"Chuleh hiche daan hohi nangma'n amaho masang'a nakoi peh ding ahi" (Shemot 21:1)
Rashi'n hitin asei'e: "וְאֵלֶּה" (Ve'aeleh) tia Torah sung'a ahung kisei tieng amasang'a thu ana kiseipa baanjom (continuation) ahijiy'e. Hiche hin avetsah chu hiche masang'a thupeh ana kijih ho (Ten Commandments) Sinai akuon ahibang'a tua daan hojong hi Sinai akuon ma ahi uve.
Hiche Parashat Mishpatim sung'a daan kisei hohi evet leh mihem kivaipohna lampang toh kisai daan ngensen bep tobang ahi. Rashi in aseidoh nuom pentah chu hiche mihem leh mihem kikah'a daan hojong hi P-thien leh mihem kikah a daan ho toh apoimo dan thakhat ahi uve ti ahiy. Ani gel gel'a P-thien akuon'a hi'a, khat chungchon'a khat gah poimo sahthei ahipoi.
Achung'a pasuk kipe baan veleu hen:
"Hebrew mi suoh'a nachoh le aman nangma naa kum 6 sung atoh ding, kum 7 lhin tieng levang aman bei'a chamlhat tah'a nasol doh ding ahi. A chang'a hung lut ahile achang'a pot ding, Ji nei ahile vang ajinu toh pot tha ding ahi. A pupa'n ji apui peh'a, chanu chapa anei'a ahileh ajinu leh a chate apupa chang ding, ama achang'a pot ding ahi" (Shemot 21:2-4)
Hinla Mefarshim tamtah ho'n adetmah uchu epi ham eti leh Parashat Mishpatim sung'a daan kisei holah'a amasapen Aved Ivri (Hebrew mi soh) hi ahi. Parasha masapa'a 10 Commandments ho thu kisei'a, hiche ho akichai chai'a, Torah in abaanjom ding'a thildang jong seilou hiel'a Parashat Mishpatim Aved Ivri a ahin pat jieng chu epi jih ahi tadem? Hebrew mi soh kiti chu Khakhamim ho seidan in mi khat aguhchat jih'a Beit Din in soh'a ajoh kiseina ahin, hiche gucha khat chungchang'a kisiem daan'a eti dan'a Torah in Parashat Misphatim ahin pat khel khel ahidem?? Velechun Parashat Mishpatim sung ahi daan dang jong umlou hilou ahi'e.
Hiche thudoh donbutna ding in Khakhamim hon tekahna khat asei uve:
Pasal khat in chapa 10 anei in, alah uva mi khat tilou adang se hochu Talmid Khakham ngensen ahi uve. Khatpa vangchu vangset umtah in miphalou, mi gucha ahung hiy. Apa uvin phatseh'a hiche achapa amimo pa chu eti bol'a siemphah dingham ti agel jing jih in akipana achamkim theipoi. Miho'n ama heng'a, "Eti dan'a kipana mel napu kha hih beh'e, nacha te khu la mipha ngensen ahi uvin" tia asei jiy tieng uleh amapa'n hitin ale donbut jiy'e "Mi lolhing Talmid Khakham ngensen hita jong leu alah uva khat khu eti kaki hetmosah thei ding ham? Ama khu mimo hen lang phamo tajieng jongleh kachapa ahi'n. Ama ding kagel jieng jih'a kaki pa tah tah thei lou ahi".Hitobang achu P-thien in jong mihem hijat lah'a mipha tamtah um tajong leh alah'a ami mo dehset hochu amoh kihetmosah thei lou ahi.
Chuleh tuchung E Parasha sung uva kimu ma khat chu pasal khat in bongchal ham ahiloule kelngoi ham aguh'a, gancha chu aki tha'a ,asaa ajuh'a ahitah leh Bongchal lheng'a bongchal 5 apeh ding, kelngoi lheng'a ahileh kelngoi 4 apeh ding ti ahi. E atileh Kelngoi gupa chu agotna kisuh niem peh'a Bongchal gupa bang'a bongchal 5 a alesah ding ti hilou'a kelngoi 4 joh kileusah aham? Khakhamim hon asei na uva Bongchal kiti chu agupan akai'a, abongchal chun ama keng'a lam ajot ahi. Hinla kelngoi vang chu agupa'n aguh tieng aliengkou'a aput tho ngai ah ahi'e. Athilguh chu koima'n aguh ahi ti hehih jong leh kelngoi gopa ading achu athilgoh aliengkou'a aput chu jachaat umtah ahi'e. Hiche ajachaat nading chu kigel peh'a khonung'a athilbol ahung kimat doh tieng jongleh agotna kilhawmsah ahi.
Khakhamim ho'n hitin asei uve: P-thien in achate angailut dan chu hiche akuon aki mudoh thei'e. Ama tobang koi thutan vaihawm leiset chung'a um am? Gucha khat aja chaat nading kisan jong kigel peh'a achung thu kitan peh thutan vaihawm dang koima cha umponte. Gucha pa chu koi in thil gagu'n tia asol jong hilou nalai, ahivang'a P-thien vaihawm dan loupi dan chu hiche miphalou pa gucha pa jachaat nading kisan jong ana gelphah pih peh ahi'e.
