"וְלֹא תִקְפֹּץ אֶת יָדְךָ מֵאָחִיךָ הָאֶבְיוֹן"
"Nangma'n na sopi neilal khat kawm'a nakhut nasip chahkheh lou ding" (Devarim 15:7)
Hiche pasuk in aseinom pentah chu e'sopi neilal khat in ekom'a ngaichat nei'a thil ahung thum tahle "ekhut sip chahkheh lou ding", tichu nanei leh nagou na'iit louding, na sopi chu khot gohkeo'a na nung sol louding tina ahi. Aban'a pasuk esim be'le hitin akisun'e:
"כִּי פָתֹחַ תִּפְתַּח אֶת יָדְךָ לוֹ וְהַעֲבֵט תַּעֲבִיטֶנּוּ דֵּי מַחְסֹרוֹ אֲשֶׁר יֶחְסַר לוֹ"
"Khuti tahsang'a nangma'n nakhut nahon peh'a, athil ngaichat chu adeijat tah najahsah ding ahi" (Devarim 15:8)
Khakhamim ho'n hiche achung'a kipe pasuk teni ahilchetna uva hitin adong uve: "na sopi neilal khat kawm'a nakhut nasip chahkheh lou ding" ti'a Torah in asei tah'a ahile epi ding'a pasuk ni'na pa'a "nangma'n nakhut nahon peh ding" atibe kit khel khel ham?"nakhut nasip lou" tah lechun "nakhut nahon" tina hijieng lou?Achung'a pasuk teni chu asei hon kibang hilou aham? Egel leh pasuk ni'na pachu mohseh'a kisun hile akilou in ahi.
Hinla esei jingsa mabang uvin Torah'a kijih thu jouse hin vetsahna anei soh kei'e. Avaal ahilou leh avaat tithei khatcha aumpoi. Chuleh achung'a kipe pasuk teni jong hi Tzedakah chung chang'a huongphal tah'a mi kithopi ding sei hon tajongle apaocheng kimang dungjui'a Torah in eihil nuom uh um ah ahi'e.
Khakhamim hon hitin eihil uve:
Mihem ahung pien lhah tieng alunggel'ah hiche che kabol ding, thil hijat kachoh ding, sum hijat kanei ding, Inn thupitah leh loupi tahtah kasah ding....hiche kei ading...hiche jong kei ading ti lunggel toh ahung pentha ji'n. Ema jouse ama ading tia agel'a midang in alahpeh ding kicha hile kilawm in akhut asim chah kheh jin ahi. Hiche jih ahi naosen ahung pienlhah tieng akhut sim chahkheh pum'a anu naobu apat ahung pot jiy ah ahi.
Hinla mihem athi tieng leiset'a nei leh gou ho ema akipoh thei ding aum jiy tapon, khut goh keu'in akile jiytan. "Veu vin hiche leiset akuon ema kaki pohdoh poi" ti hile kilawm in ahung pien lhah nikho ato kilebul del in akhut kihong pum in alhagao'in atahsa adalha jiytai.
Torah in hiche jih achu "nakhut sim chahkheh" hih'in, tichu nasopi neilal khat kithopina'a chiip tet tut hin in ajih chu nikhat tieng leh "khut kihong" pum'a hiche leiset nadalhah phat hung lhung ding, hiche ni lechun Mitzvot nabol ho chuleh na Tzedakah peh ho tilou, thildang emacha hiche leiset akuon Olam haba'a nahin kilhon pe theiding umlou ding ahi.
Khakhamim hon aseibe nauva: Hiche pasuk teni'n eihil be nuom uchu hiche ahi- E khut hi esip chah tieng evet'a ahile ekhutjung ho abon in asao dan akibang sokei in. Hinla ekhut ehon tieng levang asao chuom, achom chuom aum in, abon chan asao dan akibang jiy tapoi. Hiche akuon ejildoh ding uchu epi ham etile Tzedakah napeh tieng mi jouse na kithopina jaat (sum jaat ham kahepoi) kibah sah sohkei dan. "Nakhut sim chahkheh" hih in tichu nakhut nasip chah tieng nakhut jung ho asao dan kibah suhkei bang in mi jouse chu kibang in sim hih in....."nakhut nahon" tieng nakhut jung asao chuom leh achom chuom aum bang chun mihem hojong chu aneilal dan leh avaichaat dan kibang koima aumpon, hijih chun mi jouse chu ama ama ngaichat dan dungjui cheh in kithopi jon.
Tu Shabbat hi Elul lha lhun masang ding'a Shabbat nukhahpen chu ahitai. Chuleh Parashat Re'eh hi kumseh le Elul lha lhun masang Shabbat ah akisim jing kei in, hiche hi vetsah nei ahi tin Khakhamim hon asei uve.
Hebrew pao'a "ראה"(Re'eh/Ra'ah tia kisim) kiti hi eipao'a seiding hile "ve'n" tina dan ahi. Khakhamim hon hiche thucheng hilchetna apeh nauva hitin asei uve: "ראה" kiti hi raashei tevot (english'a acronym kiti khu) jong ahi'n, hichu "ראה אלול הגיע" (eipao'a seding hile "Ve'n Elul ahung lhung tai" ) tina jong ahi'e. Hichun avetsah chu epi ham etileh hiche Parasha hung kisimna Shabbat apat ahi Elul lha chomloukah'a hung lhung ding ahitai ti egel doh uva, eiho le eiho athah beh'a eki tilkhou ding uh, lhagao lang'a halna leh khahdohna athah beleh'a enei uva, ejo theichan uva eki suh hatbe ding uh ahi. Ajihchu Yom Ha'Din (Judgement day/ Rosh Hashana) lhun masang'a phat enei sun uchu ahitan, S'likhot hihen taona dang ho hileh, chuleh Mitzvot bolna lampang hitale nidang sang'a kihabol jo cheh ngai ah ahitai.
Shabbat Shalom u'Khodesh Tov Lekulam
