"וַיִּסַּע יִשְׂרָאֵל וַיֵּט אָהֳלֹה מֵהָלְאָה לְמִגְדַּל עֵדֶר:"
"Chu'in Israel achie paiyin, Migdal Eder gaal'ah apuonbuh atungdoh'e" (Bereshit 35:21)
Hiche Migdal Eder kiti mun hi Torah sung'a mundang him him ah akinung phah kit tapoi. Atileh Migdal Eder kiti hi epi mun hitam? Targum Yonatan in hiche mun toh kimat, thu naltah khat asei'e. Targum Yonatan dung juiyin hiche Migdal Eder, Yakov Avinu'n Rachel thijou'a ahin jotpa namun ahi khonung leh Messiakh hung kiphongdoh ding ahi.
Tuchung Parasha ahin pohnat umtah ahilouleh thuphalou tidi ham, Rachel E'menu thina akisei in. Aban in thuphatah, khonung'a Messiakh hung kiphon doh nading mun akisei kit in. Hiche jou'a thilsoh evet kit'a ahileh thuphalou tah, Reuven in apa Yakov thaikem Bilhah aluppi thu akisei kit in ahi. Hiche thudol'a tuchung e Parasha uva hitin akijih'e:
" וַיֵּלֶךְ רְאוּבֵן וַיִּשְׁכַּב אֶת בִּלְהָה פִּילֶגֶשׁ אָבִיו וַיִּשְׁמַע יִשְׂרָאֵל פ וַיִּהְיוּ בְנֵי יַעֲקֹב שְׁנֵים עָשָׂר"
"Chuin Reuven ache'n apa thaikem Bilhah aluppi'e.Hiche thu chu Israel in ajaai. Israel chapate hochu 12 ahi uve" (Bereshit 35:22)
Khakhamim ho seidan in Torah sung'a thu/thilsoh hung kisun jawm jiy hohin kimatna anei uve. Khuti ahileh Migdal Eder mun toh Reuven chonsetna hung kiseimat hin epi kimatna anei aham? Khakhamim ho seidan in Yakov Avinu chapa 12 hochu aboncha seh uva Tzaddik Gadol ngen sen ahi uve. Atileh Reuven chun apa thaikemnu aga luppi'a aga chonset jieng ding chu atah ahinadem?Chujongleh Reuven thil phalou bol kisei jou jou'a epi ding'a Torah in "Israel chapate hochu 12 ahi uve" tia ahin sei khel khel ahidem?
Khakhamim ho'n hitin asei uve: Koi hileh Reuven in chonsetna abol'e tijouse akhiel ahi uve. Mefarshim tamtah hon jong ahilchetna uva hiche "Reuven in apa thaikem Bilhah aluppi'e" kiti pasuk hi akijih bang chet'a lahdi ahipoi. Reuven in Bilhah aluppi'a, chonsetna aga bol ahipon,lup jong aluppi louhiel ahi.Hinla Reuven chonsetna dihtah chu hiche pasuk sim'a moh hetdoh ding thil ahipoi.
Kiniel na beihiel a seithei vang chu Reuven chun bolkhel anei ahinai. Ajihchu khuti lou hileh Bereshit bu kichai nalang'a Parashat Vayekhi sung'a Yakov Avinu'n Reuven jah'a "כִּי עָלִיתָ מִשְׁכְּבֵי אָבִיךָ אָז חִלַּלְתָּ יְצוּעִי עָלָה" ("napa jaalkhun ah nakaldoh in nasuboh tai"-Bereshit 49:4) tia asei lou hielding ahi. Atileh epi ahitadem athil bolkhel?
Mefarshim ho chuleh Midrash in hitin asei'e: Reuven bolkhel chu Bilhah aluppi ahipon hinla apa Yakov lupna ahilou lou'a akoi'a, apa asuhboi jih ahi. Epi jih a che chu abol aham? Anu Leah kisuh molphou di adeilou jih ahi. Rachel damlai sungse achu Yakov Avinu'n alupna Rachel ponbuh sung'a akido'a, aphatseh tobang'a hiche lai mun achu geh jiy ahi'e. Thil cheding dan doltah hileh Yakov Avinu'n Rachel thi nunga chu alupna Leah ponbuh sung'a akido'a, geh ding ahi. Hinla Yakov Avinu chun alupna chu Leah ponbuh'a do talou in Rachel sohnu Bilhah ponbuh joh'a aga kido tai. Reuven in apa thilbol ahetphat in anu kimusitna dan in ala'n apona lheh in ahi.
