Parashat Shoftim ahin Adih'a Thutan (Justice) poimo dan akisei'e. Parasha bulpatna evet leh hitin akisun'e:"שֹׁפְטִים וְשֹׁטְרִים תִּתֶּן לְךָ בְּכָל שְׁעָרֶיךָ"
"Thutan ho leh Vaihawm ho nangma'n nakhopi kelkot jouse'a nakoi ding..." (Devarim 16:18)
Talmud Mesechet Avot ah hitin akijih'e: Leiset hi thil thum (3) ah ading'e- Adih'a thutan, Thudih chuleh Chamna. Chujongle Mesechet Avot sung mundang khat ma'ah hitin akijih kit'e: Leiset hi thil thum (3) ah ading'e- Torah sim, P-thien naa'toh/kinbol chuleh Thilpha bol.
Khakhamim ho'n thukhat asei uva ahivang'a ajih chuom cheh apeh uchu egel leh hetbai ahipoi. Hoiche pen joh chu dih ah ahitadem ti'a gelthei khopset ahi. Maharal Mi'Prague in ahilchetna'ah hiche achung'a kipe Mishnah teni chu akikal pon, anigel'a adoi kibang ahi. Mishnah masapa chun P-thien in Leiset dinna ding'a avaihop dan asei ahin, ani napan ahileh Leiset dinna ding'a Mihem kimanchah ding dan eihil uh ahi.
Maharal mi'Prague in hitin asei'e: "Pathien naa'toh/kinbol" kiti tohin "Adih'a Thutan" tihi akibang'e. Khakhamim ho seibang in,"Thutan'a pang'ah koi hitale thu ahiding bangtah/dihtah'a tan achu P-thien toh kitho'a (partner) vannoi leiset siem tobang ahi". Taona ho leh Mitzvol kibol ho akon P-thien toh kimatna kisiem bang'a Adih'a thu kitan hin P-thien toh mihem kikah'a kithuokhawmna (partnership) aumsah ahi.
Chuleh Thutan vaihawm phalou chu epi toh kite kah am?Tuchung E Parasha uh evetle hitin akijih'e:
"לֹא תִטַּע לְךָ אֲשֵׁרָה כָּל עֵץ אֵצֶל מִזְבַּח יְהֹוָה "
"P-thien ading'a kisem maichaam phung kom'a nangma'n nang ading'a Ashera thing natu lou ding..." (Devarim 18:21). Khakhamim hon hitin asei uve: Epi jih'a "Adihtah'a Thu tanding" toh hiche "Ashera thing" tulou ding kiti hi kijom aham? Hiche teni kijom hin eihil nuom uchu epi ham etileh Koi hile Thu dihlou tah'a tan achu Maicham phung kawm'a Ashera thing tu tobang ahi.(hiche Ashera thing hi masang laiya milim septhu hou hon ana hou jiy uh Thing jaat khat ahi)
Adih'a thutanna kiti hi eti poimo'a Khakhamim ho'n leiset dinna thil thum holah'a apansah uham? Talmud Yerushalmi ah hitin akijih'e: Adih'a thutanna, Thudih chuleh Chamna kiti hi abon'a thakhat ahi'uve. Adih'a thu akitan tieng lebou Thudih leh Chamna kiti chu umthei pan bep ahi.
Tuchung E Parasha uva kon ahi Mussar phatah jil doh thei aum'e. Mefarshim tamtah ho'n "Thutan ho leh Vaihawm ho nangma'n nakhopi kelkot jouse'a nakoi ding..." kiti pasuk hi ahilchetna uva hitin eihil uve:
"Nakhopi kelkot jouse" kiti hi E tahsa chung'a midang hotoh eki houmat tona/ kijahmat tona, E'mit, E'kam chuleh E'bil ho seina ahi. "Khopi kelkot" ho akuon'na khodang miho toh kikawm matna aum bang'a etahsa chung'a um Mit, Kam chuleh Bil ho akuon'a midang ho toh ki kikawm mat ah ahi'e.
Hiche pasuk in eihil nuom pentah uchu ahileh "etahsa chung'a kelkot ho jouse" hi phatah'a vettup got ding. Amaho akuon'a thil apot taphot hihen alut jouse hitale, achung uva "Thutan ding leh Vaihawm ding" koi suh kei ding, adihset'a ekam akuon hungpot doh thu hohi phatah'a achung uva "vaihawm" got ding ahi.
Shabbat Shalom Lekulam
