Parashat Shemini ahin Mishkan ki thiensuo jou'a Kohanim hon Mishkan sung'a natoh ahinpat uh, P-thien Sechina Mishkan ahung chenlut, Aharon chate ni, Nadav le Avihu, thithu chule Sathieng le Sabuoh, etobang Sa neh le neh louding chung chang akisei in ahi."וַיְהִי בַּיּוֹם הַשְּׁמִינִי קָרָא משֶׁה לְאַהֲרֹן וּלְבָנָיו וּלְזִקְנֵי יִשְׂרָאֵל:"
"Hichun Ni get lhinni'n Moshe'n Aharon le achapate chule Israel phung lamkai ho akou in"
Epi "Ni nget lhinni" asei naham achung'a pasuk hin? Rashi, Midrash chule Mefarshim tamtah ho seidan in hiche "Ni get lhinni" kiti hi Mishkan kithiensuo jou'a Ni get lhinni kisei na ahi. Hiche nikho ahi Aharon le achapa teho'n Kohanim ahina dol uva ana toh ding uh kin ho chu ahin tohpat bep uh ahi'e.
Hiche masang Ni sagi sungse achu Moshe'n Mishkan chu nisih le atundoh'a chule anung phiit lhah kit jiy ahi. Chujongle hiche Ni sagi sungse achu Moshe in Kohen Gadol kin ho jouse chu aboncha amatah in ana bol jiy ah ahi. Hinla P-thien Sechina chu hiche Ni sagi sung chun Mishkan sung ah ahung cheng hih lai'e. Ni get nikho'a Moshe le Aharon Mishkan sung'a agalut lhon'a aga tao honle P-thien Sechina chu meikou bang'a vaan akon hung lengsuh'a Mishkan achu hung cheng panbep ahi.
Rav David Feinstein in hitin adong in ahi: Ni sagi sungse achu Mishkan chu kitung doh tahbeh nailou ahi'a chu jongle P-thien Sechina jong cheng lut loulai'a ahitahle epi atile Torah in Ni sagi ho chu asimtha'a Mishkan ahung kitun doh dihtah nikho le Sechina hung chenlut patna nikho chu "Ni get lhinni" tia asim ham? "Ni get lhinni" titah sang'a "Ni masa ni" ti jole dihjo hilou ham?
Rav pa'n hitin ahilchien'e: Khakhamim ho seidan in Nikho masa sagi hochu "Ni get lhinni" ading'a kiguot tuopna (Preparation) chule kithep chuhna (Rehearsal) mai mai anahi'e. Chule Ni get lhinni achu bou Mishkan sung'a kin ho le bolding ho chu hung kipan bep'a chule P-thien Sechina chu amite lah'a hung cheng pan bep ahi. Hijieng jongle Torah in hiche Ni masa sagi hochu Mishkan'a kinho hung kibol patna nikho tochun ahin simtha paipai ahi. Hiche hin thil poimo tah eihil nom jih uh ahi'e.
Hiche akon ekihil nathei uchu epi ham eti le Mitzvot ho phatah'a jui nading'a Halakha ho phatah'a kihil thiem le kijil thiem'a chuva kon achu kiguot tuop ding ahi. Torah chule Halakha ho athubou'a najil chu Mitzvot nabol/natoh (Action'a) doh patoh apoimo dan thakhat ahi. Thakhat ahidan chu Khakhamim hon hitin ana sei leu uvin ahi: Koi hile Mitzvah bolding kigo achun a Mitzvah chu alhing/akim kei in boljou tahih jongle akipaman/loman akisan thou thou ding ahi.
Hiche "Ni get lhinni" nikho mama chun P-thien in Moshe le Aharon mangchan Israel chate chu Kashrut (Nehding phal le phallou toh kisai) daan ho ana hil in ahi. Atile Mishkan'a Kohanim hon akin hou ahin bol pat u'toh P-thien Sechina Mishkan sung'a hung chenlut chun Kashrut daan toh epi kimatna anei ham? E atile P-thien in hiche nikho achu Kashrut daan hochu Israel chate ahin seipeh pan ahidem?
Khakhamim hon hitin eihil uve: Mishkan kisah lo najih pentah chu Israel te sung'a P-thien hung chen nading ahi. P-thien in chenna ding aneipon, achenna ding Inn sahpeh apoimoi tia kisa ahipoi.Shemot lekhabu sung'a kijih bang in ,"asung uva kachen nading in..." (Shemot 25:8). Hiche akon hetthei chu Mihem tahsa le lungsung jong hi P-thien ading'a "Miskan" khatma ahie.
Mishkan thudol achu Torah in daan tamtah ape in ahi: Asung'a natong di Kohanim ho eti kivon ding ham; Alut masang uva etobang'a atahsa'u athien ngai ham; Epi adon uh phal hi'a epi phallou ham; Epi Sa chu pumgaw thilto ading'a to ding ham.......chule adang dang tampi tah aum in ahi. Kohanim hochun chingthei tah'a Mishkan toh kisai daan hochu ajui lou uleh thilo thei nalai uh ahi'e. Hichu Nadav le Avihu akon, achomlam in kisei le, mudoh thei ahi.
