Parashat Emor ahin alhangpi'n Kohanim ho thienthou nading daan toh Phat tepsa Kut Sagi ho chung chang akisei in ahi. Kohen kiti chu Beith Ha'Mikdash sung'a aphatseh'a kisasah ding, chule P-thien kin bol ding ahijih in atahsa phatah'a akivet tuop'a, Mithi luong kisan jong atoh khah'a kisubuoh louding ahi. Hinla A inn sungmi/akinai pi ,Shiiva tou ngai ho, ahile vang phal ahi. A sopi numei jinei sa ahi levang phal ahikit poi.Hiche achung'a kisei daan hi Kohen Gadol pa ading in, Kohen dang ho asang in, akhou(strict) cheh in ahi. Kohen Gadol pa chun Thiluong kiti him him, Anu le Apa, hita jong le atohkhah'a aki suhbuoh ding phal ahipoi. Hinla Talmud akimu dung jui le Rashi sei dan in Kohen Gadol hijieng jong le Mithi aum tah'a koiman adonlou/aboipilou le Kohen Gadol pa amatah kipan'a thiluong vuidoh ding dan angaito'a, kisuboh thei ahi. Hiche hi Met Mitzvah jong akitiy.
"Aharon seipih in: Akhang akhang'a nachilhah koi hile nuolna nei koima'n P-thien kawm'a neh-le-chah thilto peding in hin nailut hih hen..."(Vayikra 21:17)
Hiche pasuk hi phatah'a evet le hetthiem bai ahipoi. Lungdon umtah tah Ei le Ei kidoh thei dohna tampi aum in ahi- E atile hiche thupeh hi Aharon bou seipih ding'a Moshe thu kipe aham? Thupeh dang ho, Kohanim hotoh kisai ho velechun atamjo'n "Aharon le achapte ho" seipih in akitin ahi. Chukit le E atile P-thien in Kohen, Beit Ha'Mikdash sung'a ama kin bol ding chu, atahsa chung'a nuolna nei mi ahiding aphallou ham? P-thien in Tahsa melhoina ho avepon, Mihem lungsung'a umpa joh chu avet hilou ham. Shmuel lekhabu a kisun bang in "Mihem in polam melput ave'n, Kenvang lungthimput kavet ahibou'e" (Shmuel I 16:7).
Midrash ah hitin akisei'e: Israel chate ho Sinai Muol mai'a ana din uva, Torah ana kisan uchun P-thien in Israel sung'a tibu kimlou hihen tahsa chung'a nuolna nei mi hitale hiche ho jouse chu ana sudam in ahi. Hiche khang'a Israel teho chu, Kohen hihen Kohen lou hitale, abon uva tahsa nuolna bei ngen sen ana hiuvin ahi.
Khakhamim hon asei uve: Hiche jih achu hiche daan, Kohen tahsa chung'a nuolna nei in Beit Ha'Mikdash sung'a P-thien kin abol thei louding, hi Aharon kom bou'a seiding'a Moshe thu kipe ahi'e. Ajih chu hiche daan hi Torah kipeh khang'a Kohanim ho ading hilou in asuon apah hou ading ahi. Chule amaho lungsung'a hiche thupeh hi achen jing'a akhang khang'a akihil son nading uva amaho(Torah kipeh khang'a Kohanim ho) ading hihih jong le P-thien in ana peh ahitai.
E Parasha uva hin Gancha pumgo thilto ding'a hung kituh hochu etobang hiding ham tijong akisei in ahi.
"Epi gancha hitale nuolna nei nahin to'uva ahile kisaan pih lou hiel ding ahi"(Vayikra 22:20)
Pumgo thilto'a kitoh ding gancha chu nuolna neilou hiding, chu chung chon achu nuolna neilou hijieng jongle akum tam phal hikit lou ahi. Na gancha lah'a ahoi pen pen ahingai ahi'e.
Rashi'n asei'e: Kilhaina nading'a hung kitoh Pumgo thilto jong nuolna neilou Gancha ahi ngai tobang'a Pumgo thilto hintoh ding'a pang Pa, Kohen pa, jong nuolna neilou ahingai ahi.
Khakhamim hon hitin asei uve: Beit Ha'Mikdash sung'a kimang manchah ho kisan jong chu asietna ham, aphatlou na ham neokhat ana umkhah tah jongle Beit Ha'Mikdash'a jah ding'a lhing lou ahi jieng'e. Hitobang manchah chu khel ding ahi apet pet'a ahilou le hiche mangcha'a thil kibol kha taphot chu daan bang tah'a kibol'a kisim lou ahitai. Vetsahna'n aneo pen'a seiding in Sa tha-na Chem (Knife) hamkhat chu neokhat amol (blunt) khah tah jongle a Chem chu Pasul ahi jieng'e.
Chule Gancha hung kitoh ho jong chu nuolna neilou ahi ngai ahi."Kilhaina dia gancha mitcho ham, dammo ham, elbai ham khat nahin kaiyu hi thildih bol'a nakigel uham? Hitobang gancha hingmo hi gam vaipo katnan ganei tem un! Naki papia nathum thum napeh ding hinam?"(Malakhi 1:8) Hiche akon hetthei chu Gam vaipo khat, Mihem mai mai hinalai, kom abon Gancha nuolna nei kitoh chu musitna tobang ahile P-thien ading'a jong musitna hilou ding ham. Gam vaipo khat kom'a thiltoh ding'a pangpa chu tibukim lou ham ahiloule atahsa chung'a nuolna neimi bang hitale Gancha nuolna nei kitoh sang achu ki musitna len jocheh nalai ahi'e.
Khuti'a thildang neo cha cha hobon nuol na neilou hiel angai le Pumgo thilto hintoh ding pa, Kohen pa, jong chu nuolna neilou ahi ding apoimo dan mudoh thei ahi.
