"Yakov chu apa khopemna gam Canaan gam achun achengtai" (Bereshit 37:1)
HaRav Chaim Yosef David Azulai, Ha'Chida tia jong kihepa'n hitin asei'e: Yakov Avinu'n ahinkho'a atuo gentheina leh hesuoh naho jouse hiche "וַיֵּשֶׁב" (Va'YeSheV) kiti thucheng sung ahin muthei ahisoh kei'e. Asopipa Eisav(עשו) in ana vetda'a thading anagot jih'a anu leh apa akuon ana jamdoh; Apupa Lavan (לבן) in ajou jou'a ana bol'a ana suhgenthei; Achanu Dina (דינה) chung'a thilsoh jih'a athilto chuleh achaina pen leh athilto lah'a athuoh hahsa pen- achapa teho lah'a angaipen leh adeipen Yosef(יוסף) chung'a thilsoh. Hiche Yakov Avinu in hesoh, genthei anato najih miho amin uh Hebrew'a otiyot(alphabet) ani channa ho se'se elahkhom leh "וישב" akoudoh uvin ahi.(Yosef min'a Vav, Dina min'a Yud, Eisav mina Shin, leh Lavan min'a Bet)
Hebrew pao'a Vayeshev kiti thucheng hi ei Thadou pao'a ledoh di hitale "chen" (english'a settle) tiding dan ahi'e. Hinla Mefarshim ho seidan in Torah sung'a Vayeshev kiti thucheng ahung kiman tieng asei doh nuom thil khat um ah ahi. Hichu epi ham etileh "lungmongsel'a, lhahsamna umlou hiel'a chuleh munkhat'a Inn chen, lou chen dettah'a sep" tina ahi'e.
Yakov Lavan akuon ahung jamdoh'a, apa kawm'a ahung nung kilekit chun kum 108 ahitai. Hichun aman jong hitin agel'e, "Mihem hinkho hi kum 120 bou hiding'a P-thien in athulhuh ahitan. Keijong atampen'a tu apat kum 12 hamkhat bou hinbe ding kahitai. Kahinkho achesa sungse in kicholdo nading phat kamu khapon, tu ahung lhung ding kum 12 sung beh ahi lungmongsel'a kakicholdo'a, Inn chen kaki vettup thei ahitai".
Hinla chomkhat jieng jong kicholdo naman pelou in P-thien in ahinkho ading'a hesoh genthei athoh lah'a apohgeh pen, achapa iitpen leh deipen Yosef toh akikhenna, Yakov Avinu chung'ah ahin lhun sahtai. Rashi'n hitin asei'e: Yakov Avinu lungmong sel'a um'a, kicholding chuleh Inn chen phatecha kisep ding ati jih'a P-thien in Yosef chung'a thilsoh ho ahin lhunsah ahi. Tzaddikim ho'n lungmonna leh kicholdona ahin hawl tieng uleh P-thein in hitin asei'e," Ahung lhung ding Olam Haba a akisan ding uva kakholpeh gou ho lhinglel asah uh ham, hiche leiset ajong lungnopna leh kicholdona aki hawl uh!".
Yakov chung bou hilou in Torah sung evet leh mundang'a Vayeshev thucheng kijahna ho hi apha hitahsang in thilsoh aphalou khat in ajui pei pei jiy in ahi. Yitzkhak Avinu jong Philistine te gam'a aga khopem chun Torah evet leh hitin akijih'e:
"וישב יצחק בגרר"
"Chuin Yitzkhak Gerar mun'ah achengtai" (Bereshit 26:6)
Hiche pasuk ban esim be leh Rivka, Avimelekh leng innsung'a akipuilut thu akisei pei in ahi. Hichu epi ham eti leh Yitzkhak Avinu Gerar mun achu lungmongsel'a kicholduo'a Inn chen phatecha tundoh ding agot jih'a P-thien in achunga hesoh gentheina ahin lhunsah pei ahi tin Khakhamim hon asei uve.
Atileh epi jih'a P-thien in Avot hochu munkhat'a achenden ding uh adeilou'a, adamsung uva chenna muntum umlou'a akichau lele sah ahidem? Khakhamim hon hiche thudoh adonbutna uva ajih ni ape uve. Khatna ahileh P-thien thulhung miho lah'a akithejal thei nading ahi. Munkhat bou'a chen akuon miho toh kiha hetna alhawm in, P-thien thulhung jong edei dantah in akithejal joupoi. Avot hochu muntin'a kichon leleu va P-thien thulhung jong miho mitmu ding'a ana choisang uh ahi.
Anina chu ahileh Canaan gam P-thien in Israel chate ding'a anei leh agou ding uva apehdoh, chuleh Israel chateho hi Canaan gam neitu ahi uve ti kilah nading'a P-thien in abol ahi. Canaan gamsung chu P-thien in Avot ho heng'a ana kitepna bang'a Israel chate ho ading'a apeh doh'a, Avot hojong chu agamsung'a adeina mun mun uva achau lele sah'a, phat chomcha cha achen sah jiy ahi'e.
Chujongle tuchung Parasha'a Yakov Avinu chunga thilsoh akuon eihon ejildoh ding uh Mussar chu epi ham eti leh lungmonna leh kicholdona dihtah kiti chu hiche leisiet ading ahipon, ahung lhung ding Olam Haba ajoh ding ahi'e. Mihem in elungsung in lungmonna ding leh kicholdo nading thil tamtah kigel henlang, kibol tajongleh P-thien in athulhuh jiy pa bou chu achaina leh suh thou thou jiy ah ahi. Chuleh hesoh gentheina kiti hojong hi khonung'a apha hungso nading joh ana hijiy ah ahibou'e.
Shabbat Shalom Lekulam
