Shabbat masa Parasha, Parashat Vayikra, achun Korbanot (Pumgo thilto) chung chang akisei in, Tuchung Parasha ajong hin Korbanot toh kisai mama akisei in ahi. Hapta masa Parasha toh tu hapta Parasha teni ahin Korbanot thu kisei gel tajongle akibahlou na pipen chu Parashat Vayikra'a daan kipe hochu Pumgo Thilto toding'a hinchoi pa/ hinchoi nu toh kisai ahin, Parashat Tzav in vang Kohanim(Thiempu ho) hon Pumgo thilto ato ding dan uh asei in ahi.Ehetsa mabang uvin tuchung Shabbat hi Pesach hung lhun masang'a Shabbat nukhahpen, Shabbat Ha'Gadol (Shabbat Lien/Loupi), chu ahin ahi. Epi jih a Shabbat Ha'Gadol kiti ham tichu ehet khah suh diu kaki nem in hijeh chun thudang, tuchung Parasha toh Pesach kimatna joh gah sei'u hite.
"Hiche daan hi Lhawsuoh Thilto daan Aharon chapate'n ahin toding uh Maicham phung mai'a......" (Vayikra 6:13)
Hiche Lhawsuoh Thilto hi Kohen Gadol in niseh le atoding'a kisei ahi'e. Chujong le Khakhamim ho seidan in hiche Lhawsuoh Thilto hi avaicha le anei joulou hon Beith Hamikdash dinlai'a kilhaina thilto ding'a ahin tojiy ujong ahi.
E atile kilhaina thilto dang jong hilou'a hiche Lhawsuoh thilto sese hi Kohen Gadol in niseh'a atoding'a daan kipe ahidem?
Abarbanel in hitin ahilchen in ahi: Hiche hi ajih Ni(2) aum in ahi. Khatna ah, Aneilal le Avaicha khat in pumgo thilto ahin to tieng le jumna le jachatna amulou nading ahi. Aneilal le Avaicha khat chun jahcha tah le kiphalam tah'a pumgo thilto hintoh tajongle Kohen Gadol pa toh athilto akibah amutieng alung among jiy in kipahtah le thanomtah in athilto ding chu atohdoh jiy in ahi. Anina ahile Kohen Gadol pa lungsung'a kiloupisah nale kithupisah na aumlou nading ahi. Kohen Gadol kiti chu jaa umtah,thupitah le loupitah ahinai, hijeng jongle amapa'n ageldoh jing ding chu Israel sung'a avaicha pen le aneilal pen toh apumgo thilto akibang'e tichu ahi. Hiche ageldoh jing'a P-thien mai'a mijouse akibang suhkei'e ti ahetjing'a, hiche vakon achu akineosah jing ding ahi.
Hiche Lhawsuoh Thilto hung kitoh ding holah hi velechun Matzah jong ajao in ahi. Pesach lai le Matzah kineh jih ahelou eumpou vin ahi. Hinla Beith HaMikdash sunga niseh'a Pumgo thilto kitoh (Lhawsuoh Thilto) lah'a Matzah jao chu datmah umtah ahi. Atile Matzah toh Beith Hamikdash in epi kimatna anei ham? Pumgo Thilto lah'a Matzah pan hin epi eihil nom uh ahidem?
Maharal in hitin eihil uve: Matzah kiti chu Cholsolou changlhah apomdoh lou chule alah'a thildang kilhah/kihapbe lou ahi. Pesach ahi Epu, Epa teu Egypt'a asoh channa uva kon hung potdoh uva Thulhung Dihtah Torah chu Sinai mol'a ahin kisan uh ahie. Sinai mol'a Torah akisan uva chu Epu, Epa teu chu Vaantil hosang in athupi joleu uvin ahi.
Hiche hi ahi Matzah in eihil nom uchu: Nidang tieng le enop ule Khametz enethei un, chujongle jaat dang, nam dang ho chondan jong eiho hina (Identity) le chondan sukhalou/suboilou in etho thei un ahi. Hinla Pesach ahiteng hiche "Khametz" ho jouse apat kikangse'a Eima hina le chondan pan bou chu jui'a Thulhung Dih pabou chu dopsang ding ahi. Chetobang ma achu Beith Hamikdash ajong elut ditieng ei le ei kisuhthieng ding, E lunggel aum thil phalou "Khametz" ho jouse chu paimang ding ngai ah ahi.
Matzah chungchang ahin thu poimotah le kihil nading'a hoitah khat aum in ahi. Haggadah bu esim le Epu, Epa teu chu akino vaal jih uva a'Changlhah sem lah uvang jong chol somanlou khop chule a'Changlhah u'jong pomdoh manlou leu'va Egypt ahin dalhah uh ahi tin akisun'e.
Hinla Khakhamim ho seidan in Matzah akineh lona jih dihtah chu hiche Haggadah bu'a kisei pa hi ahipoi. Matza nehding (Khametz nehlou ding) kiti daan thupeh chu Epu Epa teuvin Egypt adalhah masang uva kipe ahitai. Shemot lekhabu'a kijih bang in "Ni sagi sung chol panna changlhah naneh theilou diu, chol solou changlhah bou naneh diu........" (Shemot 12:15) P-thien in Khametz nehlou ding ti thupeh ahin peh masat'a, aban'a Epu Epa teu chun a'Changlhah sem hou chu ahung pomdoh kah nga nading phat kisan jong anei kit lou uh ahi. Hicheva kon ejildoh thei uchu epi ham etile P-thien lunglam bol ding'a ei le ei eki gellhah tieng le ethilbol ding jong chu ama le ama aphalang le P-thien deilam ah ahung um jieng jiy in ahi.
Shabbath Shalom. Khag Pesach Sameakh veKasher.