Ehetsa mabang uva Reuven chu eto bang mi ham eti leh anu ngailutah, anu kipa nading'a ema jouse bol leh anu kisuh molphou nading kiti him him ngai ngam lou leh deilou mi ahi'e. Mefarshim tamtah in Reuven thilbol epi ahi tamtah asei uvin hinla achawm lam'a seidi hitaleh apa Yakov leh Bilhah kitimat theilou nading'a apa lupna chu epi hamkhat aga lo dan ahi'e.
Torah in "Nanu leh Napa jaabol in" ati hilou ham? Chuleh Reuven thilbol chu evetleh anu kijaa nading leh kisuh molphou lou nading'a abol ahikit ngal'e. Athilbol jongchu ei mihem lunggel ah gah gel ding'a epi thupi behseh jong ahipoi tithei khopset ahi'e. E atileh Torah in Bilhah aga luppi bang leu'a asei ham?
Khakhamim hon hitin asei uve: Mihem khat hung pen nading'a hi thil thum-Mipa, Minu leh P-thien, apankhawm ngai ahi. Khakhamim ho'n mundang khat ma'ah hitin asei uve: Nu le Pa jaabol ding tihi hoiche masa am? Pa jaabol ding tihi amasa joi ajihchu numei in Ajipa ajabol ding ti thupeh ahi.
Chuleh Reuven in ahetlou khat thil um ahi'e. Hichu epi ham etileh Yakov Avinu chun alupna Bilhah ponbuh sung'a mohseh'a adoplut ahipoi. Yakov Avinu'n aji te koipen ponbuh'a Sechina kingai am ti avet jiy'a hiche dung jui bou achu alupna akido'a, geh jiy bep ahi.
Khuti ahileh Reuven in anu Leah hilou'a, apa Yakov joh ajaa bol ding lai asuh bulhit lou chu abolkhel khat ahin. Anina ahileh P-thien Sechina jong ajaa bollou tina ahitai. Reuven in anu angailut man leh anu ajaa bol jih'a athilbol chu abol hita jongleh hiche sang'a poimo jo apa jaabol ding chuleh che chungchon'a P-thien Sechina jaabol ding ti asuh bulhit lou jih'a Torah in apa thaikemnu Bilhah luppi bang'a asei ahitai.
Hinla Reuven chu Khakhamim ho seibang'a achonse tahbeh ahipoi. Hichu Reuven thilphalou bol asei jou'a Torah in "Israel chapate hochu 12 ahi uve" ati akuon mudoh thei ahi. Khakhamim hon asei uve: Hiche pasuk in avetsah chu epi ham eti leh Israel chapate ho 12 ahi uvin, achang cheh uva nuolna neilou ngensen ahi uve ti ahi. Reuven chu athilbol khel nunga jong chonse tah tah ahilou dan chu Israel chapate ho lah'a kisim tha nalai ti vetsahna'a Torah in Reuven thilphalou bol asei jou'a hiche pasuk hi ahin sei pei khel khel ahi'e.
Hetding'a poimo khatchu epi ham eti leh achung'a thu kisei ho jih'a Nu jaabol apoimo behpoi tia e gellou hiel ding uh ahi. Abulpat nalang'a esei uh Migdal Eder(מגדל עדר) kiti thucheng hi "Megadel Eder" tia jong simthei ahi'e. Hichu epi ham eti leh "chapang ho khanlet sah" tina jong ahi'e. Chuleh chapang ho khanletsah tu chu evet leh Mipa ho hilou'a Minu hojoh ahi. Khuti ahileh Messiakh kiti chu Mipa jaabolna leh P-thien Shechina jaabolna bep hilou'a Minu jaabolna leh ngailutna ahung pan tieng lebou hung bep ding tina ahi. Minu jaabolna loupi dan vetsahna'a tuchung e Parasha uva Torah in Migdal Eder chungchang leh Reuven thil phalou bol ahin seimat tha ahi.
Shabbat Shalom Lekulam
(Hiche Parashat Shavua hi Rav Yitzkhak Gintzborg kiti pa drasha akuon atamjo hung kiladoh ahi'e)
