.jpg)
"וַיֵּצֵא יַעֲקֹב מִבְּאֵר שָׁבַע וַיֵּלֶךְ חָרָנָה""Yakov in Beer Shava adalhan, Kharan juon in achetai" (Bereshit 28:10)
Mefarshim hon hitin dohna abol uve: Epi ding'a Torah in "ויצא יעקוב מבאר שבע לחרנה" (Yakov Beer Shava akuon apotdoh in Kharan ajuon'e) tilou'a "ויצא יעקוב מבאר שבע וילך חרנה" (Yakov Beer Shava akuon apotdoh in, Kharan juon in achetai) joh ati ham? Eipi akikhehna um chuom'a Torah in hita chu asei khel khel ham?
Amaho'n adonbutna uva hitin asei uve: Hiche hin avetsah chu epi ham eti leh Yakov Avinu'n Beer Shava adalhah achu Kharan ajon pei poi. Midrash'a kisei bang'a Shem leh Eber Yeshiva'a kum 14 tah umpa'a, hiche jou'a chu apupa, Rivka sopipa Lavan chenna khopi, Kharan, jon'a che pan bep ahi. Atileh epi ding'a Yakov Avinu'n Beer Shava adalhah jou jou'a Charan ajot pei lou ham?
Hiche achung'a thudoh donbutna hetthei nadi'n Yakov Avinu'n epi jih'a Beer Shava adalhah ham ti, ehetsa sohkei uh hita jongle, sei tadiu te. Yakov Avinu potdoh najih ni aum'e. Khatna'a Eisav in Yakov thading agoi ti miho akuon Rivka'n ajai. Hiche tobang thu ajah phat chun Yakov kihinsuo thei nading in Rivka'n chomkhat beh a'upa mitmu akuon kiseldoh ding'a asoldoh ahi. Anina ahileh a'upa Eisav bang'a Canaan numei ho ji'a akipui lou'a, apu Lavan chanu joh ji ding'a aga kipui ding deina'a apa Yitzkhak in asol ahi'e.
Talmud, Kiddushin ah hitin akijih'e: Mitzvat Kibud Horim (Nu le Pa jaabol ding chungchang) ahin Mipa jaabol ding ti hi Minu jaabol ding sang in amasa joi. Apa Yitzkhak in ahilna chu evet leh Kharan'a ache'a apupa Lavan chanu ji'a aga kipui ding ti ahikit in. Yakov Avinu chun apa Yitzkhak thusei angailou ahitadem?
Khakhamim hon hitin asei uve "Jii nei ding leh Torah sim ding kiti hi hoiche masa am?" Rabbeinu Tam in Gemara pansa'n hitin adonbut'e: Mivaicha/neijoulou ading'a Torah sim ding ti hi Jii nei ding sang in amasa joi. Hinla nei leh gou ning lhingset'a nei ahitahleh Jii akinei masat ding chejou tieng leh Torah asim ding ahi.
Yakov in Beer Shava adalhah achu nei leh gou tamtah toh apa Yitzkhak in asoldoh tha ahi. Khuti ahileh ama ading'a akin, abol masat pen ding chu Kharan jot'a ji neiding tichu ahi'e. Hinla Eisav chapa Elifaz in Yakov chu lampi ah ahin delkhum in tha ding agoi. Elifaz chu Yakov toh Yeshiva'a ana umkhawm ahilhon jih chun Yakov chung'ah akhot lha'a, athisan suo jieng ding chu ahitheipon. Yakov chu ahinghoi in hinla anei leh agou jouse vang achom peh tai. Khuti ahileh Yakov Avinu ading'a Torah sim joh chu Ji nei ding sanga poimo jo ahitai. Hijih achu Yakov Avinu'n Charan ajon pei tapon, Shem leh Eber Yeshiva achun kum 14 avaitham den tan ahi.
Chujongle Mefarshim hon asei be nauva hiche Yeshiva'a aumsung kum 14 chu khonung'a Lavan Milepchi pa hieng'a Yakov in aji ding akilo'a, aga chen den sungse toh akitoh kit in ahi. Hiche kum 14 sung'a a Torah jil chun Yakov Avinu akithopi'a, apupa Lavan phatlouna leh sietna jouse akuon Yakov leh ainnsung mite ho ahuoidoh thei ahi.
Chuleh Torah in "ויצא יעקוב מבאר שבע וילך חרנה" (Yakov Beer Shava akuon apotdoh in, Kharan juon in achetai) atina jih kit khat chu Yakov Avinu'n Eretz Israel angailut dan avetsah nom jih ahi. Yakov Avinu'n Beer Shava adalhah tokah chun hoilang juon'a cheding agelpoi. Beer Shava ahin dalhah'a, Israel gam ahin khel apat bou Kharan juon'a cheding agot pan bep ahi. Agamsung'a aum laisung se gam polang alungthim'a gel ding kisan jong Yakov Avinu chu anompoi. Hijih achu Torah in "Yakov Beer Shava akuon apotdoh in Kharan ajuontai" tilou'a "Yakov Beer Shava akuon apotdoh in" tia asei'a aban'a "Kharan juon in achetai" ati ahi.
Abulpatna lang'a kipe pasuk chu Rashi'n ahilchetna naltah apei. Rashi'n hitin asei'e: "Yakov in Beer Shava adalhan.." tia Torah in ajih jong ngai khel khel lou, "Yakov Kharan jon in achetai.." tijong leh pha khopset ahi. E atileh Torah in Yakov Beer Shava dalhah thu ajih khel khel ahidem?
Hiche hin vetsah anei ahi. Hichu epi ham eti leh Tzaddik khat in munkhat adalhah tieng adalhah namun chu masang abang jiy tapoi. Khopi hoina leh loupina kiti chu asunga um Tzaddik pa jih bou ahi. Tzaddik pa apotdoh'a, khopi adalhah tieng, khopi hoina leh loupina jousen jong khopi chu adalhah jiy uh ahitai.
Shabbat Shalom Lekulam
