Torah in Parasha masapa, Parashat Shemini'a Sa, Va le Nga athieng le abuoh ahin khen jou in tuchung Parasha ahin Mihem jong etih phat le thieng'a, etih phat le buoh aham ti ahin sei in ahi. Atile eiho le eiho kidong tadi leuhen: Epi ding'a Torah in Mihem toh kisai thienthou na daan sei masa lou'a Sa, Va le Nga thieng le buoh sekhen na daan joh asei masat ahidem? Mihem chu Sa, Va le Nga hosang'a kiloupi jo, kithupi jole kipoimo jo ah hilou ham.
Midrash Rabbah ah hitin akijih'e: Rabbi Simlai in asei'e: Siemtil a P-thien in Sa, Va le Nga ho Mihem sang'a asep masat bang'a Sa, Va le nga ho athieng le abuoh sekhen na daan jong Mihem athien le abuoh daan sang'a masa jo'a Torah in ahin sei ahi . E atile Thilsiem lah'a Mihem chu anukhah pen'a pang aham? Kakhamim hon hitin adonbut uve: Ajihchu Mihem ading'a angaichat thil jouse leiset achu avaat beihiel'a ana um nading ahi. Chujongle Mihem akiletsah le akithupisah lou nading ahi. Thousi kisan ama masang'a ana um ahitai ti Mihem in ageldoh jing'a hiche akuon achu akineosah jing ding ahi.
E parasha uva hin Brit Milah thupeh jong ajao in ahi. Brit Milah hi P-thien toh ekikah uva mangthei lou kitepna "Suoi"(Signature) bep hilou'a hiche akon ahi kihil nathei Mussar tamtah aum'e tin HaRav Yonah Metzger (Israel Ashkenazi Chief Rabbi) in asei'e. Brit Milah kibol tieng le Brakha Meyukhedet, kipana nikho dang ho'a kisei khalou beh, khat akisei in ahi.(Siddur ven)
"כשם שהכנסתו לברית, כך תזכה להכניסו לתורה ומצות ולחופה ולמעשים טובים"
Eipao'a ledoh ding hile hiti hi hiding dan ahi," Kitepna(Brit) a nalut bang hin Torah, Mitzvot, Khupah le Thilpha bol nalang ajong lutding'a lawm/tuh hung hin" . E atile hiche hi Brit Milah bol nikho bou'a kisei ah ham? A Birthday nikho ahiloule Bar Mitzvah nikho'a jong kisei le kilawm hilou.
Rav pa'n hitin ahilchien in ahi: Hiche Brakha, Brit Milah nikho bouseh'a kisei hin thil poimotah Ni eihil nuom uh ahie.
Khatna ah-Mitzvot kiti chu P-thien Thupeh ahijih le Suhbulhit ding apoimo jih a bolding ahi. Hinla Mi khenkhat chun hiche jih hilou in ama phatchuom nading jih bou in Mitzvot ana bol jiy uvin ahi. Aloi le guol hon Mitzvoh abol man'a bolloi jong aum in, Minphat ding deijaal'a Mitzvot bol jong aum in, Min aja nading'a bolloi....chule adang tampi tah aum'e. Hinla Chapang pasal hung penglha, niget lhinni'a Brit Milah kibol chun Se le Pha chule ama ding'a epi phachuom'a, epi chu phalou ham tijong ahepoi. Brit Milah kibol chu P-thien Thupeh Suhbulhit angai jih le apoimo jaal bou'a kibol ahi.
Rav pan asei'e: Hiche Brit Milah kibol nikho bang ahi khonung'a chapang pa chu ahung kikhanlet tieng Torah le Mitzvot hochu ama phatchuom nading hilou'a P-thien thupeh suhbulhit nading jih abou abolding ahi. Ji neithei ahung hitieng jongle Ajinu ding chu amelhoi jih bou ham, Sum le pai ahao jih ham, alekha thep le abolthei jih ham ahiloule leiset thil adang dang ho jih bep'a akichen pi louding ahi. Hinla alungset tahbeh jih bou'a akichen piding ahi'e. Thilpha abol'a Mi akithopi jongle alungsung'a thildang gellou'a P-thien thupeh ahi'e chule Mitzvah bolding'a kisei suhbulhit na abou kabol ahi atiding ahi. Minphat nading ham, Sum mu nading ham, Amin milah'a akithan nading ham jih bou'a Thilpha bol aguot louding ahi.
Anina chu hiti ahi- Leiset chung'a nathil nei jouse hi amangthei le abeithei ngen ahi-Business nabol te, nahaosat be tahsang'a nahamset le nanei nagou jouse nachaan thei ahi; Ji nanei te, naji tojong thil tamtah jih'a nakikhen thei ahi; Natohna phatah nanei'e tuni'n, jingle nahamset le nahin tawpsah kit thei uh ahi......adang tamtah tekah pithei aum nalai'e. Hinla Brit Mila kiti chu khatvei akibol le etih hijong le umjing kei'a ethi tokah'a manglou ahitai.
