Behar kiti hi eipao a seidi hile "Muol'a" tina ahi. Ehetsa mabang uvin hiche muol hi Sinai muol kiseina ahie. Torah sung'a kisun Mitzvot hokhu atam jo Sinai muol'a Israel te'n P-thien akon ana kisaan uh ahi. Hijieng jongle Torah velechun Mitzvot ho kipeh na'ah "Sinai muol'a" tin akisei khel khel poi. Hinla hiti chu hilou in tuchung Parasha evet le Shmita toh Yovel daan kipeh na ahin vang "Sinai muol'a" tin achuom beleh in akisei in ahi.
Shmita daan hi evet le Mitzvah dang ho bang lou in Torah ah achien, achaai in eiki hilchet peh uvin ahi. Vetsahna'n, Tefillin chu Torah in navei ding uh ahi atin hinla Etobang ham Tefillin chu, Epi'a kisiem ham, Eti vei ding ham......le adang dang ahilchien poi. Ahilchet na hochu Torah She'Be-al'peh bou akon hetthei ahi. Shmita daan hovang kichih sel'a Sinai muol'a chu ei kihil uh ahi'e.
Rashi'n hitin asei'e: Shmita toh Sinai muol in epi kimatna anei ham? Mitzvot dang ho jong Sinai muol'a kipe hilou ham? Hiche akon hetthei chu Shmita daan Sinai muol'a akipeh'a chule achien, achai'a adaan ho aki hilchet pai pai bang ahi Mitzvot dang ho jong Sinai Muol'a hung kipe'a chule Sinai Muol mama'a ahilchetna hojong kipe paipai ahi.
(Written Torah bep hilou'a Oral Torah jong Sinai Muol'a Moshe'n P-thien akuon ahin lah ahi kichehna khat ahi'e.)
Rashi donbut na chu achamkim jou salou in Mefashim tamtah hon hiti'n dohna asiem uve: Khuti ahitah jongle epi ding achu Shmita daan khel khel chu Mitzvoh dang ho thakhel'a kichuom lhen aham? Shmita daan hi eti lawm lawm'a Mitzvoh dang ho sang'a gachang chuom (kibanglou) ham?
Khakhamim hon asei uve," Mitzvot ei kipe jouseu hi thildang di ahipon P-thien'a Emunah enei thei nading uh ahi'e". Emunah poimo dan chu Rambam lekhabu jih Sefer Ha'Mitzvot ah P-thien'a tahsanna dihtah le dettah neiding chu Mitzvah masapen in apang in ahi. Rambam seidan in Koi hile Emunah dettah neipa bou chun Mitzvot hochu phatah'a asuh bulhit bep ding ahi.
Khakhamim hon asei uve: Mitzvah dang ho jouse sang in Shmita ahin Emunah angaikhoh le apoimo dihset in ahi. Gel tiem lechun, Kum khat nalou nakichol sah tai, akum kit in nalou nalhou in thiltuo pan talechun nalou gasuoh chu akum 3 nabou'a naneh pan di tina ahi. Kum ni sung nalou gasuoh naneh lou di tina ahi'e. Eti ahahsat tadem? Masang lai dihset achu mi atamjo lou gasuoh bou'a ana kivah ngensen tobang ahi'e. Hinla P-thien amatah akitiem in Israel te'n ama atahsan uva ahile hiche kum Ni sungse achu Israel te nehding niengset'a apeh ding ahi.
Khakhamim hon ahilchet be na'uva hitin asei uve: Torah chu E atile Israel gamsung hilou'a neldi gam achu Israel te kipe ahidem? Ajihchu Israel chate Torah tilou thildang emacha'a akisuh boi nalou ding uh ahi. Sinai neldi gamthip gam'a Israel chate kum40 ana vaaithaam sung uva chu P-thien in aneh ding uh Manna niseh'a ana peh'a amaho'n Torah bou ana sim uh ahi'e.
Mitzvah dang ho banglou'a Shmita le Yovel chung chang'a "Sinai Muol'a" tia ahung kisei chuom hin eihil nuom uchu hiche hi ahi: Israel chate chu agam uva ahung chen tieng ule Kum 6 sung lou alho uva, naa atoh diu , hinla Kum 7 lhin kum levang anatoh jouse'u adalhah ding uh ahi. Sinai neldi gamthip gam'a aumlai bang uva P-thien in amaho nehding avaalset'a apieh'a amaho jong "Sinai Muol'a" bang achu Torah bou'a kisabuoi ding uh ahi'e. "Sinai Muol'a" tia akichuom sei hin P-thien thilpha bol ho ageldoh sah uva amaho'n Shmita kum le epi kaneh ham tia gellou'a chule a'Emunah uh alhahsam sahlou ding uh ahi.
