Yitzkhak Avinu in achapa teni lah'a alienjo pa Eisav chu aneojo pa Yaakov sang in angailu jo'n, dei jong adei chuom joi. Hinla ajinu Rivka in vang Eisav phatlou na ho ahe'n, anaopa Yaakov joh alungsiet'e. Torah in, tuchung E Parasha uh evet leh, Yitzkhak Avinu'n Eisav angailut jih hitin apei:
"וַיֶּאֱהַב יִצְחָק אֶת עֵשָׂו כִּי צַיִד בְּפִיו" (Bereshit 25:28)
Hiche achung'a Ivrit'a kijih pasuk hi ei Thadou pao'a le'di hitale "Yitkhak in Eisav chu angailui ajihchu asa matsa aneh jing jih in.." tiding dan ahi. Khakhamim ho seidan in Eisav chu miphalou tah, hiche khanglai'a agam'a anacheng Canaan mi ho sang'a jong khanse jo leh phalou jo tithei khopset ana hiy. Atileh eti dan'a Yitzkhak Avinu in "asa matsa aneh jing jih" bep achu hitobang'a miphalou chu angailut thei ahidem? Hiche pasuk hin epi asei nom ahitadem?
Midrash'a kijih dan leh Rashi hilchet dan in hiche achung'a kipe pasuk chu anuoi'a bang joh ahi leding ahi:
"Yitzkhak in Eisav chu angailui ajihchu ama(Eisav) samat thiemna hi akam'a um ahi". Midrash pansan'a Rashi hitin asei'e: Eisav chun aphatseh tobang in apa Yitzkhak jah'ah akam akuon ajou asei jing in, apa alhem jing in ahi. Chii leh chaangpawl ho hop-sawm kipeh jiylou hena sasa'n Eisav in Yitzkhak jah'ah hitin adong'e, "Chii (salt) khu eti hop-sawm kipe ham? Chaangpawl (straw) khu eti hop-sawm kipe ham?". Achapa Eisav in hitia thu adoh jiy tieng Yitzkhak akipah in, alunggel ah hitin asei jiy'e, "Ka chapa hi eti lawm'a Mitzvah bol nading'a kipe jou aham. Thil neo cha cha ho kisan jong akhuol toh ditdet in ahi".
Hitichun Tzaddik lou beh, Tzaddik dihtah hileh kilawm leu in apa Yitzkhak chu Eisav in Halakha hopou adong jiy in. Hiche thudoh tobang jatchuom chuom adoh jiy jihchun Yitzkhak in Eisav chu miphatah dan in agel in, angailu cheh cheh in ahi. Eisav kitipa, miphaloupa chun, jou le naal mangchan apa Yitzkhak alhem in, apa ngailutna leh lungsietna ana achang'e.
Hinla a thusim ehetsa mabang uvin phat ahung chien ahile Yitkhak phatthei boh chang didoltah Eisav chu vangbohna changtalou in Yakov Avinu joh in ana kisaan tai. Yakov chu Eisav umlou kah in apa kom'ah ache'n, Eisav bang'a kisiem in apa aga lhem in, a'upa chan ding dol phattheina chu aga kisan in ahi.
Atileh lungdon umtah khat chu epi ding'a Yitkhak in phattheina chu Yakov hilou'a Eisav joh peh ding agot aham? Chujongleh Yitzkhak chu milham mai mai hilou'a Vaantil tobang leu'a Khakhamim hon asei ahin, chechung chuon'a Thiemgao khat jong hikit nalai ahi. Atileh Yitzkhak chun Eisav phatlou na ho ahet lou mong mong khattou ahidem?
Achung'a dohna ho donbutna chu hiti ahi. Khakhamim hon hitin asei uve: Yitzkhak avinu in Eisav phatlouna leh chonset naho ahetlou tahsang'a aboncha ahetsoh kei ahi. Hinla Yitkhak Avinu in achapa Eisav chu phalou lheh jongleh lungsietna leh ngailutna neitah'a bol'a thilpha lang'a nung kailut ding agot ahijoi. Yishmael jong chu aphatlou lheh vang in apa Abraham in ngailut, lungsiet leh khotona lhingset'a ana bol jih in khonung in alunggel ahinkhel thei in, akisem phat loi. Asopipa Yishmael bang'a achapa Eisav jong ahung kisemphat ding akinep jih'a Yitzkhak in Eisav chu alungsiet leh angailut'a, phatthei na jong Yakov hilou'a Eisav joh pehding agot ah ahi.
Hinla Eisav vang abol ngei ngei abol in adamsung in akisiempha tapoi. Hinla Yitzkhak in Eisav angailutna leh alungsietna jaal in Yakov Avinu chu nivei jen Eisav in atha nading akuon ana suohchai.
