"Hichun Kum Ni kichai jou in Paro in mang anei in, ama vadung chung'ah ana ding'e" (Bereshit 41:1)
Epi Kum Ni kichai jou kisei naham? Khakhamim ho'n hitin asei uve: Ju vaihawmpa leh Ann vaihawmpa mang alepeh jou kal Kum Ni kiseina ahi. Epi ding'a Torah in hiche Kum Ni kichai ahin minphah khel khel ham? Ajihchu Yosef suongkul sung'a Kum 10 umding dol tah ahin, hinla Kum Ni ana kibelap peh be ahi'e.
Atile epi jih'a Yosef suongkul sung'a aum chu kum Ni kibelap peh be aham? Khakhamim ho'n hitin asei uve:
Yosef in Ju Vaihawmpa mang alepeh jou'a, ahieng'a "Neigel doh jieng in lang" (Hebrew'a "זְכַרְתַּנִי") chujongleh "Lengpa hieng'a nei geldoh sah in" (Hebrew'a "וְהִזְכַּרְתַּנִי") ti'a asei thucheng Ni jih'a P-thien in asuongkul um Kum Ni'a asuh sao be peh ahi. Yosef chun P-thien chung'a apumchang kei'a kingapna anei'a, mihem chung him him'a panpina angeh lou ding, chuleh Suongkul apat achamlhat nading chu P-thien'a tahsanna dettah leh lhingset pum'a anga ding ahi. Hinla Ju vaihawmpa kawm'a kithopina athum jih chun P-thien in "Keima nei suong poi..." atia gotna apehbe ahi.
Midrash Rabbah ah hitin akijih'e: "Koi hile P-thien'a kisuong'a chu anun nom ahi"(Tehillim 40:5) kiti pasuk hi Yosef Ha'Tzaddik kiseina ahi. Hinla ehetsa mabang uvin Yosef in Ju vaihawmpa kawm'ah kithopina ana ngeh in, "P-thien'a nakisuonna avaat'e" ti'in P-thien in kum Ni tah gotna apehbei. Khuti ahileh Midrash Rabbah'a thu kijih hi dihlou khattou'a chujongleh Yosef chu P-thien'a atahsanna kivaat tahbeh ahidem?
Baal Shem Tov in hitin asei'e: Tahsanna Dihtah kiti chu etobang ham? P-thien'a pum ngap'a kingap/kisuon ding, thildang him him'a kingapna neilou ding ti hi ahi. Mikhat chun P-thien ka tahsan e tihen lang ahivang'a athilbol lolhinna ding ham'a midang khat kithopina thum taleh hichepa Tahsanna chu tahsanna dettah tithei ahinaipoi. Apoimo pen chu thil jouse hi epi hitale mihem pottho leh gunchu man ahilouleh midang khat in akithopi jih hilou'a P-thien bouseh akuon'a ahi ti tahsan ding tihi ahipen'e. Hitobang'a Tahsanna dettah nanei thei lechun kihabol jong ngailou, midang papina jong ngailou'a naneh leh chah chuleh nakivahna ding namu thou thou ding ahi.
Rabbi Simcha Bunim in ahileh Ramban thusei pansan in hitin asei'e: Mihem kiti chu P-thien tahsan leh tahsan lou jih hilou in, athilbol nalam jouse'a kihabol deu ngai ahi. Tahsanna nei leh neilou kibahlouna chu epi ham? Tahsanna neilou pa'n emajouse ama gunchu jih ahilouleh ama pottho jih bou in agel in, thil abol tieng jongleh ama leh ama kithat go leu khop in athaa, ajung aseng jin ahi. Hinla Tahsanna nei mi'n ahilevang lolhinna kiti taphot chu epi lam, epi lam hitale P-thien akuon bouseh ahi ti ahen, hijieng jongleh Mihem in jong ama akuon abolthei chan abol ngai ahi ti'n akilah in, tahsanna neilou mipa bang'a athaa leh jung neijouse seng'in thil abol ngaipoi.
Rabbi Simcha Bunim in aseibe na'ah Yosef jongchu hitobang mi chu ahi. P-thien'a atahsanna chu detlou ahipon, hinla ama geldan achu suongkul akuon potdoh nading'a amatah in jong abolthei aumle bol'a pha hilou ham tia Ju vaihawmpa kawm'a ngehna ana nei ahi.
Yosef chu P-thien'a akisuonna leh P-thien atahsanna lhasamlou ahitahleh epi ding'a gotna kipe'a, kum Ni suongkul sung'a chu taanbe aham? Khakhamim hon asei uve "Mihem kiti chu a Tzaddik laise'a asuhkhel neocha chung kisan ajong gotna kipe jiy ahi".
Shem Mi'Shmuel in hitin asei'e: Yosef lhagao lang'a asan dan, adihset'a P-thien atahsanna detdan chu Shabbat ni thien thou dan tobang khop ahi. Shabbat ni'a natoh him him phallou ahibep hilou'a, e-lunggel'a e-natoh ding gel ahilouleh natohna toh kisai thu houlim na'a nei kisan jong Shabbat thien thouna suboh'a kila ahi. Hitobang'a chu Yosef khubang'a thieng thou leh a'tahsanna khubang'a det in midang khat kom'a panpina aga ngeh chu ama geldan in ema bol in kisim hih jongleh, ama mihina saan dan toh evetkah leh "lhin joulou na/ chonsetna" tobang'a kilahpeh'a gotna jong kipeh be'ah ahi'e. Midang khattou hile vang Yosef thilbol tobang chu chonsetna ajong kilahpeh lou ding ahi'n, hinla Yosef chu'a lhagao lang'a ami hina asaan vaal jih'a milham tobang'a kilathei lou'a, athilbol jong chonsetna'a kisim peh ahitai.
Shabbat Shalom VeKhag Sameakh Lekulam
