Tuchung Shabbat hi Pesach sung'a achuh jih in Parasha thah akisim poi. Chule tu Shabbat a kisim didol Parashat Shemini hi hapta kit Shabbat joh'a kisim ding ahi. Tuchung Shabbat'a kisim Parasha hi ahile Parashat Ki Tissa akon Shemot 33:12 apat 34:26 sungse ahie. Parasha achesa ahijih in chomcha bou, Shabbat dangho to te'n, sei'u hite.Shabbat Khol Ha'Moed Parasha sung ahin sim lechun Israel te'n bongnou lim ahou jou uvah akipan in chule Kut pi Thum (Shalosh Regalim) le Shabbat nikho thieng niit ding thu ah akichai in ahi. Torah sim ding'a mi Sagi kikou holah'a velechun a'Sagi napa (Aliyah Shiviit) bou achun Kut toh kisai thu akisei bep in ahi.
Atile Bongnou lim hou toh Kutpi thum hohin epi kimatna anei'a Shabbat Khol Ha'moed nile Parashat Ki Tisa sung hi kisim jiy ahidem? Kutpi ho chungchang hi Parashat Mishpatim ajong kisei ah hitalou ham.
Khakhamim hon hitin asei uve: Torah'a kisei Kut ho jouse hin Egypt apat Israel te hung potdoh toh kimatna anei soh kei in ahi. Israel chate chu Egypt akon P-thien in abangol thahat in ama mite hiding le ama kin bolding in ahin puidoh in ahi. Sinai mol ah Torah ahin kisan uvin chujou chomkhat jou in Bongnou lim hou in ana chonse taovin ahi. Israel chate chonsetna chu sanglheh jongle P-thien in ana ngaidam in ahi.
Hiche Parashat Ki Tisa Shabbat Khol Ha'Moed a hung kivel sim hin eihil nuom uchu P-thien in amite Israel chate angailut dan chu ahi. Egypt gam'a asoh channau vakon ahin puidoh bep hilou'a Bongnou lim ahou uva achonset lheh vang uva amite ding'a akisan tei jing nahlai ahi. Israel chate P-thien namlheh mong mong ehi dan uh hiche Parasha ahin thah muthei ahie.
Israel chate chun Bongnou lim ahou uva amai achu epi abol uvem? "Jingkah matah in athou un, mipi'n pumgaw thilto le chamna thilto ahin chawi khawm un..."(Shemot 32:6) . Torah sung'a kijih phat tepsa kut ho ajong pumgaw thilto ho le chamna thilto ho kitoh jiy mong ahie. "Ne ding le dawn dingin atou un.." Kut lai le ann tui tui nehding chule kipa ding jong thupeh ahi'e.
Veuvin Kut abol ding'a kisei hochu Israel chate hon Bongnou lim ahouva chu chonsetna'n ana mang tauvin ahi.Hijeng jong le P-thien in ama hawchu ana ngaidam nalai in ahi. Chule Shalosh Regalim ho'a Jerusalem'a Temple sung'a P-thien mai'a Israel lah'a pasal ho aga kilulah diu, chule P-thien ading'a Thilto aga to'uva akhut guhkeu'a achelou ding uchu Bongnou lim ana hou jih uva Epu Epa teu ana chonset nau ngaidam nading ahipeh'e tin jong Khakhamim hon asei uve.
Chujong le E Parasha sung uva hin P-thien mihepina chi 13 (13 attributes of Mercy) jong ajao in ahi. E parasha uva kon ejil doh thei uchu Mihem chu etobang in chonse tajong le aman alungsung'a kisihna dihtah neipum'a P-thien ahin jot kit le achonset na hochu P-thien in ngaidam lal aneipoi. Keivang kachonse vaal tai, P-thien in jong ei ngaidam mong mong tapon te tia lung lhahdai lou ding ahi. Kisihna dihtah neipum'a kithah pat joh ding ahi.
Shabbat Shalom. Khag Pesach sameakh ve Kasher.
