Rashi in hitin asei'e: Nesi'im ho'n pumgaw thilto ahinto'u tohin Aharon Thiempu pa'n Menorah adet ding thupeh hi epi jih'a kijom aham? Mizbeakh kithiensuo na ahin Levi phung tilou phung dang jouse'n pumgaw thilto ahin toh uvin ahi. Aharon le achapateho, chujong le Levi phung ho'n ema ahin toh tapou ve. Hijih chun Aharon alung himaw'n, " Lhinlalna kanei'a chule kei thipmo jih'a P-thien in Levi phung akuon pumgaw thilto ema asanlou khat hinte" tin akigel sei. Hichun P-thien in Moshe jah'a Aharon alhamuon ding chule aheng'a hita hi aseipeh ding in thu apei,"Kicha hih in, Keima'n nang ading in hiche hosang'a(pumgaw thilto hosang'a) thil loupijo kakoi peh'e....Nangma'n Menorah nadet ding ahi. Pumgaw thilto hochu Beith Ha'Mikdash din laise bou kitoh ding ahi'n, Thaomei vang hi beitih neilou'a vah ding ahi".
Hinla achung'a Rashi hilchetna hi kichih jou salou in Ramban in hitin dohna abol'e: E atile P-thien in Aharon chu thildang jong hilou'a hiche Menorah adet nading khel khel ahi alhamuon ahidem? Ketoret (gimnamtui kihal) jih ham, ahilou le Yom Kippur nikho'a Kohen Gadol natoh le kin jih ham, ahilou jongle Levi ho jouse P-thien natong ding'a akichuom lhendoh jih ham....leh adang tamtah lhamuon nathei um ah hilou ham? Chujongle detmah umtah chu Beith Hamikdash kisuh set nung'a chu Pumgaw thilto bep hilou'a Menorah jong kidelou ah hitalou ham?
Ramban in hiti hin athudoh donbutna apei: Hiche, P-thien in Aharon alhamuon na Menorah hi, aphatlai'a Menorah bep hilou'a khonung'a Aharon suon le paah Hashmonaim(Maccabee te ho) hon 2nd Temple suhthieng nading'a adet'uh Thaomei chu kisei na ahipeh in ahi. Hiche akuon achu kumseh le Khanukah thaomei hung kide jing'a, hita chu akhang akhang'a Thaomei vah chu mitlou ah ahitai. Hiche jih achu P-thien in Aharon chu thildang hilou'a Menorah achu ana lhamuon ahi.
E Parasha uva hin Menorah kisiem ding dan jong akisei in ahi. Menorah kisep dan chungchang ah Midrash Rabbah ah hitin akijh'e: Mishkan sung'a kimangcha thilkeo ho jouse lah'a Menorah sepdan hi Moshe'n het hahsa asapen in ahi. Hichun P-thien in Moshe chu Menorah sep ding dan abul apat atawp gei, abon in avetsah in ahi. Hichun Moshe'n Sana lhang chu sehcha'a akhet le alim le aguong ding hochu ama le ama ahung kiguong doh jieng in ahi.
Khokmei Mussar ho seidan in Menorah kisepna akuon hin Mussar phatah jildoh thei ahi. Anuoi'a Pasuk hi Menorah kisepna toh kisailou hijong le vetadiu te.
"עֲשֵׂה לְךָ שְׁתֵּי חֲצוֹצְרֹת כֶּסֶף מִקְשָׁה תַּעֲשֶׂה אֹתָם וְהָיוּ לְךָ לְמִקְרָא הָעֵדָה וּלְמַסַּע אֶת הַמַּחֲנוֹת"
"Japi koukhawmna le ngahmun chawn ding tienga muut ding in dangka thiih in sumkawn ni kheng in" (Bamidbar 10:2)
Hiche Pasuk hi evetle thupi jildoh ding umlou hile akilawm in hinla Khakhamim ho seidan in hiche Pasuk ahin Mussar phatah le poimotah khat akiselgu'n ahi. E Parasha uva kimu dan in Sumkawn kimut chun japi kikou khawmna chule ngahmun chawn phat ho mipi ho ahetsah ji'n ahi. Moshe'n phung lamkai ho akou khawm nuom tieng ahilou le mipi jouse kisuhkhawm ding tieng le sumkawm kimut jiy ah ahi.
