Parashat Akharei Mot ahin alhangpi'n Yom Kippur nikho'a Kohen Gadol pa tohding le kin ho, chujong le Beit Hamikdash mun bouseh'a kilhaina kin boldi poimo dan thu akisei in ahi. Yom Kippur ahung lhun tieng Kohen Gadol pachun atahsa akisuh thiengsel'a avon loupi tah tah hochu aki von'a Kodesh ha Kodashim sung'a chu lut ding ahi. Hiche nikho chule chun Kohen Gadol pa'n Israel chate ho jouse chonset ngaidam nading'a Kelchal ni alah ding ahi. Kelchal khat chu kithat'a, khatpa chu ahile Azazel ading'a ahing'a gamlah'a kilha jiy ahi.
Kelchal ahing'a gaki lhadoh chung ahin lungdon umtah khat aum in ahi. Kelchal chun Israel mipi ho chonsiet na hochu akipoh'a, gammang lah'a aga kilha doh tieng chonsietna ho jong chu akipoh mang tha jiy ahitai. Hinla E atile hiche Kelchal lhadoh'a pang pen pen chu Buoh jiy'a chule ngahmun ahung lut kit nading achu avon chule amatah jong akisuh thieng ngai aham? Gel lechun Kohen Gadol pa'n Kelchal khat pa chu atha'a ahivang'a ama buoh dihlou ahi'e.
Khakhamim hon hitin asei uve: Adih'e, Kelchal ahing'a kilha pachun mipi ho chonsietna apoh mang'a chule hiche jih ajong chu mipi'n ngaidamna akimu jiy uh ahi. Kelchal galha doh'a pang pajong chun P-thien thupeh khat Mipi te kingaidam nading le kisuhthieng nading'a abol ahinai. Hijieng jongle Kelchal agalha jih'a amapa abuoh chun eihil nuom uh um ahi.Hichu epi ham etile Kilhaina kiti chu epi hihen, etobang hitale Beit Ha'Mikdash polang'a kibol taphot chu abuoh ahi.
E Parasha uva hitin akijih'e: "Anung ajui uva, ana vamang lo jiu, Thilha haw kawm'a chu eti jongle kilhaina gan atha kit thei lou hiel diu ahi"(Vayikra 17:7). Azazel kiti jong chu Thilha khatma ahi. Kelchal chu kithat jong hilou, ahing'a kilha doh tho hinalai chu jongle P-thien thupeh jong hikit nalaiset ahi. Hiche ho jouse nunga jong chu Kelchal galha dohpa chu Torah in "abuoh" ati kit nahlai ahi.Hiche akon Israel ten ahet diu chu P-thien thupeh bol kisan ajong buohthei ahile Beit Hamikdash hilou mundang'a Kilhaina bolkhat chu eti "Abuoh" in achonsetna alien tadem.Hiche thu hi Mipi ho lungsung'a achen jing nading'a Torah in koi hile Azazel ading'a kelchal galha doh'a pang pen pen chu "abuoh" tia aphuondoh ahi.Kilhaina kiti chu munkhat bou, Beit Ha'Mikdash sung bou'a bolding ahi ti avetsah ahi.
Chule Kilhaina hi epi jih'a munkhat bou, Beit Hamikdash bou'a, kibol aham? Khakhamim hon hitin eihil uve: Jat dang le nam dang ho'n P-thien lhem tamtah anei uvin kilhaina jong anop nop namun uva abol jiy uvin ahi. Hinla Eiho'n hingjing P-thien khatseh bou enei uh le E tahsan uh vetsahna'a akom'a kilhaina jong mun khatseh bou'a kibol ahi.
Parashat nina pa Parashat Kedoshim kipatna ah hitin akisei e: "Nathien ding uh ahi ajihchu Kei, P-kai na P-thien uh athieng kahi". Ei le ei kidong tadi leuhen P-thien in "Nathien ding uh ahi" ati chu epi ti thien ding ahi tadem? Mihem chu epi ti P-thien bang'a kithieng thei ding ham? Egel le ahet hahsa lheh in ahi.
Rashi in hitin asei'e: "Nathien ding uh" kiti chu "Na kikaangse (abstain) ding uh" tina ahi. Epi akon'a "Kikaangse" ngai aham? Ramban in hitin asei'e: Torah in Nehding'a thienglou ho akuon chule Mihem tahsa ngaichat nalampang ajong Jonthang huoi bollou nading in eigih saal uvin ahi. Chujongle alangkhat kit'ah Torah in etobang Sa thieng nehphal ho ei hil kit uvin, Ju le Sa neh ding jong eiphal peh uvin chule Nupa kikah ajong Tahsa ngaichat suhbulhit nathei ding daan eipe kit uvin ahi. Hinla Mi abang khat chun Torah in aphal nai tin achung'a kisei hohi ahilou langtah in ana mangkha jiy uvin, P-thien min asuoh buoh lo kha jiy uvin ahi.
Ramban in asei be na'ah: "Nathien ding uh ahi" kiti chu Torah in Asur ahi ati ho akon bep kikaangse ding tina ahipoi. Hiche bep hilou'a bolphal chule neh le don ding'a kiphal ho ajong kiha pehlut vaal lou ding, Torah in aphal nai tia ngolpi lou ding, khuti tah saang'a hiche ho akon jong chu aphaat toh kitoh'a ei le ei kituh tang'a , kikaangse gotding tina ahi.
Shabbat Shalom Lekulam
