Parashat Bereshit kichai nalang evet leh hitin akijih'e:
"Ka siemsa mihemte hi leichunga kuon in sumang tang kate; Mihem hihen gamsa hihen......vacha hileh abawn cha'n sumang ta'nge" (Bereshit 7:7)
Hiche achung'a pasuk kipe hi evetleh het hahsa tah khat muthei ahi; Epi atileh Mihem chonset jieh achu P-thien in ahingthei ganhing dang ho jouse jong suhmang ding agot aham?
Rashi'n Midrash Rabbah pansan in hitin adonbut'e: Ajihchu gancha hojieng jong, Mihem titah lou'a, chonse gam uvah ahitai. Gancha jaat khat leh jaat dang khat jong chu kitimat uva, P-thien mitmu'a vetsiet siet'a um uvah ahi.
Rashi'n hitin jong asei'e: Leiset leh asung'a thil umjouse chu Mihem ading'a kisem ahi'n. Mihem akisuhmang tah ding leh ahing thei gancha leh vacha ho jouse ading'a aum man uh umlou ahitai. Hijih achu P-thien in Mihem titah lou'a ganhing leh vacha ho jouse jong asuhbei kigot ahi.
Khakhamim ho'n asei uve: Hiche akuon e'mudoh thei uchu epi ham eti leh Mihem umchan leh khanchan in leiset leh akim vel'a um thilho eti lawm'a asuhkhah/akikhelsah (affect) jou ham ti ahi. Mihem umchan leh khanchan aphatlou leh akimvel lah'a um thil ho jong asuhsiet phah'a. Hinla Mihem ho achonphat tieng leh thilsep jouse jong lhagao lang'a kidomsang jieng jiy uvah ahi.
Hitichun ,tuchung E Parasha uva nung lut kit taleu hen, P-thien in Noakh kom'ah, ama leh a'innsung mite akihuhdoh thei nadiu, Kuong (Ark) asui ding in thu apetai . P-thien in kuong sui ding'a thu apeh chun Noakh kum 480 alhingtan. Kum 120 tah Noakh in Kuong chu asui in, kum 600 ahi'n Twisang let akipan bep'e.
Atileh thukhat kidong tadi leuhen- P-thien in Mihem khat thina thei thilsoh akuon huhdoh ing kate atileh ahuhdoh ding dan tamtah um hilou ham, E atileh Noakh kom achu thildang jong hilou'a Kuong khel khel asui sah ahidem? Rashi'n hitin asei'e: Noakh kuong sui chu kum 120 tah lut ah ahi. Mihem ho'n Noakh kuong sui amu tieng uleh "Epi jih'a hiche Kuong hi nasui ham?" tia adoh uva, chutieng Noakh in P-thien thilguon chu aseipeh ding, cheva kuon'a Mihem hon kisihna ahin neithei diu ahi. Hiche Mihem ho lungsung'a kisihna dihtah ahung um nading deina jaal achu P-thien in kum tamtah lutding'a Noakh chu Kuong khel khel ana suisah ahiy.
Hinla Noakh thilbol amittah'a amu uva, Noakh in P-thien thilgon aseipeh uh anakol uva ajah vang uvin Mihem khatchan tuisang let hung um'a leiset kisuhmang jieng di atahsan pouvin. Kisih nanei tahsang in totnop nachang in Noakh chu anei uve. Khakhamim ho sei dan in Noakh, amatah jong chun Leiset akimoh suhmang dichu atahsan poi. Midrash ah hitin akijih'e: Noakh chun twisang let'a Mihem kisuhmang dichu ana tahsan tah tah theipoi. Twisang let kipat ding kon'a go ahung juh gei in jong Kuong sung achun lut lou in aum in ahileh P-thien,amatah in, kuong sung'a lut ding in anotho leu'e. Tuchung Parasha'a kijih velechun: Pakai in Noakh jah'ah, "Kuong sung'ah hung lut in, Nang leh na innsung mi jouse..." (Bereshit 7:1)
Chujong leh Noakh hi Tzaddik tah beh hinam tijong Khakhamim hon asei buoi uve. Abang khat seidan in Noakh chu amakhang ading'a Tzaddik bou hija, Abraham Avinu khang'a ana peng bang hitsleh Tzaddik ajong kisempha ponte ati'uve. Hichu hoi akon ki hethei am etileh tuchung E Parasha uh evet leh hitin akijih'e: "Noakh chu ama khang ading'a mi kitah leh mi lungthieng.."(Bereshit 6:9).
