Khakhamim ho seidan in hiche gotna chi 10 hohi hop 3 a hopkhen thei ahi. Rabbi Yehuda in gotna chi 10 hochu hiti hin ahawm khen'e- D'tza"k (Daam, Tzfardea, Kinim) A'Da"sh (Arov, Dever, Sh'khin) B'acha'v (Barad, Arbeh, Chosekh, Bechorot). Hiche gotna 10 hohin hop 3 a aki hopkhen dung jui uva ahi tup leh doi anei cheh uh ahi'e tin jong Khakhamim hon asei ui.
Amasa 3, ti chu Daam (Thisan), Tzfardea(Uphoh) leh Kinim (Hiitpi), hohi ahileh Egypt te'n P-thien ahet na ding uva kilhunsah ahi. Moshe leh Aharon in Paro vadung pang'a aga kimu pi lhon'a, Egypt gamsung'a twi um jouse thisan asuo masang achu Moshe'n Paro heng'a asei ding in P-thien in hitin athulhah'e, "Hiche akuon nangma keima Pakai P-thien kahi ti nahet ding ahi" (Shemot 7:17). Egypt techun siemthu P-thien tamtah ana hou uva chuleh Paro amatah kisan jong chu P-thien dan'a ana kisei ahi. Hiche gotna masa 3 ho lah'a anukhah pen Kinim ahung lhun jou chun Paro doithiem hon jong Moshe leh Aharon aki dinte pi jou tapou vin hitin asei tauve ,"Hiche hi P-thien khut jung ahi mong mong'e". Hiti achu hiche gotna masa 3 ho mangcha achu Egypt ho hetding'a P-thien hung kiphong ahi.
Abaan a gotna 3, Arov(Gamsa Haang), Dever(Natna hiise) leh Sh'khin (Uiluut), hohi ahileh P-thien in Vaan leh Lei chuleh asung'a thil umho jouse chunga vai ahawmdan Egypt mite hon ahet nading uva lhung ah ahi'e. Hiche gotna 10 lah'a achi 4 na Arov hung laan ding achu Moshe'n Paro jah ah, P-thien ahil bang in, hitin aga sei'e, "Keima hi leichung ajong P-thien kahi ti hetan nate" (Shemot 8:18). Paro leh Egypt mite ho chun P-thien kiti hi vaan'a um'a, leiset leh asunga thil um chuleh thilsoh hohi P-thien in aboipi lou'a don jong adon lou dan'a ana gel uvah ahie. Mihem kiti hi leiset chung'a vaihawm hiya, ama dei dan dan'a chat thei chuleh anop nop abolthei, P-thien ahileh Vaan chung'a cheng'a leiset a thilsoh ho hi poimo ajong gellou P-thien dan a ana koi uh ahi'e.
Hiche gotna chi 3 ho ahi evet leh, aneopen a sei ding in, P-thien in Israel te gancha ho leh Egypt te gancha ho chung kisan ajong khen chuomna ahin bol in, hiti chun P-thien kiti hi Vaan chung'a cheng'a leiset'a thil umho chuleh thilsoh ho chung'a kikum lou leh vaihawm lou ahilou dan Egypt mite jouse het ding in ahin kilahsah in ahi. P-thien thanei dan chu ganhing aneo pen kisan jong ama vai hawp dan dung jui'a chatloh uva, chuleh thing'naa kisan jong apuul diphat ama'n atep peh jiy ahi'e. Leiset chuleh asung thil um jouse ama'n aboncha kei'a avettup sohkei ahi.
Achaina gotna 4 hohi ahileh P-thien ama tilou P-thien dang um lou'a chuleh ama tobang jong koima aumlou dan Egypt ten ahet nading uva achung uva lhung ah ahi. Gotna 10 lah'a a 7 na, Barad (Giel) ahung lhah masang chun P-thien in ahil bang in Moshe ache'n Paro jah ah hitin aga sei'e, "hiche akuon'a nangma'n kei tobang leiset chung jouse ahin koi ma aumpoi ti nahet ding ahi" (Shemot 9:14).
Hitichun P-thien in anam deilhen Israel chate ho puidoh nading in Egypt te chung'ah gotna chi 10 ana lhun sah in,chujou bep chun ama hochu asoh channau va kuon ana puidoh in ahi. Mefarshim tamtah ho'n hitin adong uve: Epi ding'a P-thien in gotna chi 10 sese Egypt chate chung'a ana lhunsah a khuche jou achu Israel chate asoh channau va kon apuidoh bep aham? Gotna khat bou alhun sah'a apuidoh jieng thei hilou ham?
Midrash'a kijih dan in P-thien in Egypt te chu Israel chate abol na dung jui uva alethuh ahi. Gotna chi 10 hochu aboncha Egypt ten Israel te ana bol nabang bang uva ama ho chung ajong P-thien in thu atan'a, akitupi leh akibah pi ding gotna kipe uvah ahi'e.
Mefarshim khen khat hon hitin asei uve: Egypt akuon'a Israel te kipui doh bep hilou'a Israel te sung'a kuon Egypt akipaidoh thei nading'a P-thien in Israel techu khatvei pui'a puidoh lou'a gotna chi 10 lang Egypt te chung'a ana lhunsah ahi. Hiche khang laiya Egypt te chun siemthu P-thien tamtah ana hou uva, Epu Epa teu jong chu kum 210 lang asoh chan jou uva chu Egypt te chondaan leh khandaan ana jui man jong tamtah ana um uvah ahitai. Hiche ho akuon'a ahung kihei uva P-thien ahin tahsan kit nading uva chu gotna khat bou hitheilou ahi. Gotna hohi Egypt ten P-thien koi ahi chuleh etobang'a thanei ahi ahet nading bep uh hilou'a Israel chate'n jong ahet uva, atahsan na'uh ahaat leh adeh cheh cheh nading'a lhung ah ahi'e. Egypt a asuh channau vakon chamlhatna bep hilou'a alungsung uva um Egypt te mihina paidoh'a aumthei nading'a P-thien in khatvei pui 'a ana puidoh lou ahi.
Shabbat Shalom Lekulam
(Tuchung Parasha Shavua hilchetna hi Rav Shlomo Levinstein kitipa in Drasha apeh na akuon atam jo hung kila ahi)