Hiche Aved Ivri chung chang ahin thu giltah akiselgu aum'e. Sefer Noam Ha'mitzvot kiti in hiche Aved Ivri chung chang ahilchetna ah Mussar poimo tah, giltah khat eihil uvin ahi. Noam Ha'Mitzvot ah hitin akisun'e:
Mihem kiti hi thil chini kigomkhawm ahi- Tahsa leh Lhagao. Lhagao hi P-thien kawm'a um ah ahin hinla lungdon umtah chu epi atileh leiset'a hung kumsuh jiy'a tahsa toh hung kigawm khawm jiy ah ahidem? Chunglang'a P-thien hieng'a aum achu epi kivaat'a leiset'a tahsa toh ahung kigop khawm ngai khel khel aham? Ajihchu Lhagao kiti hin tahsa bei'a Mitzvot ho khatcha abol thei lou ahi. Vetsahna'n Tefillin aveithei pon, Tzitzit asil theipon, Yom Kippur nikho'a ann ngol ding jong angol theipoi....chuleh adang dang. Leiset'a ahung kumlhah'a Tahsa toh ahung kigopkhawm jou tieng lebou hiche Mitzvot hochu abolthei pan bep jiy ah ahi.
Tahsa kiti hi Lhagao ading'a asoh, Mitzvot abol napa ahin a "Aved Ivri" chu ahiy. Hinla mihem tahsa chu ehet mabang uvin alhangpi'n kum 70 chan bou adai jiy in, chuleh ahat tawp in kum 80 chan adai jou jiy'e. "Kum 6 sung nangma na atoh ding, Kum7 tieng amanbei'a chamlhat tah'a nasol doh ding..." kiti chu kum 70 jou tieng mihem Tahsan'n chamlhatna akimu'a akichol duo ding kiseina ahi. Hinla Lhagao vang chu abei thei lou ahin, aum den jiy nalai'e.
"Achang'a hunglut ahileh achang'a pot ding.." hiche hin asei chu Lhagao kiti hi Tahsa sung'a bohna neilou, thieng sel'a ahung lut bang'a thiengsel'a kinung le sah got ding ti ahi. Hiche ahin Mitzvot bol ho kisei lou'a thil phalou bol'a lhagao suhboh louding kisei ah ahi.
Hinla "Jinei ahile vang ajinu toh pottha ding ahi..". Epi ji kiseina ham? Ji kiti chu Torah kiseina ahi. Hichu hoi'a kihei thei am? Rashi'n Mishlei lekhabu'a Shlomo'n "Eshet Khayil..." ti ajih ahilchetna'ah "Eshet Khayil.." kiti hi Torah seina ahi atiy. Torah jil kiti chu thil hahsa tah ahin hinla mihem in Torah toh sun leh jaan'a ahung kimat'a, Torah ahin hin-pe tieng "Batach bah lev ba'lah v'shalal lo yechsar" (ajipan akisonpin, vaicha taponte) alunggil sung'a lhahsam na umta lou ding, nei le gou ho jong hiche leisiet hihen ahung lhung ding Olam Haba hitajongle lhahsamna nei pontin, "Vaicha taponte..". Hiti'a chu hiche Eshet Khayil hi aboncha kei'a Torah kiseina ahi.
Khuti ahiileh Torah jil'a Mitzvot abol'a ahitah leh "ajinu toh pottha ding ahi.." tichu a Mitzvot bol ho toh athi tieng a lhagao kinung le ding tina ahi'e. Anei leh gou, sum leh pai leh thil dang dang hovang ema cha akinung poh thei lou ding, aboncha leiset'a adalhah ding ahitai.
Aban'a pasuk, "A pupa'n ji apui peh'a, chanu chapa anei'a ahileh ajinu leh a chate apupa chang ding, ama achang'a pot ding ahi" ,hi apoimo dihset in ahi. Mihem abang khat hi thepna leh thil hettheina toh apen tha uvin. Torah asim ujong leh ama leh ama kihabol ngailou hiel in athilsim/athiljil hou ahe pai pai jiy uve. Hetna leh thepna kiti hi P-thien akuon ahin hichu "Apupa'n ji apui peh'a ahile..." titoh kibang ahi. Hiiche P-thien akuon hetna leh thepna bep pansan'a Torah najil tah'a ahileh achaina tieng "..ajinu leh a chate apupa chang ding, ama achang'a pot ding ahi" tichu na lhagao chu akeo'a kile thou thou ding tina ahi. Hichun avetsah chu epi ham eti leh P-thien in adei chu ei leh ei kihabol'a Torah jil ding, thepna leh hetna bep'a kingap lou ding ti ahi. Ajihchu Mitzvot nabol'a Torah najil ho loman (rewards) chu nahetna leh nathepna hojih hilou'a nang leh nang kihabol jih leh pottho naho jih bep'a P-thien in nahin peh ding ahi.
Hiche jih ahi Khakhamim ho'n hita hi asei uh ahi: Hahsatna leh Boina ho totuh'a aloman jong kipe ahi. Patepna ho, gentheina ho, hahsatna ho leh boinaho eha kidin tepi'a, ejo laise eloman jong tam ah ahie.
Shabbat Shalom Lekulam
