Ma'arat Ha'Machpela hi ehetsa mabang uleh tuchung E Parasha uva jong kijih bang'a Abraham Avinu'n Het mipa Efron kom'a ana choh ahi. Chujong leh hiche mun hi ajinu Sarah vui nading'a ana choh ahi tijong e'he uve. Atileh Sarah E'menu chu eti thi aham? Torah in vang Sarah athi'n, Abraham Avinu chu "ajinu puuldou ding Hebron mun'a chun ahung'e"(Bereshit 23:2) tibou asei'e. Khuti ahileh ajinu thi pet'a Abraham Avinu hoi'a um ahidem?
Midrash sei dan in Sarah chu Satan in ahung lhep lhah'a ana thilo ahi. Parasha masapa achun P-thien in Abraham jah'a Yitzkhak pumgo thilto'a to ding in thu apei. Hiche kin subulhit ding'a pacha teni ache a, aumlou kah lhon chu Satan hung'a Sarah ahung lhep ahi. Satan in Sarah jah'a "Nachapa Yitzkhak athitai" ahung ti keu hilou in Sarah in athusei atahsan cheh nading'a jong Abraham in Yitzkhak chem'a asutlih pettah lim ahung vetsah'e. Athu'a ajah bep hilou'a alim kisan jong amuphat chun Sarah E'menu chu atija vaal in apet pet in athilo tai.
Sarah loupidan leh thienthou dan chu Khakhamim ho'n hitin asei uve: Sarah lim leh melput chu Adam Ha'Rishon achonset masang'a lim leh melput toh akibang in ahi. Chujongleh ajipa Abraham sang in jong Sarah chu gao lang'a athilmu theina asangjoi. Hiche hi Parasha masapa'a Sarah in Abraham jah'a Hagar leh achapa Ishmael soldoh ding'a asei'a kuon mudohthei ahi. Khakhamim ho seidan in hiche Hagar leh achapa Ishmael chungchang thudol'a P-thien in Abraham jah'a Sarah sei dan dan'a abolding'a thu ahil akuon Sarah in ahung lhung ding thilho Abraham sang in gao ah amusao joi ti akihei.
Khuti ahileh hitobang lom'a Tzadika khat chu eti Satan hung'a ahung lhep lah jieng'a, thi lo jieng thei ahidem? Sarah sang'a gao lang'a niem jo'a kisei ajipa Abraham in bon achapa pumgo thilto'a to ding ngapcha'a, akhut tah'a achapa hinkho lah ding kisan jong khoh asah lou leh eti Sarah chu hiche Satan in alhepna achu ding jou lou'a thi lo leu ahi tadem? Phatah'a egel leh khatvei vei tieng Khakhamim ho hi athusei uh hetthiem ahah jiy in ahi.
Khakhamim ho'n achung'a thudoh donbutna chu hitin ape'uve: Hiche hi Abraham leh Sarah koipen gao lang'ah asangjoi ahilouleh aniemjoi titoh akimatna aumpoi. Sarah bep hilou'a Abraham kisan jong chu hiche thilsoh chung chang ahin Sarah dinmun achun ana ding taleh amatah jong thilo ding ahi.
Khakhamim hon asei uve:
P-thien in Abraham jah'a nachapa pumgo thilto ding'a nahung todoh ding ahi ati achu thakhat loupi'a "Yitzkhak chu natha ding ahi" atipoi. P-thien in Abraham jah'a "Nachapa pumgo thilto'a kahieng'a nahin todoh ding ahi" atin, Abraham in "Koi kachapa pen em? Chapa ni kanei'e" atiy. "Nachapa deitah leh iittah pen" tin P-thien in ahin le donbut e. "Ani gel lhon'a ka dei leh ka iit tah ahi lhon'e" tin Abraham in adong kittan ahileh P-thien in " Nateh nung sang'a nahin nachapa chu" atipeh in ahi. "Ani gel'a kateh nung'a kahin hilou ham...koipen ham nasei?"tia Abraham in adohbe kit in ahileh P-thien in "Nachapa dihtah, nateh nungsang'a Sarah in nahinpeh Yitzkhak chu ahi kasei" ahin tipeh tai.
Thu umchan dol evetleh Abraham in apohgeh vaal lou nading'a P-thien in kigel naman phat ana peh ahi'e. Ajihchu P-thien in athu chu velsao lele da tahen lang Abraham jah'ah "Nachapa Yitzkhak chu kei ading'a pumgo thilto ding'a nahin todoh ding ahi" tijieng taleh Abraham chun amihem hina dol'a apoh joulou'a thilo thei ahi'e. Hinla Satan in Sarah ahung lhep'a vang chu kigel naman phat jong pelou hiel'a, thakhat loupi'a "Nachapa Yitzkhak athitai." titoh ajou jou'a abolthu Abraham in Yitzkhak atha pettah gao tobang'a ahung vetsah ahi'e. Sarah chu P-thien'a atahsanna lhahsam jih ham ahilou leh lhagao lang'a akhehsuh jih hilou'a mihem hina dol'a athu jah leh athilmu chu apohgeh vaal jih'a apet pet'a thilo ahitai.
Shabbat Shalom Lekulam
