"Hichun Yosef in asopi teho jah'ah aseitai,'Keima Yosef kahi, Kapa hing nalai hinam?'. Hinla asopiteho chu datmawna in adim uvin koiman adonbut thei pouve" (Bereshit 45:3)
Tuchung Parasha ahin Yosef asopi te masang'a kitim jou talou'a koi ahi akiphon doh dan thu akisei'e. Hinla datmah umtah khat chu epi ham eti leh Yosef in asopi te jah'a avela apa Yakov dam nalai ah hinam tia adoh kit chu ahi. Yosef asopite heng'a akiphondoh tokahse'a asopite toh akihoulim nahou evetleh Yakov chungchang apan louna aum behpoi. Chuleh Yosef in apa Yakov adam nalai nai ti hiche akuon phatah'a ahet ahi'e.Khuti ahileh epi dia keima Yosef kahi tia akiphondoh jou jou'a apa dam nalai hinam tia avel doh kit ah ahidem?
Khakhamim ho'n hitin asei uve: Yosef in "Kapa hing nalai hinam?" ati chu apa Yakov dam leh damlou ahetnom jih'a asei ahipoi. Yosef in apa ahing nalai nai ti ahenai. Chuleh hiche athusei hi thudoh (question) adoh ahipon hinla kiphosalna (rebuke) asei joh ahi.
Rabbi Eleazar in Torah asim'a hiche pasuk ahin phah jiy tieng akap jiy'e. Aman hitin asei'e," Mihem phe leh vou in bon mi aphosal tieng adonbut thei aumlou leh ,Torah'a kijih bang'a "Hinla asopiteho chu datmawna in adim uvin koiman adonbut thei pouve", hatchungnung P-thien in mihem ahin phosal tieng e ati dem". Yosef, mihem phe leh vou mai mai bep in bon asopi teho aphosal'a seiding helou'a aum thei uleh, khonung'a Yom Ha'Din Hagadol(The Great Judgement day) ahung lhun teng P-thien in e'chung thu uh ahin tan'a, hiche leiset'a ethil bolkhel hou jih'a ehin phosal phat uleh mihem hohi thu seithei eum nadiu vem? tia agel tieng Rabbi Eleazar chapang bang'a kaplha jiy ah ahi.
Hiche pasuk hi phatah'a evet thah kit'a ahi jongleh Yosef asopi te masang'a akiphon dohna ahi ti kicheh tah in aki muthei in hinla hoilai ahi kiphosalna thu pang aham ti muthei ahipoi. E atileh "Kapa hing nalai hinam" kiti thugol hi kiphosalna ahi'e tia Khakhamim hon asei thei uh ahidem?
Mefarshim ho'n hitin hilchetna ape uve:
Yakov Avinu adamsung'a hesoh, genthei ato holah'a ahahsa pen chu achapa Yosef toh akikhen chu ahi. Achapa Yosef in adalhah apat Yakov Avinu chun kipana kiti him him chomkhat jieng cha jong anei khapon chujong leh hiche Yosef toh akikhen phat ho sungse achu P-thien Sh'china kisan in jong adalhah ahitai.
Kiel ahung lhah'a Yosef sopi teho Egypt gam'a neh ding kipoh'a ahung uva chu epi thu soh tam? Binyamin dip sung'a Yosef sana khon akimu doh in, Binyamin chu asopi teho toh kinung le lou'a Egypt gam'a suhchang den ding'a um ah ahitai. Hichun Yehuda akipan in Binyamin chu Egypt gam vaipo'a pangpa akuon huhdoh'a apau Yakov hieng nung lhut tei ding agoi. Yehuda in Binyamin kilhadoh nading'a Yosef hieng'a atao'a athusei hochu evet leh Yakov in achapa Yosef angailutdan; achapa Yosef toh akikhen jih'a ahinkho genthei dan; Yosef umtah lou jih'a asopipa Binyamin bei'a Yakov ahinthei lou ding dan, chuleh adang dang Yakov in Yosef angailut dan toh kisai ngensen tobang ahi'e.
Yosef kijuh mang ding'a lamkai ana hi chu Yehuda ahin, tua Yosef sopipa Binyamin kilhadoh nading'a lamkai'a hung pang kit jong chu Yehuda ma ahikit'e. Yehuda in ama hinkho phalngam leu'a asopipa Binyamin kilhadoh nading thil agon chu Yosef in amu phat in asopi teho'n Binyamin angailu mong mong uve ti amu tan, hiche phat achu amaho masang'a hung kiphongdoh ahi'e.
Chuleh "Keima Yosef kahi" ati jou'a" Kapa hing nalai hinam" tia Yosef in ahin sei kit chu thudoh hilou'a kiphosalna joh ahidan chu hiti ahi- "Sopi pasal 12 kahi uvin, khat aum tapoi na ti uvin...tua Binyamin akimat den'a nang ho toh akinung sol louding phat'a napau hesoh leh genthei thoh ding nahin sei uh. Keima Yosef kahi. Kei nei juh mang ding uva jong chu e'pau vin eti genthei athoh dem ti nana geldoh lou uh ham? Hibang'a genthei athoh nung'a kapa hing jou nalai ham?.." Yosef chun asopi teho chu apau Yakov chung'a gentheina ana lhut jih uva aphosal ah ahi.
"Keima Yosef kahi" tia Yosef ahung kiphondoh phat chun asopi pasal ho chu athilbol khel uh amasang tah uva ahung kiphong doh tan, ajah acha vaal uvin koima jong apao doh ngam aum tapouve. Hitobang achu khonung tieng P-thien jong ama leh ama hung kiphung doh ding mihem ho kawm'a "Thil phalou hijat nabol uva, napau keima neisuh genthei uh.." ahin tiding, mihem hochu aphatlou na hou pansan'a ahin phosal ding ahi.
Mefarshim khenkhat in vang ahilchetna uva hiche "Kapa hing nalai hinam" tihi Yosef in asopi ho phosalna ding'a asei ahipon, hinla Yakov chu dam jieng tajong leh ahesoh genthei thoh ho tochun haat nalai'a dam jong damthei ah hinam ti hetnom najih'a adoh ahi'e. Langkhat ah asopi hon ahileh athilbol khel uh ahung kiphondoh phat'a jahcha vaal uva kiphosalna dan'a akilah khah uh ahi. Ajihchu amaho thilbol jih'a apau Yakov kum khujat pi genthei tah'a um'a, khonung'a asopipa tah uh ama ho masang'a hung kiphong doh'a "Kapa hing nalai hinam" ahin ti chu amaho ading'a kiphosal lenpen ahitai.
Shabbat Shalom Lekulam