Khakhamim hon asei uve: Amasapen ahileh Yakov in apa akuon phattheina akisan jou chun Eisav in Yakov tha ding agon, hinla apa adam nalai jih in ema ana bol tapoi. Eisav in hitin asei'e, "Kapa thi'a, puldou nading phat lhung loi hen, chujou tieng Yakov katha ding ahi" (Bereshit 27:41). Eisav chu aphatlou lheh vang in apa'n alungsiet na vang chu ahai dihpoi. Apa'n etobang in phalou lheh jong leh alungsiet jing akihet in hijih chun apa damlai'a asopipa Yakov atha'a, apa genthei leh lunghem sah ding anompom ahi.
Anina ahileh Yakov ajamdoh achu ahi. Yakov ajam doh tai ti Eisav in ahetphat in guhthim chan achapa Elifaz chu Yakov that ding in asol in, anung adelsah tai. Elifaz in Yakov lampi ah ahin delphan, tha ding agotai. Hinla Yakov toh Elifaz chu Shem leh Eber Yeshiva'a ana kaikhawm hon ahi jihchun Yakov in Elifaz chu ana thujo jou in Elifaz in Yakov that thei talou in, ahing hoi tai.
Eisav bang'a miphalou leh michonse, P-thien jong aumpoi tingam leu khat in achapa Yeshiva akaisah ding chu egel leh tahsan umlou ahi. Hinla Elifaz Yeshiva kaina jih dihtah chu evetleh Eisav lunggel akuon ahipoi. Apa Yitzkhak mitvet'a mipha leh midihtah bang'a akilah thei nading'a Eisav hin achapa Elifaz chu Yakov kaina Shem leh Eber Yeshiva munna ana kaisah joh ahi'e. Ajih chu Eisav kiti pa hi phalou lheh hen lang chonse lheh tajongleh apa Yitzkhak in alungsiet na chu ahaimil lou'a, apa lungdei dei bol jieng mi ahikit'e.
Khakhamim hon hitin asei uve: Mikhat in bolkhel anei'a ahilouleh aphatlouna aum tah jongleh khoutah'a phosaal ding gohih in. Nemchaa'n hil in lang, lungsietna neitah in bol jo'n. Alung ahin hei'a, apha lang ahin nai tieng le vang, lamkah'a ase lang'a akinung hei man lou nading in natha nei jouse mangcha'n apha lang'a kaai nai in. Yitzkhak Avinu jong chun achapa Eisav chu tolthat hat mi, gucha chuleh phatlouna tincheng bolmi ahi ti ahetvang in nemcha leh hepina neitah in aphalang'a nungpui ding anagoi. Eisav vang chu alunggel ema kikhel na umlou in abol ngei ngei akibol in, hinla Yitzkhak Avinu'n Eisav angaina leh alungsietna chu athawn in akile dihpoi. Yitzkhak in Eisav angaina leh alungsietna jaal chun Yakov Avinu ana kihinso lotai.
Shabbat Shalom Lekulam
Eisav bang'a miphalou leh michonse, P-thien jong aumpoi tingam leu khat in achapa Yeshiva akaisah ding chu egel leh tahsan umlou ahi. Hinla Elifaz Yeshiva kaina jih dihtah chu evetleh Eisav lunggel akuon ahipoi. Apa Yitzkhak mitvet'a mipha leh midihtah bang'a akilah thei nading'a Eisav hin achapa Elifaz chu Yakov kaina Shem leh Eber Yeshiva munna ana kaisah joh ahi'e. Ajih chu Eisav kiti pa hi phalou lheh hen lang chonse lheh tajongleh apa Yitzkhak in alungsiet na chu ahaimil lou'a, apa lungdei dei bol jieng mi ahikit'e.
Khakhamim hon hitin asei uve: Mikhat in bolkhel anei'a ahilouleh aphatlouna aum tah jongleh khoutah'a phosaal ding gohih in. Nemchaa'n hil in lang, lungsietna neitah in bol jo'n. Alung ahin hei'a, apha lang ahin nai tieng le vang, lamkah'a ase lang'a akinung hei man lou nading in natha nei jouse mangcha'n apha lang'a kaai nai in. Yitzkhak Avinu jong chun achapa Eisav chu tolthat hat mi, gucha chuleh phatlouna tincheng bolmi ahi ti ahetvang in nemcha leh hepina neitah in aphalang'a nungpui ding anagoi. Eisav vang chu alunggel ema kikhel na umlou in abol ngei ngei akibol in, hinla Yitzkhak Avinu'n Eisav angaina leh alungsietna chu athawn in akile dihpoi. Yitzkhak in Eisav angaina leh alungsietna jaal chun Yakov Avinu ana kihinso lotai.
Shabbat Shalom Lekulam