Mishkan chu jaa tah le thiengthou tah'a bol angai le gel tem in E tahsa ule E lungsung uva um "Mishkan" chu P-thien ahung chen nading'a etobang'a ven'a suh buoh louding poimo aham? Khakhamim hon asei uve: Hiche E tahsa ule E lungsung uva um "Mishkan" chu aboh lou nading'a P-thien in hiche Kashrut daan hi ahin peh ahi'e.
Sa abuoh khat naneh chun nangma Tahsa bep hilou'a na Lhagao jong asuoh buoh phah peh ahi'e. Hichu hoi akon kihe thei em? E Parasha uva hitin akijih'e: "..אַל תְּשַׁקְּצוּ אֶת נַפְשֹׁתֵיכֶם"(Vayikra 11:43). Eipao in hiche thugol hi a Literal tah in kiledoh le " Nalhagao uh nasuoh buoh lou ding uh ahi...." tiding dan ahi'e. Sa thieng le Sa thienglou, neh le nehlou ding kikhen hi E tahsa ading hitah sang'a E lhagao ading joh ahidan kichih tah'a mudoh thei ahi.
"Leichung'a um ganhing lah'a hiche ho hi na neh thei diu........" (Vayikra 11:2)
Hiche achung'a Pasuk toh kilou khat Parashat Bereshit ajong muthei ahi. "Huon sung'a theiga jouse na nehthei ahi, hinla Apha le Ase hetna thing apat vang khu naneh lou hiel ding ahi.." (Bereshit 2:16-17). Adam HaRishon Gan Eden sung'a aum achu Thupeh ni, khat bolding le khat bollou ding, P-thien in amai ah ana koi peh in ahi:
(1): Theiga ho neh ding (2) Apha le Ase hetna theiga neh lou ding.
Khakhamim hon asei uve: Hiche achung'a kijih Pasuk teni hi velechun ani gel in "Neh ding'a kiphal" amasa'n chule "Neh ding'a kiphallou" anu khah in ahi. Ei mihem lungsuhto achu gah gel ding hitale neh ding'a kiphallou joh chu masa jole akilawm in ahi. Mihem hin alhangpii'n aki khaam khat chu aki phal sang in het masat ding in aki poimo jo gel jin ahi. Khuti ahile eti dan'a Torah in hiche teni hi alebul'a, Neh ding'a kiphal joh amasat sah'a Neh ding'a kikhaam pa chu anukhah sah ahidem?
Adonbut nachu Khakhamim hon hitin ape'uve: Hiche hin Mussar phatah ehung hil nom uh ahi'e. Hiche Pasuk teni'a "neh phal" le "neh phallou" tobang hin Torah'a kisun Mitzvot hojong chi Ni'n akikhen in ahi- Mitzvah Ta'aseh le Mitzvah Lo Ta'aseh. Mihem in alhangpii'n Mitzvah Lo Ta'aseh ho akon kivendoh ding hi ana kipoimo sah kha jiy in, Mitzvah Ta'aseh lang hi ana kidon kha jiy tapoi. Torah in "Asur" ati hochu kabol lou pou le bol in atiho (Mitzvah Ta'aseh) bolda jongle akhoh poi tiin ei le ei ana kiki lhem lha jiy in ahi.
Khakhamim hon asei uve,"Mitzvah khat nabol le Mitzvah khat kipaman'a nakipeh be ding, Aphalou khat nabol tah'a ahi jongle Aphalou khatma nakipeh be ding ahi". Chebang'a achu Mi khat chun Mitzvah Ta'aseh ho bollou'a Mitvah Lo Ta'aseh ho akon bou'a kiven doh ding aguot'a ahitahle achai nale chonsetna'a lhalut thou thou ding ahi. Ajihchu amapa'n Mitzvah bolding ho abol tah lou jih'a achan ding kipaman Mitzvah dang kipe belou ahitan, chomkhat joule Chonsetna in ajui pei jieng jiy ahitai.
Khakhamim hon hitin asei be'uve: "Nehding'a kiphal" chu ahiding bangtah'a nava tah'a naneh jing'a ahile athieng lou "Nehding'a kiphallou" khat naduchat thei lou ding ahi. Chebang'a chu Mitzvah Ta'aseh kiti jong chu ahiding bang'a nabol jing le, Mitzvah bol ding naki pebe jing'a ,hichun thil phalou bol nopna lunggel akon nahin huh doh ding ahi. Hiche ekihil nading uva Torah in achung'a Pasuk kipe teni achu "Neh ding'a kiphal" ho chu "Neh ding'a kiphallou" ho sang'a amasat sah ahi.
Shabbat Shalom lekulam