Chetobang achu Torah le Mitzvot hoto kikhen lou hiel'a beitih neilou'a chekhawm jing ding, Ji enei tieng jong le Eji toh kituoh tah le kipah tah'a chenkhawm jing ding, chule Thilpha kiti jong tantih neilou'a bol jing ding ahi. P-thien toh nakikah'a melchina ding'a nabol Brit aum jing tobang'a hiche thilthum, Brakha sung'a hung ki minphah, hoto jong hin kilhasuo louhiel'a nadam sungse'a umjing di naguot ding ahi.
Parasha kisim lah'a ani napa, Metzora, ahin Phah vei chung chang daan akisei in ahi. Khakhamim ho seidan in hiche Metzora kiti hi tulai'a Phah natna toh akibang chet poi atiu ve. E Parasha uva kijih Phah natna hi Lashon Hara sei akon hung kuondoh natna ahi.
Khakhamim hon asei uve: Metzora kiti chu "Motzi Shem Ra" (eipao'a "Mi sumin se" tina tobang ahi) akuon hung kiladoh ahi. Mi khat chun midang khat asei siet aham, asuh minsiet ham, ahiloule ajou jou asei'a mi atatuo ham'a ahile a Lashon Hara seijih achu gotna kipe'a hiche Phah natna chu veidoh jiy ahi.
Hiche Phah natna toh natna dang akibah lou na chu koi hile Phah vei achu ngahmun polang'a achang'a kium doh sah jiy ahi. Chule Phah veipa/veinu chu Kohen pa'n avet'a athieng'e ati tieng boule thieng pan bep ding ah ahi. Chujoule chun amapa/nu chun Vacha ni kilhai nading'a ahinchoi'a, khat kithat'a chule khat chu ahing'a kilha jiy ahi.
Hiche achung'a kisei hohi velechun lungdon umtah ahi'e. Epi jih'a Phah veikhat chu ngahmun polang'a achangseh'a kikoi ham? Phah veipa/veinu thien le thien lou chu E atile Kohen khat in "Athieng te" ahilou le "Abuoh'e" atia kingam aham? Epi jih'a Vacha khel khel chu ahin choi ngai ham? Eti dan'a vacha chu khat kithat'a khat ahing'a kilha ham?
Hiche ho jouse hilchetna chu Khakhamim hon hitin ape'uve: Mihem kiti hin ethu sei akuon ahi Mi jong kithat thei, Mi jong hinna kipe thei ahi. Chule Lashon Hara nasei jih achu golpha kingai tah jong natatuo'a nakivet da sahthei chule inn sung kituh tah khat jong nasuh keh thei ahi. Lashon Hara seipa chun Mi kikah'a kituomo nading akoi'a, Mi kikah'a kibung khenna asep tah jih achu ama jong Phah ahung vei tieng achangseh'a ngahmun polang'a kium sah jiy ahi. Athilbol phatlou vetsahna'a hita chu Phah veipa/veinu chu kibol ahi.
Amapa/Amanu'n "akam" ahung kondoh thuphalou asei akon Phah chu veidoh ahiti vetsah na'a Kohen pa'n mipa/minu chu athien le abuoh akam cheng tah'a asei doh ngai ahi. Rabbi Menachem Mendel Schneerson in hitin asei'e: Kohen pa'n adamloupa/nu chu abuoh le athien ahin seidoh chu Phah veipa/veinu ading'a anatna anei sang chun alhagao lang atong kha jon ahi.Kohen pa'n hichepa/hichenu hi abuoh tai ahin ti jouphat boule ngahmun polang'a amapa/amanu chu kiumsah bep jiy ahi. Hiche akon achu Phah veipa/veinu chun kisihna ahin nei thei ding ahi.
Rashi chule Talmud in hitin asei'e: Ganhing lah'a kamtam le akam kihong jing'a, thiplou hiel'a hamthei chu vacha ahi. Chule hiche E Parasha uva kisei Phah natna hi kamtam'a Lashon Hara seijih akon ahi. Hiche jih achu Phah veipa/veinu chun adam tieng le Vacha ni Kilhai nading'a ahinchoi ding ahi.
Esei mabang uvin Mihem kiti hin ethu sei akuon ahi Mi jong kithat thei, Mi jong ki hinsah thei kit ahi. Vetsahna'n, achomlam pen aseiding in, Thuhettohsah'a (witness) pang khat chun akam akon'a hung pot doh thucheng achu thutan namun'a dingpa chu atha thei ahiloule hinna apeh thei ahi. Hiche Thina le Hinna chu ahi Vacha teni chun avetsah chu. Khakhamim hon asei uve: Ven nalei chu apha lang'a thu nasei sahle Vacha aki hinglha bang ahi hinna hiding, ahivang'a Lashon Hara seina'a naman kalse chu hiche vacha kithat pen bang ahi thina joh hiding ahi.
Shabbat Shalom veKhodesh Tov lekulam
(Tuchung Shabbat hi Parasha ni Ahung kito khah jih in Shabbat dang toh te'n ahung jao jep kha'n ahi. Asim jouse simnop)
