Mefarshim ho lungdon natah khat chu hiti ahi, "Paro chu P-thien in alung asuh tah peh ahi tah leh Israel chateho asoldoh nuomlou chu eti ama mo kichansah thei ding ham?P-thien in Paro leh amite lungsung asuh tah jing'a Egypt te chung'a gotna alhunsah chu epi jih ahidem?".
Mefarshim ho'n achunga thudoh hiti hin ahilchien uve: Paro chu alung kisih nading'a phat kipe lou ah ahipoi. Parasha masapa, Parashat Va'eira, chu evetle gotna chi 5 nachan achu Torah in hitin asei'e "וַיֶּחֱזַק לֵב פַּרְעֹה" (Paro lungthim ataah in). Hinla gotna chi 6 na apat avang chu "וַיְחַזֵּק יְהֹוָה אֶת לֵב פַּרְעֹה"(P-thien in Paro lungsung chu asuh taahpeh in) ti'n Torah in asei pan bep'e. Hiche hin avetsah chu epi ham eti leh P-thien in Paro chu akisih nading'a phat ana peh ahi. Hinla Paro chun avel avel in alungsung asutah in P-thien thusei nahsah in jong ana nei tapoi. Hiche gotna chi 5 akichai jou apat bou achu P-thien in Paro chu kisih nading jieng jong neithei ding'a akoi lou'a a Bekhira Khofshit kisan jong kilahpeh ah ahitai.
Sforno in hitin asei'e: "Keima'n ama lungsung kasuh taah peh ding ahi". Gotna ho thuh jou talou'a Paro in Israel chate chu ahin lhadoh ding chu hetsah ahi. Hinla hiche gotna ho athuh joulou jih bep'a Paro in Israel chate ahin soldoh ding chu P-thien in adei ahipoi. P-thien in adei chu epi ham eti leh Israel chate ho kilha doh ding bouseh hilou'a, P-thien loupina leh thahaatna ho Pao in akisaan'a, hiche akuon'a P-thien lungdei pa chu atohdoh ding tichu ahi'e. Hiche jih achu Paro in P-thien loupina dihtah pa alungsung'a akisaan tokah se'a P-thien in alungsung asuhtaah peh'a, ama leh amite chung'a gotna alhunsah jing ahi.
Tuchung Parasha'a gotna chi 7 napa lhun masang in Moshe leh Aharon Paro masang'ah aga ding lhon in, Paro jah'a Israel chate soldoh ding in aga hetsah lhon in ahi. Paro in amani jah'ah "P-thien naa" bolding'a koi koi che ding uham ti adoh leh Moshe'n alien aneo, ateh akhang chuleh agancha jouse abon uva chesoh kei'uh ngai ding ahi ajihchu "Keiho ading'a hiche hi golnop kut ahi" tin adonbut'e. Hinla Paro anuompon, amani jah'ah Pasal pilhing hobou che uva "P-thien naa" aga kitoh ding uvin ahetsah'e.
Khokmei Mussar ho'n hiche Moshe leh Paro kihouna apat hin Mitzvah bolding dan toh kisai Mussar phatah eihil uvin ahi. Amaho'n hitin asei uve: Paro miphalou pan P-thien kinbol chu naa-ham toh (Hebrew'a Avodah) to thakhat dan'a asim jih in "Pasal pilhing hobou cheu vin lang na P-thien naa uh gaki toh uvin, khangthah chapang ho vang hin sol doh pong kate" ti'a Moshe leh Aharon jah'ah asei ahi.Naa-ham toh kiti chu thil hahsa tah leh ning kitel umtah hi'a chuleh Pasal pilhing hobou bolding, hiche bang achu P-thien Mitzvah bol jong thil hahsa leh ning kitel umtah'a Paro'n agel'a mijouse ana soldoh nomlou ahi .
Hinla Moshe in adonbut na'ah alien aneo, ateh akhang khen lou'a ache ngaisoh kei uvah ahi ajih chu P-thien kinbol kiti chu naa-ham toh tobang'a thil hahsa leh ning kitel um hilou'a "golnop kut" joh ahi bou'e. Chuleh golnop kut achu mi jouse ajao suoh ngai tei tei ahi'e.
Hiche akuon eihon ejil doh ding uchu epi ham etileh Paro bang'a Mitzvah bol kiti hi naa-ham (Avodah) toh tobang'a elah lou ding uh ahi. Mitzvah kiti chu naa-ham toh bang'a ekilah tieng leh thil hahsa leh ning kitel hoitah ahung hikha jiytai. Khuche hilou'a Rabbeinu Moshe bang'a Mitzvah bol hi golnop kut tobang'a egel diu, thanom tah leh kipahtah'a ejo thei chan uva ebol kigot ding joh uh ahi'e.
Shabbat Shalom Lekulam
