Kumkhat sung'a kisim jiy Parasha 54 holah'a tu ahung lhung ding Simkhat Torah/Shemini Atzeret a kisim ding Parasha (Vezot Ha'Beracha) hi Khumash lekhabu khum-khana/chaina chuleh Parasha nukhahpen chu ahitai. Parashiyot 54 holah'a adang 53 ho hi Shabbat ni leh kisim jiy ah ahin. Hinla Vezot Ha'Beracha vang hi Simkhat Torah/Shemini Atzeret ni leh akisim jiy'e. Hitia chu Simkhat Torah/Shemini Atzeret ahi kumkhat sung'a ding Torah sim chaina kinei'a, aban'a hung lhung ding Shabbat akhu Bereshit lekhabu kisim pan kit jiy ahitai.Vezot Ha'Beracha sung ahin alhangpi'n Rabbeinu Moshe'n Israel chateho aphung, aphung dung jui cheh'a phatthei abohna chuleh ama thina chung chang akisei'e. Rabbeinu Moshe thina toh kisai tuchung E Parasha uva kimu pasuk khat veu te:
"וְלֹא יָדַע אִישׁ אֶת קְבֻרָתוֹ עַד הַיּוֹם הַזֶּה"
"chuleh mi koiman akivui namun ahepoi tuni geiyin" (Devarim 34:6)
Khakhamim hon asei uve: Rabbeinu Moshe athi chun P-thien amatah in atahsa chu avui in, mihem ho het ding in aselmang tai. Epi jih'a Rabbeinu Moshe kivuina namun chu koiman ahetlou ahidem? Ajihchu hiche hi P-thien thilgon ahi'e. Epi jih in am etileh alhaan mun chu mihet hitaleh khonung tieng Israel chateho hung uva lunggil tah leh laina tah'a Galut bei na ding in hung tao taleu, Rabbeinu Moshe lhagao chun chunglang'a ataona uh alhut'a, Galut chu bei jieng ding ahi.
Chuleh Mefarshim hon achung'a pasuk ahilchetna uva hitin asei uve: Rabbeinu Moshe kivuina mihem koiman chan ahetlou dan chu Rabbeinu Moshe amatah in jong hoi'a kivui ahi akihetpoi. Achung'a pasuk'a "וְלֹא יָדַע אִישׁ" kitia thucheng "אִישׁ (eipao'a "Mi")" kiti khu Rabbeinu Moshe amatah kiseina ahi.
Hiche "איש(MI)" kiti thucheng khu Rabbeinu Moshe kiseina ahi hoi akuon kihe thei am? Tuchung E Parasha uh bulpatna lang evetleh hitin akisei'e: "משֶׁה אִישׁ הָאֱלֹהִים " (Moshe P-thien Mipa. Devarim 33:1). Chujongleh Torah sung mundang khat ma ajong Rabbeinu Moshe chung chang ah hitin akijih'e: "והאיש משה ענו מאד מכל האדם" (Moshe kitipa chu mihem jouse lah'a mi kineosah pentah ahi. Bamidbar 12:3). Hiche pasuk teni chu evetleh "איש" kiti chu Rabbeinu Moshe kiseina ahi akimuthei'e.
Hinla lungdon umtah chu eti dan'a Rabbeinu Moshe amatah ngel in jong akivui namun akihet lou ahidem? Kabbalist hon hitin asei uve: Ajihchu Rabbeinu Moshe chun akivuina amatah in hetale eiho ama lhanmun'a ega che uva, ega tao seseu jong ngailou ding, amatah kipan'a chunglang'a Galut beina ding'a P-thien kom'a eina thumpeh diu ahitai. Hinla Geulah Shlemah (true redemption) kiti chu etih phat'a ding ham ti P-thien amatah bou in ahet'a, Rabbeinu Moshe in jong ahet lou thilkhat ahi. Hiche Galut beina ding Rabbeinu Moshe atao thei lou nading'a chu alhanmun jong amatah in ahetlou ding'a P-thien in aselmang ahitai. Ahivang'a khonung tieng leh mijouse hetding'a hung um thou thou ding ahi.P-thien chu vahchoi in um tahen.
Abulpat nalang'a esei bang uvin Parashat Vezot Ha'Beracha hi Parasha dang ho bang lou in Shabbat ni'n akisim khapoi. Atileh epi jih'a Parashat Vezot Ha'Beracha Shabbat ni'a kisim lou'a Simkhat Torah/Shemini Atzeret ni khel khel'a kisim ahidem?
Khakhamim hon hitin asei uve: Epi jih'a Miriam thina leh Parah Adumah thu hi Torah sung'a kijawm ahidem? Ajihchu hiche hin thukhat eihil nuom uh um ah ahi. Hichu epi ham etileh Parah Adumah in Mihem buohna leh chonsetna ho asuhthieng bang'a Tzaddik Gamur khat athi tieng jong leh nampi chonsetna leh buohna ho kingaidam'a, kisuthieng jiy ahi.
Khakhamim ho seidan in Hoshana Rabbah (Succoth ni sagi ni) nikho ahi P-thien in Mihem ho chunga thutan achaina'pen (final judgement) anei jiy ahi. Hiche ni lehin Rosh Hashana leh Yom Kippur nikho teni'a thu kitan hochu achaina mong mong ding'a thulhuhna (verdict) kinei kit jiy'a, hitia chu thutanna chu kumlhung ading'a kikhah jiy ahitai.
Midrash ah hitin akijih'e: P-thien in Abraham kom'ah asei'e,"Nachate hon Rosh Hashana ni'a chonset ngaidamna akimu lou uva ahileh Yom Kippur ni leh ngaidamna kapeh ding. Yom Kippur nikho ajong ngaidamna achan hih lai uva jong leh Hoshana Rabbah nileh ngaidamna kipe ding uh ahi".
Khakhamim hon asei uve: Tulai khang'a Beith Hamikdash din tahlou jih'a koi hileh Korbanot(temple a kithoina kin ho) chungchang niseh'a sim jing achu Beith Hamikdash din lai'a Korbanot gabol tobang'a kisim peh ahi. Hoshana Rabbah ahi echung uva thutanna khoutah um jiy ahin. Hiche thutanna munna edin jou nading uva chu E chonsetna hou suhthieng ngai ah ahi.
Chuleh Parashat Vezot Ha'Beracha sunga hin Rabbeinu Moshe thi chungchang akisei'e. Chejih achu hiche Parasha hi Simkhat Torah'a akisim tieng Rabbeinu Moshe thini tobang'a kila'a. Tzaddik Gamur ho thi in nampi chonsetna asuhthieng tobang'a E chonsetna hou jong hiche Parasha kisim hin ei suhthieng peh jiy uva ahi. Hiche jih achu hiche Parasha hi kumseh leh Shabbat nikho hilou'a Simkhat Torah tieng lebou kisim jiy ah ahi'e.
Khazak Khazak Ve'Nitkhazeik
Khag Sameakh lekulam.
