Lot gaal hing'a akimat thu Abraham in ajah phat in aseijui mi 318 akipui in asopipa chapa Lot huhdoh nading chun gaal aboltai. Khakhamim ho sei dan in hiche achung'a kisei Abraham seijui mi 318 kiti chu mi 318 tah mong mong kiseina ahipon, Abraham innsung jouse vetup'a pangpa, Damascus mipa Eliezer kiseina ahijoi. Hichu eti kihetthei am eti leh "אליעזר" kiti thucheng hi Gematria'a 318 toh akitoh chet'e. Abraham sohpa Eliezer hi apupa Abraham bang'a Tzaddik hija, ahatdan jong mi 318 toh kite thei leu dan ana hiy.
Khakhamim ho khen khat seidan in hiche mi 318 kiti chu mi 318 mong mong kiseina ahinai. Hinla Abraham in gaal bol ding'a ache kuon uvin mi 318 hochu "chonsetna achung'a behlou hiel leh mi kitah bou" tia kholchilna anei leh achaina'a ama toh Eliezer bou chu alhingjou bep lhon in ahi.
Hitichun Abraham toh asohpa Eliezer in Leng 4 hochu ana dou hon in, jo jong ana jou hon in ahi. Midrash'a kijih dan in Abraham leh Eliezer chun akhut hon'a leivui alah hon'a, gaal mite ho lam nga'a athe hon le leivui hochu thalchang kisuh jiy'a, hitia P-thien panpina jaal leh P-thien akuon nes(miracle) jaal'a gaal ajo hon ahi.
Gaal-hing a kikai ho ahin huhdoh jou’a ahung kinung lechun Sodom
lengpa’n Abraham ana lamtuo’n, ajah’a nei leh gou ho adei jat jat akilah ding
in ana seipeh’e. Hinla Abraham Avinu anompoi. Sodom lengpa jah’ah khao jang
khat cha hijong leh kalah louding ahi ana tipeh’e. Abraham in Sodom lengpa jah'a "ejou leh mite ho'n hiche thil ho jih hin Abraham ahaosat loi hinti khau vinte" tin asei'e.
Langkhat'ah tuchung E Parasha uh bulpatna lang e'sim'a ahileh Canaan gam kiel lhah jih'a Abraham Avinu Egypt akumsuh thu akimui. Hiche Egypt gam achu epi thu ana soh am? Sarah chu Egypt ten hoi asah jih uvin alengpa'u ji ding in ana kimat uvin. Hinla ajaan'a Egypt lengpa Paro in Sarah agah naiphei phot phot leh Vaantil khat hung'a Paro chu ahung jep jiy in ahi. Paro in jong Sarah chu ema lothei talou in aum in, chuleh thu um dan akhol tan ahileh Sara chu Abraham jinu ahi ahin hedohtai. Hiche phat chun Abraham leh ajinu Sarah chuleh ahin kilhonpi miho jouse chu agang theipen'a Egypt dalha ding in thu apetai. Hichebep hilou in nei leh gou, sana leh dangka, chuleh gansa tamtah toh jong ahin sawldoh thai.
Atileh Epi jih'a Abraham Avinu'n Egypt gam'a kuon ahung potdoh ding'a chu Paro in apeh nei leh gou ho jouse chu akilah'a, ahivang'a khonung'a Lot aga huhdoh jou'a Sodom lengpan nei leh gou apeh got leh alah nomlou ahidem? Phatah'a egelleh ajih vang chu umtei ding ahi'n, hinla adonbutna vang chu moh hetthei chi ahipoi.
Talmud Masechet Nedarim sung'a kijih dan in Abraham Avinu chun
aneolai peh, kum 3 ahi apat'a, vaan leh leiset chuleh asung'a um jouse hi asiemtu
um'a chuleh thiljouse chung'a thunei leh vaihawm hingjing P-thien um ahi ti ana
kimu dohtai. Hiche lai chu Nimrod lengpa lal lai ana hiy. Nimrod kiti pa chu ama leh ama ana kichoisang in, P-thien dan in jong ana kisei'e. Chuleh tuchung Parasha a "Shinar lengpa Amrafel" kiti hi Nimrod kiseina ahiy ti Khakhamim hon sei uve.
