Parashat Ki'Tavo ahin Israel chaten Canaan gam aluo tieng uleh ajui diu thupeh poimotah Mitzvat Bikkurim (Gaa masa chungchang) akisei'e. Zohar lekhabu sung'ah hitin akijih'e: P-thien in Torah avet'a van leh leiset asiem ahi. Atileh Torah mangcha'a P-thien in van leh leiset ahin sep ahitah leh ei leh ei kidoh thei dohna khat chu, "Epi Mitzvah hija, apoimo dan chu ama (mitzvah kiseina) jih'a leiset kiseplo ahidem?". Hiche thudoh donbutna chu abang in "Mitzvat Brit Milah" eti maithei uh, abang in " Mitzvat Kibud Horim", abang in "Mitzvat Shabbat..." leh adang dang egel maithei uh ahi. Hinla hiche thudoh donbutna Khakhamim hon apeh uchu egel phahlou beh khat uh ahi'e.
Khakhamim hon hitin asei uve: "בראשית ברא אלקים"( Atilin in P-thien in asiem...) Hiche Bereshit lekhabu kipat na pasuk'a "ראשית"(eipao'a "abul" tiding dan ahe) kiti hi Israel te kisei na ahi. Chuleh van le leiset leh asunga um ema jouse hi Israel te jih'a kisiem ahi'e. Mundang khat ma'ah Khakhamim hon hitin asei kit uve: Hiche Bereshit lekhabu kipatna pasuk'a "ראשית" kiti hi Mitzvat Bikkurim kiseina ahi. Hiche chu hoi akuon kihethei ham etileh tuchung E Parasha uva hin Miztvat Bikurim hi Torah in "ראשית" ti'n akou ve.Van leh leiset chule asung'a um jouse hi hiche Mitzvat Bikkurim jih'a kisiem ahi.
Khakhamim hon "ראשית" kiti hi Israel kiseina ahi atiu chu egel leh hetthiem ahah behpoi. Ajihchu Israel chaten van leh lei chuleh asunga um jouse mangcha'a P-thien ahou uva lhagao langa asuhthieng nading uva thil jouse hi kisiem ah ahi. Khuti ahileh Israel te jih'a thil jouse hi kisiem tithei ahi. Hinla Khakhamim hon Mitzvat Bikkurim jih'a van leh leiset chuleh asung'a um jouse kisiem ahi atiu hi hetbai ahipon, lungdon umtah khat ahi. Mitzvat Bikkurim kiti hi eti lom lom'a poimo leh thupi hiya chuleh Mitzvot dang ho sanga "ראשית" ahina um ahitadem?
Mitzvat Bikkurim kiti hi epi ahi ehetsa uh hijongleh achedan, alhangpi khat veu hite. Theiphung natu tah'a ahileh adaan chu hiti ahi- Kum 3 sung chu Orlah daan in ahuop'a, theigaa chu nehphallou chuleh eima phatchuom nading mong mong'a jah phallou ahiy. Kum 4 alhin tieng ahileh theigaa chu Jerusalem'a nachoi'a Beit Hamikdash mun'a Kohahim ho kom'a nagat lhah ding chuleh hilai mun bou achu kum 4 lhingna theiga chu naga nehthei ahi'e. Hiche daan hi Neta Revai jong akitiy.
Ramban in Mitzvat Bikkurim chung chang'a hilchetna apehna'a hitin asei'e: Mitzvat Bikkurim hi Mihem lungsung'a kithupisahna umho suhbei nading'a kipe ahi. Ajihchu Israel chatehon Canaan gam ahin luo jou tieng uleh Inn ho ahin kisah diu, huon leh thei lei ho ahin bol diu ahin. Amahon khonung tieng leh agam chu amaho thahat man'a alah uh ahin hisah diu, theiphung in gaa ahinse ho jong ama ho natoh haatman jih bep'a gaasuo ahin hisah uva alungsung uva hung kithupisah diu, chutieng chuleh P-kai a P-thien uh ahin manghil diu ahitai. Hicheho umlou nading'a chu Theigaa masa chu kum 4 lhinkum leh kipahtah'a Jerusalem'a Beith Hamikdash mun'a gaki lhat doh jiy ahi.
Alshich HaKadosh in Mitzvat Bikkurim thudol ah hitin asei'e:
Mitzvat Bikkurim ahin kihilna phatah Mussar aum'e. Hichu epi ham etileh mikhat tou in ethil bolna khat'a ehung kithopi tah'a ahileh achung'a kipa ding, chuleh ahin kithopi na chu lien hen lang neocha, seikham lou hita jieng jong leh kipahtah'a hetpeh ding ti ahi.
Theilei ham bol'a theiphung ho vetkol chu thilnom ahipon, chechung chon achu kum 3 sung eima phatchuom nading him him'a jah phallou, Kum 4 lhin kum tieng kisan jong leh Jerusalem Beith Hamikdash mun khel khel'a gachoi'a, Kohanim ho gapeh ding, P-thien masang'a galhat doh ding hikit nalai ahi.
