Tu ahung lhung ding Shabbat ahin Parasha Ni, Nitzavim leh Vayelech,
akisim khawm'e. Chuleh hiche Parasha teni lah'a Parashat Nitzavim hi kumseh le Rosh Hashanah lhun masang Shabbat ah akisim jingkei
in ahi. Khuti ahileh Parashat Nitzavim toh Rosh Hashanah in kimatna epi anei
ham?
Parasha bulpatna pasuk veta diu te.
"אַתֶּם נִצָּבִים הַיּוֹם כֻּלְּכֶם לִפְנֵי יְהֹוָה אֱלֹהֵיכֶם "
"Tuni nikho ahi nang ho jouse P-kai
na P-thien uh masang'a ding nahi uve.." (Devarim 29:9)
Hiche pasuk'a "Tuni
nikho" kiti hi epi
nikho kisei na ham? Zohar
Ha'Kadosh lekhabu ah
hitin akijih'e: Torah sung'a "ניצב/ניצבים" (stand upright) leh "היום" (today) ti thucheng ahung kiman tieng Rosh Hashanah kiseina ahi jiy'e. Chuleh hiche nikho
(Rosh Hashanah) ahi epi jih'a "P-kai P-thien masang'a ding" kihi ham? Khakhamim hon asei uve: Ajihchu hiche nikho ahi mi jouse, ase apha, alien aneo, ahao avai, aching amol ti umlou'a P-thien in echungthu uh atan sohkei ahi.
Talmud Mesechet Rosh Hashanah ah hitin akijih'e: Rosh Hashanah teng lehin lekhabu thum akihong jiy'e. Khatna chu Tzadikim G'murim ho ading, Anina ahileh Beinonim ho ading chuleh Athumna chu Reshayim ho ding ahi. Tzadikim G'murim hochu lekhabu masapa Hinna lekhabu achu amin uh kijih lut'a, Reshayim ho ahileh athumnapa, Thina lekhabu achu amin uh kikhum'a, hita chu amin uh kinuoimang jiy ahitai. Tzadikim leh Reshayim kikah'a um Beinonim ho ahileh Yom Kippur chan Tshuvah bolna ding phat kipehbe'a, amin uh jong lekhabu nina pa'a kijih lut jiy ahi.
Mefarshim hon ahilchetna uva achung'a lekhabu 3 ho le mihem hina 3 hohi Parasha kipatna pasuk akuon ajong muthei ahi. "אתם ניצבים" kiti thugol'a "אתם" thumal (alphabet) hohi egol tuoh'a ahileh "אמת" jong akoudoh thei'e. Hichu ei Thadou pao'a Thudih tina ahi. "א" chu Ivrit alphabet'a amasapen ahibang'a Tzadikim G'murim hojong P-thien ading'a amasapen'a pang uva, lekhabu masapa'a amin uh kisun lut ahi. "מ" hi ahileh Ivrit alphabet ading'a (Mem sofit, Nun sofit, Pei sofit chuleh Chadik sofit esimtha leh) "amilai" tiding dan ahe. Hichun mihem lah'a Beinoni ho avetsah ahikit'e. "ת" ahileh anukhah pen chuleh Ivrit alphabet kichaina ahibang'a miphalou Reshayim hojong P-thien ading'a anukhahpen hi uva chujongleh lekhabu chainapen, Thina lekhabu achu akichai/abei nading uva amin uh kisun lut ah ahi.
Thudih leh Jou chungchang ahin Khakhamim hon hitin asei uve: Jou kiti hin keng aneipon, ading sot jou jiypoi. Ibn Ezra kitipan hitin asei'e: Epi chu Thudih hi'a epi chu Jou ham ti nahet nuom ale khuol in. Aman asei be na'ah "leiset chung'a mihem hohi thilpha leh Mitzvot boljih'a kisih kahe khapon, thilpha lou bol jih avang khatvei beh akisihlou kahepoi. Khuti ahileh Torah hi thudih tina ahin, chonsetna leh thil phalou bol hi Jou ahibou've". Khuti ahileh achung'a esei uh "אתם ניצבים" kiti thugol'a thumal ho egol toh nunga akoudoh "אמת ניצבים" kiti in avetsah chu epi ham etileh P-thien angsung'a ethu kitan ding'a edin tiengleh Torah leh Mitzvot ho tilou edin det nading'a eihin kithopi thei ding ema aumpoi tihi ahi.