E Parasha uvin Phat tepsa Kut ho chung chang asei na'ah hitin apan in ahi.
"דַּבֵּר אֶל בְּנֵי יִשְׂרָאֵל וְאָמַרְתָּ אֲלֵהֶם מוֹעֲדֵי יְהֹוָה אֲשֶׁר תִּקְרְאוּ אֹתָם מִקְרָאֵי קֹדֶשׁ אֵלֶּה הֵם מוֹעֲדָי"
"Israel chate houpi'n lang ajah uva sei in: P-kai ding'a phat tepsa Kut, nang ho'n phattepsa thieng tia nakoudiu Phat tepsa kut hochu hiche ho hi ahi" (Vayikra 23:2)
Hinla kidang tah in aban'a Pasuk (verse) simbe lechun Kut thu seilou in Shabbat thu joh asei in ahi. Chejou chun avel in ahung kipan thah kit in Kut pi ho thu ahin sei pan bep in ahi. Epi jih ahi tadem? Kut pi hole Shabbat nikho'n epi kimat na anei ham?
Khakhamim hon asei uve: Kut ho jong hi Shabbat khatma ahi. Hinla Shabbat nikho toh Yom Tov nikho'n kibah lou na ejat ham anei in ahi. Torah in "Koi hile Shabbat palkeh achu thading" atin hinla Yom Tov palkeh "Thading ahi" ti asei khapoi. Shabbat nikho'a bol ding'a kiphallou lah'a Malakha khat chu An huon phallou ahi. Hinla Yom Tov tieng le vang anikho ading An huon thei ahikit e.
Shabbat le Yom Tov kibah lou naho evet le Shabbat poimo bang'a Yom Tov nikho ho poimo lou hile akilawm in ahi. Hinla Rashi in hitin asei'e: Phattepsa Kut ho kiseina'a Shabbat hung jao in eihil nom khat uh um ahi. Hichu epi ham etile, Koi hile Phattepsa Kut ho ahiding bangtah'a manglou achu Shabbat nikhoho palkeh le suboh tobang'a kisim ding. Chule koi hile Phattepsa Kut ho ahiding bangtah'a mang achu Shabbat nikhoho suthieng le ahiding bangtah'a mang bang'a kisim peh ding ahi.
HaRav Avraham Zuckerman (Rosh Yeshivot Bnei Akiva) in hitin asei'e: Shabbat toh Yom Tov in kibah louna lentah nei jong le Rashi in hiche teni kimatna tekahna apeh hin epi asei nom ham? Hiche hi Khakhamim ho thusei khat akon hetdoh thei ahi. Mesekhet Avot ah hitin akijih'e,"Mitzvah kiti hi Mitzvah"len" le Mitzvah"Neo" ti khenlou in epi Mitzvah hileh nabol na'ah chingthei in ajih chu hiche "Mitzvah" kabol jih'a kaloman ding hiche "mong" ahi ti koiman ahepoi".
Rav pa'n aseibe na'ah: Hiche Rashi thusei akon ejil dohthei uchu ahile Shabbat le Yom Tov chun kikhehna lentah nei tajongle hetding chu Yom Tov ho jouse phatecha nit chu Shabbat nikho phatecha, ahiding bangtah'a nit nading'a "Abulpi" ahi.
Chujong le hiche akon ejil doh ding uchu Mitvah jouse hi apoimo dan akibang soh kei'e. Apoimo jo ahiloule Apoimo loujo ti umlou Mitzvot jouse ebol nalam jouse'a chingtei tah'a bolding gotdi ahi.
E Parasha uva, tulai tah'a bolding'a poimo, Mitzvat Sefirat Ha Omer thu jong akisei in ahi. Omer hi Pesach Ni 2 nii apat kisim a hita chu Shavuot chan, Ni 50 kisim jiy ahi. Omer sim sung hi Khakhamim ho seidan in Nikho dang toh akibang pon ahi. Ramban in Parashat Emor hilchetna apeh na'ah hitin asei'e: Pesach apat Shavuot kikah'a nikho ho hi Kut tobang ahi uve. Pesach chu Kut Ni masa ni tobang hi'a, Omer kisim sung nikho 49 hochu Khol Ha'Moed tobang hi'a chule Shavuot ni chu Kut ni nukhahni (last day) tobang ahi.
Zohar lekhabu ah hitin akijih'e: Shavuot hung lhun ding chu eiho'n emoh nga'tho ding uh ahipoi. Hichu hilou'a Torah ekisan thei nading uva chu ei ho le eiho eki gottup ding joh uh ahi. Midrash in asei'e: Epu epa teu Egypt'a asoh chan uva chu Buohna chi 49 lang'a ana khesuh man uh ahitai. Hiche buohna ho akon achu Omer kisim ni 49 sung ahi lhagao lang'a hung kaltou uva ni 50 ni, Shavuot ni'a Torah ahin kisan uh ahi'e.
Omer sim apoimo dan chu Zohar lekhabu ah hitin akisun'e: Koi hile Omer simlou achu athieng lou ahin ama'n Torah ah chanvou aneipoi. Khakhamim hon hitin asei uve: Pesach chu tahsa suoh channa apat chamlhatna kimu nikho ahi'n, Shavuot ahile Lhagao lang'a chamlhatna kimu nikho ahi'e. Chule hiche nikho teni chu hiche Omer kisim hin akan khawm ahi. Israel techun Pesach achun Egypt asuoh channa uva kon chamlhat muta jongleu hiche chu achamkim naipoi. Mihing chu Tahsa bep hilou'a Lhagao lang'a jong chamlhatna amu ngai ahi. Khuche joule chun bou Torah akisan thei pan bep ahi atiuve.
Shabbat Shalom lekulam