Hiche in eihil nuom uchu theiphung in gaa ahinsuo nading'a natha najung ejaat in seng inlang lal lheh jong lechun nahet di chu nang jih bou hilou'a chung'a P-thien in nahin kithopi jih abou theiphung hochun gaa asuo thei uh tichu ahi. Hijih achu P-thien in nakithopi na chung'a na kipana vetsahna leh hetsahna'a Mitzvat Bikkurim chu nabol ngai ahi'e.
Alshich HaKadosh in asei'e: Mitzvat Bikkurim jih'a van leh leiset kisem ahi kiti in avetsah chu epi ham etileh mi'n ei kithopi na jouse, lien hen neo tale, chunga kipa ding chuleh hetpeh ding ti hi ahi. Chuleh hiche jih pentah ahi leiset kisem ahi'e.
Hilchetna dang khat Mishna, Mesechet Bikkurim akuon kiladoh veu hite. Mesechet Bikkurim ah hitin akijih'e: Bikkurim ading'a thei gaa masa hung kichoi hochu mi haosa hon basket sana ahilou leh dangka'a kisiem ah ahin choi jiu vin, hichu Kohanim ho ahung pe jiy uve. Kohen pa'n thei hochu ala'n, basket chu mihaosapa anung peh le jiy'e. Mivaicha, aneilal hochun basket mai mai, changpawl a kisiem hopou in theigaa chu ahin choi jiy uvin, Kohanim ho ahung pe jiy uvin ahi. Hinla Kohen pachun atheigaa bep hilou in theigaa hung kichoi na basket jongchu akilah in, mivaicha pa chu athei hinchoina bawm chu anung peh jiy tapoi.
Epi jih achu Kohen pachun Mihaosapa thei hin choina bawm chu anung peh jiy'a aneilal pa achu anung peh jiy lou ahitadem? A Haosapa achu nung peh da henlang, avaichpa ajoh chu nung peh leh kilawm jo hilou ham? Rav khenkhat in hitin adonbut uve: Mi haosapa chu atheigaa hinchoi na bawm kinung pe chun avetsah chu ahileh kumkit lejong tukum bang in hung vangphan lang nabol najouse ah tukum bang in lolhing in tina ahin. Mivaicha pachu ahileh avang akile'a, kumkit leh tukum sang'a avang ahung hoicheh'a anatoh athilbol ho'a ahung lolhin nading'a atheigaa hinchoi na bawm chu kinung pehlou ahitai.
Hiche achunga hilchetna chu adihnai, hijongle Rav adang khenkhat in hilchetna chuom beleh, naltah khat hitin ape uve: Mihaosa kiti chu neh le chah, soh le sal, chuleh natong ding mi alhingset'a anei ahin, hijih achu atheiphung hojong chu phatah'a avettup thei ahi'e. Khuti ahile atheigaa hojong chu hoi thei ding, ase tijong um behlou ding tina ahi. Hinla khat lang'a veleu hen mivaichapa chu eti tam? Avaichat leh aneilal jih achu atheiphung hojong phatah'a avettup joulou, atheigaa hojong hoijou jiylou ahitai.
Mi haosapa chun atheigaa hochu jachatna ding neilou hiel in ahin choi thei in, Mivaicha pa'n ahilevang atheigaa hochu mihaosapa abang'a hoi ahilou jih chun min mun khante ti'in ahoilou deu sese chu basket to'lang ah akoi in, ahoi dawm diu hochu achung lang'ah apansah jiy'e. Kohen pa'n mihaosapa theigaa hinchoi chu ala'n theiga bawm chu anung peh jiy tai. Hinla mivaichapa achu ahileh milah'a akisuh jachat nalou ding leh aki jumsuo lou nading ti'n theigaa hochu abawm akuon suodoh lou in, athei ti abawm ti abonchan akilah jiy tan, Mivaicha pachu athei hinchoina bawm chu anung peh jiy tapoi.
Hiche hi ahi Khakhamim hon Mitzvat Bikkurim jih'a van leh leiset chuleh asung'a um jouse P-thien in asiem ahi atilo najih uh. Ajihchu epi ham etileh E mihem chanpi khat milah'a suh jachat louding kiti hi thil jouse ading'a a "ראשית" ahi. Chuleh koi hileh a'mihem chanpi khat suh jahchat lou nading gelkhoh'a chuleh ahithei chan'a panla ah mipa/minu jaal'a hiche leiset leh asung'a um jouse hi kisiem ah ahi.
Shabbath Shalom Lekulam
(Tuchung Parasha Shavua hilchetna hi HaRav Yonah Metzgar in Drasha apen na akuon a atam jo hung kile doh ahi)