Shmita mitzvah niit apoimo dan chu Khakhamim hon hitin asei uve: Epi jih'a Galut um ham? Shmita kum ahiding bang tah'a kiniit lou jih ahi. Shmita ahiding bangtah'a niit lou'a aum'a, agam in kichol na amu lou tieng gamsung'a gaal um'a, acheng teho gaal'a kikaai mang'a hitia chu agam in kichol na akimu thou thou ahi'e.
HaRav Moshe Alshich, Alshich HaKadosh tia jong kihe, in hitin asei'e: "Yakov toh kakitepna, Yitzkhak toh kakitepna...........agam leisiet jong ka geldoh ding ahi"(Vayikra 26:42) Hiche pasuk akon Shmita poimo dan hetthei ahi. P-thien in Epu Epa teu toh kitepna ana siem ho ageldoh tieng Galut akuon'a amite Israel teho agam'a nung pui ding ati jiy in hinla agam(Eretz Israel) ahin geldoh tieng (Shmita le Yovel ho ahiding bangtah'a ejuilou ho'u) anung kiih jiy tan ahi. Hitia hi Galut hi kichai thei lou ahi'e.
P-thien in agam ahin geldoh tieng le Galut akuon'a agam eihin nungpui diu anung kiih jiy ahitahle agam in Israel teho hung kile di adei lou ahidem? Khakhamim hon asei ule agam leisiet in gaa(fruit) asuo hoi le hoilou chu agam'a cheng Israel teho ah akingam in ahi. Rashi'n hitin asei'e: "nagam uchu ahawm keu'a kijam ding ahi" (Vayikra 26:32) tihi sapsiet na hitah sang'a phatthei najoh ahi. Israel chate agam'a achen lou ule agam leisiet chun gaa asuo lou ahitai. Hitia chu jatdang, namdang ho cheng nuom ujong le cheng theilou uva, Israel chate ho ahung kile kit nading'a agam chu hita chu ahawm keu'a um jing jieng ahi tin Rashi'n asei in ahi.
Atile agam chun epi adei ahitadem? Midrash Rabbah in adonbut na'a tekahna khat ape'n ahi: Lengpa khat hin cha pasal thum anei in, avekol ding uvin ama jenle apang khat akoi in ahi. Lengpa chun achate dam hinam, pha pha uh hinam ti'a mi adoh tieng, ajenle uva pangnu jong chu dam'a hinam chule phajing'a hinam tin adong jingkei in ahi.
Lengpa chapa ho vekol'a pang nu chu "Israel gam le leisiet" ahi'e. Chule amanu chu Lengpa'n ama jenle'a apanna akon achapate vekol ding'a ahinsol ahi. Amanu chu Lengpa umlou na'a leng chapate ho ading'a Lengpa thakhel'a um ah ahi'e. Leng chapate hon avekol nu'u chu anuoise uva le apa'uh anuoise uh ahin, jaa tah'a abol uva le apa'uh ajaa uh avetsah kit in ahi.
Chetobang chu ahi Israel chate le agam leisiet kimatna jong chu.P-thien in agam thieng chu eiho ei vekol ding uva eipeh uh ahin eihon jong jaa tah'a ebol ngai uh ahi. Khuti ahilou tieng agam in eihin luhdoh jiy uh ahi'e. Hinla Israel gam le leisiet chu achateho phamo lheh jongle, amaho bei in ading jou jiy pon ahi. Israel chateho hung kilekit ngah in agam gaa jong umlou in "ahawm keu in akijam" jiytan ahi.
Khakhamim hon asei uve: Israel te agam uva ahung kile uva, Israel gam le leisiet in gaa ahinsuo tieng Messiah lenggam anaitai tihe'n.
P-thien in phatthei eiboh uhen lang Israel nam 10 avahmang se jong agam ah hung kile loi loi uhen. Chule E sopi ho'u India'a umlai hojong agangthei lam in agam ah hung kile kit tau hen.
Khazak Khazak Venitkhazek.
Shabbat Shalom Lekulam
