"Chuleh hiche min hohi Egypt'a hung Israel chapate ho chu ahi'uve" (Shemot 1:1)
Khakhamim hon hitin asei uve: "וְאֵלֶּה שְׁמוֹת" ("Chuleh hiche min hohi") - kiti hin masang'a ana umsa thilho abelap ahi. Hiche hin eihil uchu epi ham etileh Shemot lekhabu hi lekhabu thah beleh hilou'a, Bereshit lekhabu ding'a abu nina tobang ahi. Bereshit lekhabu chu Vaan leh Lei chuleh asung'a thil um ho kisiem kiseina lekhabu masapa hia, Shemot lekhabu hi Vaan leh Lei chuleh asung'a thil umho kisiemna lekhabu anina pa ahi'e.
Atile eti dan'a Shemot lekhabu hi Vaan leh Lei chuleh asung'a thil umho kisiemna lekhabu anina pa ahi'e kiti thei aham?
Adonbutna chu hiti ahi:
P-thien in abultil in van leh leiset chuleh asung'a thil um jouse ahin siem in hinla thilsiem chu hiva chu kichai sohkei nailou ah ahi. Egypt gam'a asoh channa mun uva kuon'a P-thien in Israel te ahin puidoh'a, Sinai muol mai'a Torah sang ding'a aum uva chu epi ti tam? Khakhamim hon aseidan uh chuleh Midrash'a kimu dan in P-thien in Israel chate jah achu Torah akisan lou uva ahileh Van leh Leiset chuleh asung'a thil um jouse asuhmang ding'a ana gih ahi'e.
Sinai muol mai'a Torah sang ding'a adinpet uchun P-thien in Israel chate jah'a hitin asei'e,"Israel ten Torah na kisan uva ahileh na kihinsuo ding uh ahi. Hinla na kisan tahlou uva ahile, Vaan leh Leiset chuleh asung'a um jouse aboncha kasiem masang dinmun'a kanung hei kit ding ahi". Hitia chu Israel chate, Egypt gam'a asoh channa uva kuon ahung potdoh uva, Sinai muol'a Torah ahin kisan uva chu siemtil'a P-thien in Vaan leh Lei chuleh asung'a thil umjouse ahin siemna natohpa chu kichai pan bep ahi'e.
Chujong leh P-thien in Vaan leh Leisiet chuleh asung'a thil umho ahin sep ding'a chu Torah avet'a, Torah pansan'a thil jouse ahin sep ahi. Hiche tobang achu Leiset kivaihawm daan leh khantouna jong hin Torah toh kimat/kiguijop na aneipeh ahi'e. Rav Kook student lah'a ding'a aminthang leh athiempen loi lah'a khat Rav Yaakov Moshe Kharlap kiti pan hitin asei'e: "Talmid Khakham ho'n Torah asimna akuon uva khidush emet ahin nei tieng uleh leiset chihna leh thiepna lampang'a Miching, Mithiem honjong hetna aneibe pan bep jiy uvah ahi".
Epu epa teu vin Sinai muol'a Torah ana kisaan uva kuon'a eiho jong leisiet din-jing/um-jing nading'a P-thien in amatoh kithokhawm(partner) khat'a ei lhen doh uh ahitai. Chujongle e Torah jil uva kuon'a leiset siempha leh khantousah'a epan kit uh ahi. Hiche jih ahi Sefer Shemot , Matan Torah kisutna lekhabu hi Sefer Bereshit, P-thien thilsiem thu kisutna, belap chuleh a'bu nina pa tia kiminvo ah ahi.
Parashat Shemot ahin Rabbeinu Moshe hung pen thu akisei'e. Paro in Israel chapa peng jouse tha ding agot jih'in Moshe nu leh asopinu'n naosen Moshe chu vadung ah aga selmang uve. Ehet sa mabang uvin hiva chun Paro chanu Batyah in naosen chu amudoh in, ama chapa dan in ahin kivah in, hitichun Moshe chu Paro innsung ah ahung khanglen tai. Paro chanu'n naosen amudan tuchung Parasha ah hitin akijih'e:
"וַתֵּרֶא אֶת הַתֵּבָה בְּתוֹךְ הַסּוּף וַתִּשְׁלַח אֶת אֲמָתָהּ וַתִּקָּחֶהָ"
"chuin amanu'n pumpeng lah'a sinkhup amu'n, asohnu asol in aga lahsah tai" (Shemot 2:5)
Talmud ah hitin akijih'e: Hebrew'a "אֲמָתָהּ"("asohnu") kiti hi "abaan"(her arm) tina jong ahi'e. Khuti ahileh Paro chanu chun asohnu asol hilou'a amatah in sinkhup chu lah ding agot'a, abaan asol tina ahi. Hichun P-thien in nes(miracle) ahin bol'in, Paro chanu baan chu Sinkhup chan pha ding in asaosah in, sinkhup chu aga lahsah tai.
Kotzker Rebbe tia jong kihe Rabbi Menachem Mendel mi'Kotz in hiche thu pansan in Mussar phatah, hetding'a hoitah khat eihil uve. Aman hitin asei'e:
Paro chanu chun pumpeng lah'a um sinkhup chu aban phah lou ahi ahet vang'a e atile lah ding agot tei tei ahidem? Nes hung um in tin ka baan hung ki susao nante ti'a kinepna ana nei masat tou ahidem?
Hiche ahin kihil nathei Mussar phatah aum'e. Khatvei, khatvei tieng eima mihem hina dol'a e'siemphat joulou ahilouleh e'jolou ding dinmun ah akiding kha jiy'e. Midang khat ham ahilouleh thilkhat, eiho akuon panpina ngaicha'n, eiho lang ngan ahung kap jiy in hinla e mihem hina dol'a epi kibol jong leh e'ki thopi joulou ding ahiloule e'siemphat joulou ding ahi ti aki het jih in ema ana kibol jiy tapoi. "Keima'n thil neocha khat gabol jong leh ema phachom ponte" ti'n aki kihetmosah jiy tan ahi.
Hinla Paro chanu chun naosen kaa gin ajaa'n, ama toh naosen umna sinkhup kikah chu mun gamla tah, baan gah jah'a sophah ding huoi ahilou vang chun abolthei chan abol in, naosen ding gelna'n abaan ajah tai. Naosen umna sinkhup chu asophah ding thil hilou hiel ahivang'a abolthei chan abol'a abaan ajah jih chun P-thien in abaan asao sah in, ahitheilou hiel ding thil khat chu ahitheisah tai. Hiti chun Paro chanu'n naosen chu ahuh doh bep hilou in leiset khang ading'a miloupi pen Moshe chu ama vethuoi nanuoi'ah ahung khanglen tan ahi.
Shabbat Shalom lekulam
