"Chuleh Yaakov Egypt gam'ah kum 17 ahing'e" (Bereshit 47:28)
Mefarshim hon hitin dohna asiem uve: Abraham Avinu hihen lang Yitzkhak Avinu hitaleh Torah in akhopem namun hou leh achenna mun hou asei tieng "ahing'e" ti thucheng hi aman khah lou hiel ahi. E atileh Torah in Yaakov Avinu Egypt gam'a achen kum asei'a chu "Yakov Egypt gam'ah kum 17 acheng'e" ahiloule "..kum 17 akhopem'e.." tia sei lou'a "...Egypt gam'ah kum 17 ahing'e.." tijoh'a asei ham?
Baal Ha'Turim, Midrash chuleh Mefarshim adang dang hon hiche thudoh adonbutna uva hitin asei uve: Yaakov Avinu chu tahbeh'a seiding'a adamsung kum 147 lah'a Egypt gamsung'a achapa Yosef toh akimuto jou apat athi gei, kum 17 sungse bou chu ahing tobang'a sim thei bep ahi. Hiche kum 17 hochu Yaakov Avinu ading'a ahinkho'a nop asah napen leh akipana pen ahin, kicholdo najong hiche jou achu akimu panbep ahi. Hinla adang kum 130 ho'se vang chu ahin'a, mihiem dang ho bang'a thil bol didol jouse abol vang'a Yaakov Avinu chu athi tobang bep ahi'e- kipana kiti him him ana nei khah lou, kicholdo lou hiel'a um'a, hesoh gentheina tincheng in anung ana dal lele ahi.
Hiche hilchetna hin abul lang'a ethu doh uchu hilchen tajong leh akicheh lou lai chu eti dan'a Egypt gam alhun suh'a achapa Yosef to akimuto jou abou Yakov Avinu chu ahing'e kiti pan'a ham? Egypt gam'a kipana leh kicholdona Yaakov in akimuthei'a ahivang'a Israel gamsung'a akimu thei lou chu epi jih ahidem?
Hapta masa'a kisim Parashat Vayigash achun hitin akisei'e:
"וַתְּחִי רוּחַ יַעֲקֹב אֲבִיהֶם"
"...chuin apau Yaakov lhagao ahal doh kittai" (Bereshit 45:27)
Rashi'n hiche pasuk hi ahilchetna hitin apei: "Yaakov lhagao ahaldoh kittai" kiti chu P-thien Sh'china ahung kile kit'a, achung'a ahung chenkit kiseina ahi. Yaakov in achapa Yosef pul adou'a agenthei vaal jih chun kipana him him ana neikha tapon, P-thien Sh'china kisan in jong ana dalhah ahitai. Hinla achapa Yosef ahing nalai'e ti ajah'a Yosef in ahinsol thilho amu chun atahsa leh alunggel kipana'n ahin luodim'a, P-thien Sh'china jong ahieng'a hung kile kit'ah ahi'e.
Talmud, Mesechet Shabbat ajong hitin akijih'e: P-thien Sh'china kiti hi mihem alung noplou, lhasetna'a dim chuleh kipana nei lou mihiem chung'ah aum theipon, hinla Mitzvot ho abol apat kipana kimu mihem ho chung bou'ah aumthei in ahi.
Khuti ahileh Yaakov Avinu chu adamsung kum 130 sungse'a kipana chamkim ana neikhah lou chuleh kicholdo nadi phat jong ana neilou ahi. Boina leh hesoh gentheina kiti, khat akichai leh adang khat hung lhung kit jiy'a hita chu Torah kisan jong adei bangtah'a ana sim thei lou ahi'e. P-thien Sh'china mihem alungsung'a kipana leh kicholna nei mi chung bou'a aumthei'a ahivang'a Yaakov Avinu ahikit leh hesoh gentheina'a ahinkho ana dim ahijih chun P-thien Sh'china jong achung'a sot um man jiy lou ah ahi.
Hinla achapa Yosef toh ahung kinung muto kit jou vang chun Yaakov Avinu chu kipana jieng bou in adim in, P-thien Sh'china in jong aphatseh'a avop'a adalhah lou ahitai. Avot ho ading'a apoimo pen chu P-thien lhagao toh um khom'a kivop jing ding tihi ahi, hijih'a Yaakov Avinu chu kum 130 sungse'a athi bang'a kisei'a, ahivang'a adamsung'a kum 17 achapa Yosef toh aum khom kit naphat sungse chu Sh'china toh akivop jing jih'a Yaakov ahing'e tia kisei bep ahi.
Egypt gam, gamboh leh hiche lai khang ading'a aphalou tincheng tamna pen gam'a Yaakov Avinu'n kicholdona akimu'a ahivang'a gamtep gam Israel gamsung'a kipana leh kichol dona amulou chu egel le lungdon umtah ahi. Hichi thu hi Rabbi Menachem Mendel kitipa'n jong aneolai in ana hethiem theipon, apupa Rabbi Schneur Zalman adong in ahileh apupa'n hitin adonbut'e: Torah'a hita hi kijih hilou ham "Ama masang in Yosef kom'a Yehuda asawl'in, Goshen vetsah ding in.." (Bereshit 46:28) Midrash'a kimu dungjui in Yaakov in Yehuda chu Torah sim nading mun guongtup ding'a asol ahi akitiy. Mi koi hileh, hoilai mun'a um hijeng ta jong leh Torah sim taphot chu P-thien toh kinai ah ahie. Mun boh pen Egypt gam kisan ajong chu P-thien toh kinaina kisep'ah, nomtah'a khosah thei ahi.
Hinla aban Pasuk esim be'a ahileh Yaakov in Yosef hieng'a Egypt gam'a avui lou hiel nading'a kitepna aneisah dan akijih'e. Hiche hin eihil nuom uchu epi ham eti leh Juda mi kiti chu Galut ah hinkho nomtah mang taheng lang, haosatna leh lolhinna ho keu hilou'a Torah lang leh Mitzvot suhbulhit na toh kisai ajong kivaatna leh ngaichat beding nei tahih jong leh lungmonna leh lungnopna ama leh ama a kipeh lou hiel ding ahi. Galut kiti chu eiho ading'a chenna mun dihtah hithei lou ding. Phatseh'a hiche thu hi ageldoh jing'a "Egypt" gam akuon'a akipui doh nading'a P-thien kom'a taona'a athum jing joh ding ahi.
Shabbat Shalom lekulam.
Khazak Khazak Venitkhazek