Mefarshim hon hiche abulpatna lang'a kipe pasuk'a "nang ho jouse..." kiti khu hitin ahilchen uve: Mihem
kiti chu aphatseh'a ehina kibang jing lou ahi. Nikhat leh thasetna'a kidim;
jingkal jong kithou ngap jiylou, Taona jong mang ngap lou, chuleh Tefillin leh
Tzitzit hojong vei leh sil ngap lou khop in thasetna'n akidim jiy'e. Hinla nikhat
kuom kuom leh matah'a thou in, Taona ho phatah'a mang in, chuleh Halakha dung
juiya nikhat sung'a Juda khat kimanchah nading'a tuoh leh lawm jouse thanuom
tah in akibol kit jiy in hitichun lhagao lang'ah halna pum dim in akidim jiy in
ahi. Hiche kum khat sung'a nangma
mi hina, lhagao lang'a nahat nikho ho hihen na lhahsam nikho ho hitale,
aboncha "nang ho jouse" chu "tuni
nikho" tichu Rosh
Hashanah ni le hin P-thien masang'a ding uva, hiche "nang ho jouse" dung juiya chu na chungthu kitan jiy
ah ahi'e.
Tu ahung lhung ding Shabbat hi Shabbat dang ho toh akibah lou na khat aum'e. Halakha dung jui achu Rosh Khodesh lhun masang Shabbat seh leh Lhathah nikho leh aphat, apung ho phundohna kinei'a, Rosh Khodesh Brakha jong kisei jiy ahi. Chuleh Rosh Hashana jong hi Rosh Kodesh khatma ahi kit'e. Hinla Rosh Khodesh dangho bang loutah in Rosh Hashana hung lhun ding hi Shabbat nileh Beit Knesset ah phundohna leh a Brakha akisei ngeipoi. Epi jih ahidem? Hiche hi adonbutna ejat ham Rav hon apeu vin, anal dawm leh ehet ding uva lawm ho veu hite.
Rav khenkhat in hitin asei uve: Rosh Khodesh kiphuon doh lou chuleh Brakha kisei lou lo najih chu hiti ahi. Rosh Hashanah tieng lehin Mihem jouse P-thien in achungthu atan jiy ahin. Hitobang ni loupi chu Satan in ahetlou nading'a anikho jong kiphuong dohlou ahi. Ajihchu Satan in Rosh Hashanah nikho chu etih ahiding hetale Israel chateho thutan namun'a lhuh (fall) nading'a thil aguon'a, chuleh P-thien masang'a emo chan nadiu tohgon ana neithei ahi'e.
Donbutna dang khat ahile hiti ahi. Rosh Hashana lhun masang Shabbat ahin lhathah nikho aki phuongdoh ngaipoi. Ajihchu Rosh Khodesh lhun masang Shabbat dang ho achu Eiho'n lhathah nikho ephuondoh uva chuleh Brakha esei uva phatthei eboh jiy uh ahi. Hinla Rosh Hashanah di tieng levang P-thien amatah in Israel chate jaal'a kum lhung kei ading'a phatthei aboh jiy ahitai.
P-thien in phatthei eiboh uhen lang, damthei na, Parnasah tovah chuleh etoh na jouse uva lolhinna toh ei phungvuh taohen.
Shabbat Shalom Lekulam.
Shana Tovah u'Metukah veKhatima Tovah.
She'Nikatev kulanu besefer ha'khaiyim.