Abraham in leiset chuleh asung thil umjouse siemtu P-thien aum'e ati jih chun meikou sung'ah Nimrod in ana sep lut'e. Hinla Abraham chu atahsa chung ema jong atipon, meikou sung akuon chun atahsa munkhat chajong poplou hiel in ahung potdoh in ahi.
Phat ahung cheta'n, Abraham kum 75 alhin in P-thien in apienna gam dalha'a Canaan gam ajut ding in thu apei. Abraham jah'a P-thien hitin ana kitep'e "Nangma akuon'a nam lientah khat ka tundoh ding, Phatthei kabuoh ding, Namin kaki thansah ding..."(Bereshit 12:2) Hinla Canaan gam alhun chomkhat jouchun kiel nasatah ahung lhung in, agam achun nehdi ema jong ana umtapoi. Khakhamim ho seidan in hiche kiel lhah chu Canaan gamsung bouseh'a lha ahi. Canaam gamsung hilou'a avel lah'a um gamdang ho avang chu neh leh dawn ding ana ning lhingset ah ahi'e.
Kiel lhah jih chun Abraham jong ajinu Sarah toh chuleh anung jui miho jouse jaonan Egypt gam ana juon suh tauve. Hiche lai'a Canaan gam'a ana cheng miho chun Abraham jah ah "Na P-thien in Canaan gam ah che'n, phatthei kaboh ding, kahaosat sah'a nei leh gou ho tamtah kapeh ding nahi ati hilou ham? Tu achu hoiche ham nei leh gou...sana leh dangka ho....." ti'n tot nopna'n ana nei uvin ahi. Hinla Abraham Egypt gam'a ache chun alunggel'ah P-thien akuon nes (miracle) hung umtei ding ahi ti ahei. Hitichun mipi hochu anop nop asei sah in, ahivang'a P-thien tot nopna chang'a miho'n anei uchu apona lheh'e.
Hijih achu Abraham Avinu in Egypt ahin dalhah ding pet'a Egypt lengpa Paro in apeh nei leh gou, sana leh dangka chule gancha hochu P-thien min kidopsang leh kijabol nading'a akilah ahi. Hitia Abraham Egypt gam akuon ahung kinung le'a, nei leh gou ema jouse ning lhingset'a ahung kinung le amu phat uchun masang'a Abraham tot nopna'a ana nei hochu akam uh kikhui bit peh abang uvin a'eodoh ngam khat jong aum tapouve. Abraham Avinu'n hiche nei leh gou Egypt akuon ahin kipoh doh ho mangcha chun P-thien min ana choisang in ahi.
Langkhat lang'a Abraham in gaal abol'a Leng 4 ho aga jo chungchang chu evet kit'a ahileh nei leh gou ho akilah'a, Abraham Avinu'n P-thien min achoisang nathei khat jong aumpoi. Nimrod lengpa leh aloiho chung'a gaal aga jo'a vang chu Abraham in mi jouse hetding'a P-thien min aloupisah ahin. Nei leh gou ho akilah'a kuon P-thien min asuh loupi na ding ema umlou ahitai. Hiche jih pentah achu Sodom lengpa'n Abraham jah'a nei leh gou adei jat jat kilah ding'a asei achu ama'n kengkoh khao jangkhat jieng hijongle lapong kate ana tipeh ahi.
Khakhamim hon asei uve: Hiche Abraham Avinu thilbol akuon eiho'n jong Mussar phatah ejil doh kigot ding uh ahi. E thil bol nalam jouse uva ehet ding uleh egel doh jing ding uchu epi ham eti leh "Tua kathil bol hi P-thien min kichoisangna ding hinam...ahilou leh keima phatchuom nading bou hiya, P-thien min kisuhboh nading ahi khadem?"tihi ahi. Epi hileh P-thien min kisuhboh nading pou chu eima phatchom nading tamlheh jong leh bol lou'a, dalhah jieng ding ahi.
Shabbat Shalom Lekulam
