Parashat Bereshit ahin P-thien in Vaan leh leiset chuleh asung'a um thilho jouse asep thu akisei'e. Zohar lekhabu'a kijih dan in P-thien in leiset ahin sep ding chun Torah ave'n, hiche dung jui achu thil ho jouse ahinsep ahi. Hiche chung chang ahin Midrash Rabbah ajong hitin akijih'e: Torah in hitin asei'e,"P-thien khotthep(artistry) na manchah chu kei kahi". Mihem hon thilkhat sahding aguot tieng uleh athilsah diu lim leh guong, liet leh neo chuleh asah nading thil lut dijat ho kijihna lekhabu khat toh kithuo'a abol jiy tobang uva P-thien in jong Torah avet'a Vaan leh Leiset asep ahi'e."בְּרֵאשִׁית בָּרָא אֱלֹהִים אֵת הַשָּׁמַיִם וְאֵת הָאָרֶץ"
"Atiil in P-thien in Vaan leh Leiset ahin sem'in.." (Bereshit 1:1)
Khakhamim hon asei uve: Torah kiti hi Daan thupeh kijihna bu ahin. Chuleh Shemot lekhabu'a kimu "Hiche lha hi nang ho ading'a lha jouse kipatna hiding..." (Shemot 12:2) , tichu Mitzvat Rosh Khodesh akhu kipan ding dol ahi. Ajihchu hiche Thupeh hi Israel chateho heng'a kipe masapen thupeh chu ahi'e.
Atile epi ding'a "Atiil in P-thien in Vaan leh Lei ahin sem'in" tijoh ahi Torah kipan ahidem?
Rashi'n hitin asei'e: Ajihchu khonung tieng leh Namdang mihon Israel chate ho "Mi Gucha'te, Cannan gamsung'a ana cheng nam 7 ho gam gute" tia angoh thei lou nading uh ahi. Namdang hon Israel chate "Gucha" tia ahin ngoh tieng uleh amahon hita hi ale donbut ding uh ahi,"Leiset pumpi hi P-thien'a ahi. Abon'a ama sepsa ahin. Aman adeisah pen pen kom'a anop nop apehthei. Agam jong hi P-thien in ama deidan tah'a hiche nam 7 hohi anapeh'a, chuleh ama thutah'a anung lahpeh kit'a, kei ho joh eipeh uh ahitai".
P-thien in Vaan leh Leiset chuleh asung'a thil um jouse asep chun, mihem hetthei ding in kisei tale, tha leh jung, gimnathei emacha amangcha poi. Akam mangchan, athu'n aseitho joi. Talmud, Masechet Avot ah hitin Khakhamim ho'n asei uve: Paodohna (utterance) 10 akuon leiset hi kisem ahi.
Hiche Paodohna kiti chu epi ham etileh P-thien in tuchung e Parasha sung uva thilkhat asep'a athu'a agahsei leh ahung kisepdoh jiy khu kiseina dan ahi. Vetsahna'a "P-thien in vah umhen atileh..." leh adang dang... Hinla kidangtah in Torah evetleh hiche "P-thien in.... umhen atile " kiti chu 9 bou aphai. Ahileh Khakhamim hochun eti dan'a 10 aphai atithei u'ham? Torah sung'a la 9 bou akimu thei in, khat akivaat chu epi ahitadem?
Khakhamim hon hitin adonbut uve: "בְּרֵאשִׁית" kiti thucheng jong hi P-thien in Vaan leh Leiset asep'a apaodohna thucheng khat ahi (thilkhat umhen ati toh thakhat). Khuti ahileh hiche laimun ahi "P-thien in umhen atileh" kiti lou'a, epi jih'a "בְּרֵאשִׁית" joh kijang aham?
Adonbutna chu hiti ahi'e: Ivrit ahin "thilsem" kiti hi thucheng chuom cheh 2, Briyah leh Yetzirah, mangchan akisei'e. Briyah kiti chu thilthah khat emacha (aumlou) akuon sepdoh tina ahin. Yetzirah akiti tieng thil aumsa akuon thilthah khat sepdoh tina ahi'e. Atiil achu P-thien in emacha (aumlou) akuon thilthah ahin sepdoh ahin. Hiche baan'a hung kisem hochu ahileh vang thil aumsa mangcha'a thilthah ahinsep ahitai. Hitia kisei bang chun ," Yotzer Or ve Bore Khoshek" (Vah kasiem in Muthim jong kasiem'e. Isaiah 45:7). Chujongleh tuchung E Parasha uh evet leh Muthim um masa'a, chevan kuon achu P-thien in Vah ahinsem doh ahi. (Bereshit 1:2-3 ve'n).Atileh Vah kiti chu Yetzira khat hia, Muthim ahileh Briyah jaat khat ahi'e.
Khakhamim hon asei uve: Thil aumsa akuon'a thilthah khat siemdoh nading'a chu thil ana um sapa noppeh na ngai ahin. Langkhat lang evetleh Emacha/aumlou khat akuon thilthah khat sepdoh nading avang ahileh koima noppeh na ngailou ahitai. Hiche jih achu thilsiem masapen achu P-thien in "Umhen atileh..." ti paodohna ngailou'a thucheng dang tichu "בְּרֵאשִׁית" tijoh aman ahitai.
Khakhamim hon asei na'uva Torah lekhabu thiengthou P-thien in Vaan leh Leiset asep nathu'a akipat hin Mussar phatah eihil nuom uh ahi. Hichu epi ham eti leh Torah jil ing kate eti'a chuleh P-thien thulhung phatah in jui ing katin, P-thien naa phatechan tong ing kate etileh amasapen'a E tahsan ding uchu P-thien in Vaan leh Leiset asiem tihi ahi. Ramban in jong hitin asei'e: Torah hi P-thien in Vaan leh leiset asep na akuon akipat poimo ahi. Ajihchu hiche "P-thien in Vaan leh Leiset asiem'e" kiti poimo dan chu hiche hi P-thien'a Emunah dihtah hung kipatna jung (roots) ahi'e. Koi hile hiche tahsanna neiloupa chun Torah kiti him him aneipoi ti avetsah ahi".
Shabbat Shalom lekulam
Tov
ReplyDelete