eihil uchu epi ham eti leh Yitro kiti pa hin siemthu P-thien kiti jouse ana hou'a chuleh etobang ahijong ahetsoh kei ah ahi'e. Chuleh Yitro in Israel chate ho ahung vil apoimo daan chu Zohar lekhabu ah hitin akijih'e: Siemthu P-thien jouse ana hou chuleh ama ho thiempu chungnung'a ana pang Yitro,amatah ahung'a P-thien loupina leh P-thien atahsanna ahung phondoh tokah se'a Torah chu kipe theilou ah ahi.
Yitro kiti pa hin milim siemthu jouse ana hou jieng tahen lang, siemthu P-thien houna'a Thiempu chungnung ana hita jong leh ama loupi kit dan chu hiti ahi- Israel chate ho Egypt akuon ahung potdoh uva twipi san ahin kaan jou chan uchun nampi, vaipi hochu abon uvin Israel te ginna'n atija uvin, akihawt jieng uvin ahi. Hinla Amelek kiti pa leh amite ho ahung uvin ajih apawl bei in Israel chate chung'ah gaal ahung bol uve. Gaal kiti chu thilkhat doi le tup nei jih'a kibol ahin hinla Amalek gaalbol vang chu Israel chate avetda jih bep anahiy.
Khakhamim ho'n Amalek gaal hung bol chungchang'ah hitin asei uve: Hiche Amalek thilbol hi epi to kitekah thei am? Bel lientah khat sung'a twi ki om sou lieh kikoi'a. Mihem hihen gancha hita leh koima cha'n abel sung'a lut bep hilou'a abel chu nai jong anai ngam lou ahi. Hinla Miphalou leh mi kileh khat ahung in bel sung achun ahung kichawm lut'e. Amapa chu twisa chun akah vang in bel sung'a um twi salai chu ahung sukhieng dohtai. Hiche tobang achu Israel teho Egypt akuon ahung potdoh uva, P-thien in amaho lamjawt nading'a twipi akikhen sah jou chun Israel te ginna leh jaana namtin vaipi jouse chung'ah alhung'e. Hinla Amalek in gaal ahung bol in, Israel ten ana jou jieng tajong leu, Israel chate ho ki ginna leh ki jaana jouse chu, achunga bel sung'a kichawmlut pa kisei bang'in, ahung sudaai gamtan ahi.
Chuleh Yitro epi ajah'a Israel te ahung vil ham? Khakhamim ho seidan in P-thien in Israel te ading'a thil kidang abol peh jouse abonchan Yitro ana ja'n ahesoh kei nai, hinla ama'n Israel te ahung villhah leh Giur ahung bol lo najih pentah chu Kiryat Yam suf (Splitting of red sea) leh Amalek gaal bol ajah jih akuon ahi bou'e. Kiryat Yam Suf jou ahi Israel teho lhagao lang dinmun'a asa napen uh ahin, chuleh Amalek toh gaal kisaat ahi ahikitleh lhagao lang'a adinmun uh aniem napen ahikit e. Epi jih in em etileh amaho'n "Elah uva hi P-thien um ah hinam??" atiuva, P-thien'a atahsan nau alhahsam jih'a Amalek hung'a gaal ahung bol ahi tin Khakhamim hon asei uve.
Esei mabang uvin Amalek gaal bol jih chun nampi vaipi hon Kiryat Yam Suf jou'a Israel te aginnau leh ajaanau chu akiemtai. Hinla Yitro ahileh P-thien loupina leh tha haatna chu akisaan in, hiche Amalek gaal hung bol chun P-thien'a atahsanna ema akikhel sahpoi. Mi asang tamtah in Israel te chung'a thilsoh kidang ho ahet vang uva Israel te lah'a hung jao'a, P-thien dihtahpa kisaan'a ki Giur ding ago pouve. Amaho chu ahin dan uh angei ngei pa bang in kikhel lou in aum peh uvin ahi. Hinla Yitro chu Israel te lah ah ahung jao in, P-thien dihtah pa ahung kisaan in chuleh Giur jong ahung kibol'e. Hiche jih ahi Yitro mihina loupi daan vetsahna'a Torah kipehna Parasha chu ama min kisah'ah ahitai.
Shabbat Shalom Lekulam
