Levi teho kin le natoh akuon hi Mussar phatah-Mitzvah bol nading'a ejo thei chan le ebol thei chan bolding apoimo dan mudoh thei in aum in hijih chun adang dang sang in hiche Levi ho natoh chung chang hi chomcha sei ute.
Parashat Bamidbar kichai nalang achun Levi ho mijaat kisim na le Levi teho lah'a Kohat innsung kuon ho kin le anatoh ding uh akisei in, hichu ban jom in tuchung E Parasha uhi Levi teho lah'a Gershon innsung kuon ho kin le anatoh ding uva akipan in ahi.
Levi teho kisim nahi evet le Israel sung'a phung dang ho bang lou in achuom cheh in ahung kuon na'u Innsung dung jui in akivel sim kit uvin ahi (Levi chapa 3 ho Gershon, Kohat, le Merari innsung kuon dungjuya akivel sim uve). Parashat Bamidbar achu Levi pasal, naosen lhakhat chung'a lhah achunglam jouse, jaat akisim in. Tuchung Parasha ahi ahile pasal kum 30 apat kum 50 chan, natong thei ho bou, avel in akisim kit in ahi.
Khakhamim ho seidan in Shabbat seh'a kisim jiy Parasha hohi amachang'a lekhabu khat tobang ahi. Vetsahna: Parashat Yitro ham, Parashat Tzav ham kahepoi...epi Parasha hitale Parasha khat khu Lekhabu khat tobang ahi'e. Khuti ahile tuchung Parasha kipatna, Gershon innsung kuon le Merari innsung kuon kin le natoh khu Parashat Bamidbar'a um didol hile kilawm jo hilou aham? Levi suon le chilhah ngensen chula ahiuvin, eti dan'a Gershon innsung kuon kisim na chule anatoh ding ule akin ho'uh tuchung E Parasha uh bulpatna'a hung pangthei aham?
Levi tehi evetle ahung kuondoh na'u apao innsung dungjui cheh in akin uleh anatoh ding u'jong achuom cheh in ahi. Kohat innsung kuon natoh ding chu ahile Kodesh Ha'Kodashim toh kisai ahi. Ama hochun Aron Ha'Kodesh, Menorah, Mizbeakh chule adang Kodesh ha'Kodashim aum thilkeo ho ngahmun khat apat ngahmun dang khat'a apuh leleu jiy ahi'e.
Merari innsung kuon ho kin le anatoh diu chu ahile alhangpi'a seidi'n Mishkan'a kimang khuom ho puh lele ding chule vettup ding ahi.
Gershon innsung kuon ho kin le natoh chu epi hitam le? Khakhamim ho seidan in Gershon innsung kuon ho natoh chu Kohat chilhah ho le Merari chilhah ho thilbol kikah achun alha'n ahi. Kohat sungkuon le Merari sungkuon hohi anatoh ding uh kichih tah'a kisei peh'a ahiuve.Gershon chilhah Levi hochun Mishkan kisahna'a pang puon ho chule thildang Kohat te le Merari teho bol lou jouse abol uva chule "vet jong avettup diu" ahi. Ama hohin Israel te ngahmun akichuon ding tieng le Mishkan chu aphiet jiy uva chule ngahmun thah alhun tieng ule athah tundoh kit jiy uh ahi.
Levi teho natoh kihop nahi velechun Kohat chilhah ho natoh hi aloupipen'a gel thei ahi. Torah kisan ajong hitin akisun'e ,"Kihouna inn'a Kohat phung mite natoh ding chu thil thieng chungnung ahi"(Bamidbar 4:4). Mishkan sung'a athiengthou dehset hole apoimo dehset hochu Kohat techun avetkol uva ahi'e. Chukitleh Merari chateho kin le anatoh uchu evetle Mishkan tundoh nading'a poimo ho leh von agih deu sese ahikit in ahi. Gershon innsung kuon hochu vang apoimo vaal jong hilou, apoimo lou jong hidihlou, alailah'a hita chu boldi ngai jouse bol'a kisa buoi uh ahi'e.
Gershon innsung kuon ho thilbol chu apoimo nai hijong le mikhat chu thilkhat kibol naham, ahilou le naa kitohna hamkhat'a abolpen tah kichih chet umlou'a alai lah'a alhai lele'a, avaat ho subulhit pou'a akisah buoi le achaina tieng mi vetding in ema boldoh jong neilou toh akilou jiy tan ahi. Miho vetding bep hilou in Amatah lunggel kisan ajong ema boldoh neilou ahiloule panna neilou bang in kigel setna ahung umkha jiy in ahi.
Hiche ho jih achu E Parasha uhi hiti ahi kipan ahi.
" נָשׂא אֶת רֹאשׁ בְּנֵי גֵרְשׁוֹן גַּם הֵם"
"Gershon chapate ho jong amijaat sim'in......". "Naso eth Rosh" kiti hi Bible pao'a "mijat simding" tina'a kimang ahivang in aseidoh nuom dang jong um ah ahi'e. "Naso eth Rosh" kiti chu "Alu (head) uh dopsang peh in" tia jong lahthei ahi. Hichu ahi hiche Parashat Naso kipatna Pasuk hin eihil nuom uchu: Gershon chapate chu akigel siet nalou ding uvin "alu uh dopsang peh in". Chule "גם הם"(eipao'a "amaho jong") ti hung jao hin eihil nuom uchu Kohat chapate ho natoh chu loupi lheh jong le Gershon chapate ho natoh tochun apoimo dan akibang thou thou in ahi. P-thien in Moshe kom achun hitin asei'e," Kohat chapate ho kisim bang achu Gershon chapate ho jong chu sim in ajih chu akin ule anatoh ho uchu apoimo dan akibang in ahi".
Chujongle Gershon chapate ho mijaat kisimna E Parasha uh bulpatna'a apan in avetsah nuom kit chu hiche ahi: Kohat chapate ho natoh chu Gershon chapate ho natoh toh te'n mihing mitvet ding in athupi lheh nai. Amaho chun Kodesh Ha'Kodashim athil umho, Mishkan sung'a um thil um athieng thou dihset ho vekol ding in apang naove, hijeng jong le Gershon chapate ho pottho naleh gunchu najaal in Levi phungkhai dang ho chan joulou khat achang uvin ahi. Hichu epi ham etile Parasha khat(tuchung E Parasha uh) chu amaho jaat kisim namin ah akikou/akisah tan ahi.
Shabbat Shalom lekulam
(Tuchung Parasha hilchetna hi atamjo Ha'Rav Adin Steinsaltz lekhabu sut "Khayei Ha'Olam" kiti apat kahin ledoh ahi. Avat aumkhah le kihe thiem ute)