Khakhamim ho seidan in Sumkawn chun Manhigut (Lamkai hina) avetsah in ahi . Chujongle Sumkawn chu eti kisep ding ham? Rashi'n hitin asei'e: Kesef Miksha (Dangka Lhang) apat,tichu akisepna ding dangka chu lhangkhat bou hiding achule khut'a kikheng hiding ahi. Tulai'a thil akisep tieng ahal hal'a kilakhawm'a kijop khawm tobang hilou ding, Dangka lhangkhat apat khut'a kikheng hiding tina ahi'e.
HaRav Yonah Metzger in hitin asei'e: Hiche Sumkawn teni kisepna chungchang toh kilou tah hi Torah sung'a thildang Ni kisepna ajong muthei ahi. Khatna chu Menorah ahi'n chule Anina chu Cherubim teni ahi'e. Torah velechun Menorah kisep na ding ajong "Miksha Jahav" (Bamidbar 8:4) akitin chukit ma'le Cherubim teni kisepna ding jong chu "Jahav Miksha" (Shemot 25:8) aki tikit'e. Hiche akuon hetthei chu Menorah toh Cherubim teni jong chu Sana Lhang/Tum khat apat khut'a kikheng tho ahilhon'e.
Atile ei le ei kidong tadi leu hen, Epi jih'a Menorah, Sumkawn chule Cherubim ho kisepna thil hochu "Miksha" ahingai khel khel aham? Tulai athil kisiem hobang'a ahal hal in kilakhawm henlang kijopkhawm le hahsatna beihiel'a nuomtah'a kibol doh ding, asiem ho ding'a jong beijo lou ding ham.
HaRav Yona Metzger in hitin achung'a thudoh ho adonbut'e:
Hiche akuon hi Mussar poimotah ejil doh guot ding uh ahi. Sumkawn, Menorah chule Cherubim ho kisepna thil chu velechun abon cha "Miksha" ahingai ahi. Miksha (מקשה) kiti thucheng chu evetle Ivrit'a Koshi (eipao'a "Hahsatna") chule Kashu'ak (eipao'a "Milungtah") hotoh ahung kuonna (Ivrit'a "Soresh") akibang suhkei in ahi ("קשה" akuon ngen ahi).
Esei mabang uvin Sumkawn chun "Lamkai" hina avetsah in, chule Lamkai kiti chu thil bai ahipoi. Chule Sumkawn teni kisepna Dangka "Miksha" ahingai bang'a Lamkai kiti jong chu khatvei khatvei tiengle "Milungtah" akiso jiy ngai ahi. Lamkai ahiman achu mi jouse lung ahol'a, aphatseh'a mi sei jouse anop pehding tina ahipoi. Khatvei khatvei tieng koima mai velou'a aphapa le adihpa bou chu apechah'a thildang hochu ngamtah'a aphosal ding joh ahi.
Khakhamim ho seidan in Menorah hin Torah avetsah'e. Chule Menorah "Miksha Jahav" apat kisep hin eihil nuom uchu hiche hi ahi: Torah jil kiti jong hi thil hahsa tah ahin, asung'a thu kiselguh ho, Halakha ho, Pirushim ho jong moh hetbai thil ahipoi.Tahsa lang hihen lhagao lang hitale hahsatna tampitah aum in hinla Torah sim kiti chun alung alhahsah louding, alung "asuhtah'a" (Ivrit a "קשה" tihi eipao'a "atah" tina jong ahi'e) aki hambol ngai ahi. Khuti lebou Torah hetthei na dihtah chu umpan bep jiy ah ahi'e.
Athumna pa Cherubim teni hi alim lhon naosen melpu hi'a chule lhaving nei ahilhon'e. HaRav Yona Metzger in aseina'ah hiche Cherubim teni kisep na "Jahav Miksha" ahingai apat ahi Khinukh Yeladim (Chapang khoukhah dan) toh kisai thil poimo tah jildoh thei ahi. Rav pa'n asei na'ah Chapang khoukhah na ajong hi "Lungtah" ngai ahi. Chapang in adei le angai chaat jouse chu bolpeh ding ahipoi, hiche tahsang achu nacha chu deilheh in duot lheh jong lechun asei jouse nanop peh ding ahipoi. Pho angai le napho ding, Bolkhel anei tah'a gotna peh angai tah hiel jong le chapang kiti chu aphat nading'a amatoh kituh gotna peh ding ahi. Naki lungnem sah'a asietna ho le aphatlou na ho naki hetmosah ding ahipoi. Hitia chu naki "Lungtah" sah'a chapang chu aphatcha nakhoukhah ngai ahi.
Shabbath Shalom Lekulam