Noakh in abolkhel kit khat chu epi ham eti leh Kuong asui pet'a mihem ho akisih nading uva P-thien thilgon aseipeh vang in a'mihem chanpiho kisuhmang lou nading in khatvei jieng cha jong P-thien hieng ah ana tao/thum khapoi. Rabbi Menachem Mendel Schneerson in hitin asei'e: Hiche hin avetsah chu epi ham etileh Noakh hin amakhang'a mite ho ana gelkhoh leh ana ngailu tah tah poi ti ahi.
Khakhamim hon asei uve: Noakh chu ama khang ading'a Tzaddik pen, P-thien "mitmu'a midih amabou" (Bereshit 7:1) anahiy. P-thien kom'ah mihem te asuhmang lou'a, akhoto nading in ana thum tale a'taona chu kisanpeh'a, twisanglet jong ana um lou ding ahi. Zohar Ha'Kadosh ah hitin akijih'e: P-thien in Noakh hieng'a Leiset chung'a cheng ahingthei jouse kasuhmang ding ahi ana tichun ama ading bou ana kikhoh sah'e. Abraham Avinu'n Sodom te kisuhmang lou nading'a ana taobeh bang chun ana tao/thum khapoi. Hijih'a hiche Tuisang let chu "Noah twi" (Isiah 54:9 ve'n) tia kisah ahi. Noakh, leiset pumpi kisuhbei lou nading'a atao lou'a, tuisang ahung let'a mihem kisuhmang jieng chu ama mochansah thei khop ahi'e.
Hitichun twisang let ana um tan, Noakh innsung mite leh kuong sung'a um ganhing ho tilou thildang ahingthei kiti jouse P-thien in ana sumang tai. Twisang let kichai nung in Noakh chapate akuon mihem chu ahung pung cheh cheh kit tao vin, masang'a apu apa teu phatlou na ho geldoh lou in P-thien douna'n Babel innsawng saang chu ahinsa tauve.
P-thien douna'a thil abol vang uchun hiche khang mite chu P-thien in asumang pon, akihoumatto nao pao johchu akhen peh in, mihem hochu munkhat'a chengkhawm thei talou in muntin gamtin ah ana cheh gam tau vin ahi.
Khakhamim hon asei uve: Tuisang let masang'a mite toh Tuisang let jou'a mihem hochu anigel uva P-thien douna ana chonse uvin. E atile tuisang let masang'a mihem hochu P-thien in ana suhmang'a, ahivang'a tuisang let jou'a miho chu ana suhmang lou aham? Khakhamim hon hiche thudoh adonbutna uva hin Mussar phatah kihil nathei eihil uve. Amahon hitin asei uve: Tuisang let masang'a mite hochu P-thien leh Mihem kikah bep'a aphatlou uleh achonset bep uh hilou in Mihem leh Mihem, khat leh khat kikah ajong ana phapouvin, anachonse uve. Guchat, Jawnthanghuoi, Kitha kimat, ajihbei a kivetda......leh adang dang ana um'e. Hinla langkhat'a Twisang let jou'a mihem hochu P-thien leh mihem kah'a ana chonset lheh vang uvin, Mihem leh Mihem, khat leh khat kikah avang chun ana chawnpha lheh uvin ahi. Kingailut, kikhoto, kilungsiet, kihepina leh adang dang khat leh khat kikah ah ana um in. Chamdel in kitohtah in ana chengkhom uvin ahi.
Hiche mihem leh mihem kikah'a kingailutna ana um'a, chamdel tah leh kitoh tah'a ana chengkhawm jih uva Twisang let jou'a miteho chu, P-thien leh mihem kikah'a vetdin chonse lheh tajong leu, P-thien in ana suhmang lou uh ahi'e.
Eiho lah ajong hiche Ahavat Khinam chuleh Yirat Shamayim aum nading in P-thien in phatthei eiboh tauhen.
Shabbat Shalom u'Khodesh Tov lekulam
