"הַאֲזִינוּ הַשָּׁמַיִם וַאֲדַבֵּרָה וְתִשְׁמַע הָאָרֶץ אִמְרֵי פִי"
"Ngai uvin Vaan teho, thu kasei ding ahi! Leiset in jong jaa hen kakam akuondoh thucheng ho." (Devarim 32:1)
Khakhamim ho'n adong uve: Epi jih'a Rabbeinu Moshe'n "Vaan leh Leiset" ahoupi/akou ahidem?"Vaan" kiti chu epi kiseina hiya, "Leiset" kiti chu epi kiseina ham?E atile Rabbeinu Moshe'n Leiset sanga Vaan teho ahoupi masat aham?
Rashi'n hitin asei'e: Rabbeinu Moshe'n hiche laa ahi Israel te agih'a chuleh asaakhi/hettohsah (witness) ding'a Vaan leh Leiset akou/ahoupi ahi. Rabbein Moshe'n hitin asei'e,"Kei hi phe leh vou mei mei kahin, jing leh thai'a thipai ding kahitai. Khonung leh Israel ten kitepna kasang kha pouve hin titaleu koi hung'a ahung phosal uva chuleh amonau ahung hetsah ding ham?". Hiche jih achu ama'n Israel te hettohsah ding'a beitih neilou saakhi- Vaan leh Leiset- akou ahi.
Rashi'n hitin asei kit'e: Chutahle Israel te achonphat uva ahileh hettohsah'a pang teni chu hung hon'a kipaman ahung peh diu. "Leiset in gaa asuo ding, chuleh Vaan teho'n daitwi apeh diu" (Zechariah 8:12). Hinla Israel chateho achonset tah uva ahileh Hettohsah'a pang teni chun achung uva akhut alhah masat pen ding ahi'e. "Chuleh Ama'n Vaan ho akha'a go julou ding, Leiset in jong gaa asuo lou ding ahitai" (Devarim 11:17). Hiche pasuk ban chet chu velechun hitin akijih'e "chuleh na manthah pai jieng diu ahi". Hichu epi ham eti leh Gaal mite khut'a manthah ding kiseina ahi.
Mefarshim hon hitin ahilchen uve: "Ngai uvin Vaan teho" kiti hi mihem Neshama (Lhagao) kiseina ahin ,"Leiset in jong jaa hen" kiti chu mihem Tahsa kiseina ahi. Khuti ahileh "Vaan" leh "Leiset" akiti vang achu Moshe'n ahoupi chu Israel teho ahikit jel'e. Ajihchu mihem kiti hi a Neshama Vaan akuon hija, Tahsa ahilevang leiset akuon kisem ahi. Chuleh hiche hin eihil uchu epi ham etileh mihem tup leh doi athupipen chu hiche thilni- Vaan leh Leiset- lhagao lang'a jopmat ding tihi ahi.
Atileh Vaan leh Leiset chu mihem in eti akai/ajop mat ding ham? Khakhamim ho seidan in hiche thudoh donbutna hi Yakov Avinu, Bet El munna ajaan gepet'a, amang'a kalbi amu akuon achu hetdoh thei ahi. Bereshit lekhabu'a kijih bang in "Amanglam in leiset'a kuona vaan gei'a kidotou kalbilei khat amun.." Khakhamim hon adong uve,"Hiche kalbi ,vaan leh lei jopmat achu, epi kalbi hi'a, epi kiseina ham?" Adonbutna uchu hiti ahi: Ivrit pao'a kalbi hi Sulam (סולם) akitiy. Hiche Sulam kiti hi Gematria ah 130 ahi'e. Chuleh Sinai (סיני) kiti jonghi Gematria'a 130 ma ahikit jel'e. Chehin avetsah chu epi ham etileh Yakov Avinu'n ajaan mang'a amu Kalbi kiti chu Sinai kiseina ahi. Chuleh Sinai chun Torah avetsah ahi'e, ajihchu epu epa teuvin Sinai muol mai'a Torah ana kisan uvah ahi.
Khakhamim hon asei uve: Khuti ahileh Vaan leh Leiset jopmat nading chu Torah hi ahi. Ajihchu Torah hi Vaan akuon hung kipe'a, leiset chung'a mihem ho THUDIH a chondaan leh khandaan ahung hil ahi. Torah mangcha abou chu mihem in Vaan leh Leiset hi akaimat thei'a, chutieng thienthouna dihtah chu aumsah theibep ahi'e.
Achunglang'a eseisa mabang uvin "Vaan" kiti chu mihem Neshama kiseina hi'a, "Leiset" kiti chu mihem Tahsa kiseina ahi'e. "Ngai uvin Vaan teho" kiti chun avetsah chu P-thien in mihem ahin hil got tieng "nemchaan, kaangtah" in amasapen in a Neshama ahin houpi jin. Hiche P-thien thusei/lungdei chu E Neshama uvin E tahsa uh ahin hilsawn kit jiy ah ahi. Hiche "nemchaa leh kaangcha" kisei thuhi "Vaan ho", tichu E Neshama uvin, a "Ngai" leh E Tahsa'n jong E Neshama nung chu thungaitah'a ajui jieng jiy ahi.
Hinla E Neshama uvin hiche thu hung kisei angai lou tah'a ahileh P-thien in "Leiset" ,tichu E Tahsa uh, ahin houpi jiy'a, chutieng levang "nemchaa leh kaangchaa" thuseina um talou, mihem tahsa chung'a gotna toh kitho'a P-thien in thu ahin sei jiy ahitai.
Hichu ahi Rabbeinu Moshe'n Leiset masang'a Vaan joh ahoupi masat jih. Ajihchu epi ham etileh Lhagao lang toh kisai/kimat thil hohi Tahsa lang toh kisai ho sang'a poimo sah joh ding tina ahi'e. Mihem kiti chun Lhagao lampang'a kithu jona leh kithunun na enei tieng E Tahsa jong chun ama macham cham'a Lhagao nung ahin jui jieng jiy ahi.
Khag Sameakh Ve Shabbat Shalom Lekulam
Shana Tovah u'Metukah veGmar Khatimah tovah.
