Khakhamim hon hitin asei uve: Torah kiti hi kihilna lekhabu ahin thusim kisutna lekhabu ahipoi. Epi thusim hihen, epi thilsuh hitaleh Torah sung'a hung kijihlut taphot chu khonung'a eiho'n umchanpha, chondan leh khandan hoi ho ejil dohthei nading uva ahibou'e. Apha hihen ase hileh khonung'a kihil nathei lou ding taphot chu kijih lut lou ahi. Ajihchu Torah kiti hi khangthu chuleh thusim kisutna lekhabu ahipoi.Achung'a Khakhamim ho thusei kahin taahlah najih pentah chu mi atam jo'n Bereshit lekhabu hi thusim bu maimai dan in ana kigel kha jiy'e. Hinla Khakhamim ho seidan in Bereshit lekhabu sung'a thil kisun hohi thusim maimai dan'a lah ding ahipoi. Khuti tahsang'a Bereshit lekhabu sung'a Epu Epa teu ho chung'a thilsuh hung kijih doh ho akuon eihon Mussar phatah tah, tampitah ejildoh ding uh tihi Bereshit lekhabu doi leh tup pipen ahi. Khakhamim hon asei mabang uvin: Derek Eretz kidma la Torah (Ei pao'a "Umchanpha/umchanhoi kiti hi Torah sang in amasa joi".)
Tuchung E Parasha uva hin Epu uh Abraham ana kihetnapen Midat ha'Khesed (Mihem chanpi khoto thiemna) chungchang aha kimuthei'e. Abraham Avinu Egypt akuon'a nei leh gou ning lhingset'a ahung potdoh jou achu epi ana bol masat pen am eti leh Khakhamim ho seidan in Midbar (desert) laitah achun agilkiel leh adangchah ho ading in Hotel ana bol'e. Hiche a Hotel chu kot li (4) nei - sah leh lhang, jit le vei jouse'a kot khat chiet kihong'a, agim leh achawl jouse akichawl damthei uva, ann jong vaa tah'a aneh nathei ding uva ana bol ahi'e. Chuleh hilai mun'a ann neh leh twi don man chu ejat ahi tadem? Abraham in ahung taphot chu alung nachimset uva avah jiy'a, athilneh man lheng uva ahileh P-thien Min athangvahsah jiy ahi.
Hitichun Abraham Avinu chep tanjou ni 3 lhin ni'n P-thien in ahung viltai. Hiche ni 3 lhinni chu a'chep kitan natkhoh pen nitah jong ahi akitiy. Hijeh chun P-thien in Abraham ding gelna'n Nisa chu nidang sang in hasat in asat sah in. Mihem koima vahle umlou'a, Abraham kom'a hung kingapa ding jong um lou ding, hita chu Abraham in kichawlduo na amu thei ding tia P-thien in abol ahi. Hinla Abraham in Nisa asat lheh vang chun Mihem khat beh kithopi thei ding um khattou ding ham ti'n nisa nuoi achun alhai le le'n, mi ahol tinten nalai'e.
Hiche phat chun P-thien amatah ahung in, Abraham acheptan nat akuon adamdawm leh dawmlou velha ding toh ajin(guest) ding kigawm in ahung vil'tai.
E Parasha uva kijih bang in:
"וַיֵּרָא אֵלָיו יְהֹוָה בְּאֵלֹנֵי מַמְרֵא"
"P-thien ahung kilah'e amapa hieng'ah Elonei Mamre munah..." (Bereshit 18:1).
Khakhamim ho'n asei uve: P-thien amatah bon Abraham cheptan jou'a aphat leh phatlou khuol'a, villhahna anei thei leh mihem damlou khat gavet chu eti loupi hitam. Hiche akuon ahi Bikur Kholim (damlou vet) athupi dan mudoh thei ahi.
"Akhodah'in agah vetleh pasal thum ana ding amu'n, amu mu'in a lamdot ding in alhaidoh paitai.." (Bereshit 18:2) Khakhamim hon asei uve: Amaho chu Vaantil Michael, Gabriel leh Rafael ahi uve. Athum uva chu kin khat chiet nei'a hung uvah ahi. Michael ahileh Yitzkhak pien ding thu Abraham leh Sarah seipeh ding'a hung'a; Rafael ahileh Abraham nat thoh jen dam peh ding; Gabriel ahileh Sodom sumang ding'a hung ahi.
Atileh epi jih'a Torah'a "Nilhah in Sodom'ah vaantil ni ahung lhon'e..."(Bereshit 19:1) tia kijih ham? Talmud, Bava Metzia ah hitin akisun'e: Lot huhdoh nading'a Michael in Gabriel ahin kilhon pi ahi.
Parasha kipatna pasuk evetleh P-thien in Abraham ahung vil'e akitin, aban'a pasuk evet kitleh Abraham in "pasal thum" amu phat in gangchel in "a lamdot ding in alhaidoh paitai" tin akisun kit'e. Khuti ahileh Abraham Avinu chun P-thien in ahung villhah nachu agelkhohlou'a chuleh ema loutheh'a akoi ahidem? Rabbi Yehudah in Talmud sung'a kijih dan in hitin asei'e: Abraham Avinu thilbol akuon eihon ejil doh ding uchu epi ham etileh Jin phatah'a dot/lamtuo kiti hi P-thien S'china (divine presence) lamdot sang in aloupi joi.
Achung'a pasuk kipe teni hi evetleh Abraham leh Lot kibah lou dan akimudoh'e. Abraham hieng'a Vaantil 3 ho aga che u'chun "Pasal thum.." ti'n akijih in, Lot hieng'a aga kilah uva chu evet leh Torah in "Vaantil ni" ti'n asun kit'e. Hiche pasuk teni hi evetleh Lot kitipa hi Abraham sang'a achonphat joh jih'a vaantil hochu ahina dihtah uh "Vaantil" pa'a amuthei ahi tia gelthei khopset ahi'e. Epi jih'a Torah in hitia ajih ahidem?
Achung'a thudoh donbutna Khakhamim ho'n hitin ape uve: Abraham Avinu loupi dan chu Vaantil ho kisan jong ama kom'a aum tieng uleh Mihem tobang bep hi uva. Hinla Lot kitipa vang Abraham Avinu toh te'a lhagao lang'a aniem vaal jih'a Vaantil ho jong a vaantil hinau kilang dehset jiy ahi. Chujong leh Abraham kom'a ache uva chu Mihem dan in che uhen lang Vaantil dan in che tajong leu Abraham in phatah'a ana lam tuo ding'uh, ajen dan leh abol phat dan jong ema kikhel chuom umlou hielding ahi. Hinla Sodom khopi'a Lot muding'a vang chu Vaantil ahinau selmang taleu Lot in phatah ajong ana lamtuo lou ding, Lam jong ana lamtuo lou nahlai maithei ahi. Abraham phatna jaal bep'a asopipa chapa Lot huhdoh ding chu Vaantil ho nuomlou uh ahi. Lot in phatah'a ana lamtuo uva, hiche athilpha bol jeh'a ama leh a innsung miteho akihuhdoh thei ding uh deina jaal'a Vaantil ho'n hitia chu abol uh ahi'e.
Shabbat Shalom Lekulam
