Parashat Vayakhel-Pekudei

Tuchung Shabbath ahin Parasha Ni, Vayakhel le Pekudei, akisim khom in ahi. Hiche Parasha teni hi Hebrew kum sim to kitoh a Leap Year ahi tieng achang chih'a kisim jiy'a, Kum dang (Tukum tobang leap year hilou) tieng le thakhat a kisim khom jiy ahi.

Tuchung Parasha hi Parashat Terumah kivel sei (Repeat) toh akilou in hinla akibah louna chu Parashat Terumah achu Mishkan sah ding dan kisei a, tuchung ahi Israel te'n asahpat ule anatoh dan uh kisei ahie.

"Ni gup sung naa kitong ding,hinla ni sagi ni vang nangho ding'a nithieng, Pakaiya cholngah nikho hiding; koi hile naa tong achu tha ding ahi.."(Shemot 35:2) 

E Parasha uh esim le Mishkan kisahna'a nakitong ho akisei in ahi. Hinla kidang tah in Mishkan toh kisai behseh lou Shabbath nikho thieng niit ding thupeh ah akipan in ahi. Khakhamim hon asei uve: Shabbath nikho thiendan le niit ding apoimo dan Thusom peh ajong pang ah hi talou ham, E atile Moshe'n  Mishkan sah kipat masang'a avel'a Israel chate kom'a asei peh kit ham? Shabbath toh Mishkan  hin epi kimatna anei ham?

Midrash ah kijih dan le Mefarshim tamtah ho sei dan in hiche akon ahi Shabbath poimodan thah mudoh thei ahi. Mishkan sah ding chu etobang in poimo henlang, Mitzvah thupitah hijeng tajong le Shabbath ni alhun le natoh jouse ngah a kichol ding ahi jieng'e. Israel chate Mishkan sahna ding'a athanop dan uchu Moshe akipah lheh in ahi. Hinla athanop vaal jih uva Shabbath nikho amang hil uva, kicholdo lou'a natoh ban ajop khah uva chule Shabbath nikho thieng apalkeh khahdiu tijat jih a P-thien in Moshe kom'a avela Shabbath thiendan le poimo dan Mishkan sah kipat masang'a asei sah kit ahi.

Rashi hilchet dan in "Moshe'n Israel mipi akoukhawm..." (Shemot 35:1) kiti chu Yom Kippur ni jing(day after Yom Kippur) ahi'e. Midrash'a kijih dan in hiche nikho achu Moshe'n Israel techu Shabbath abol ding'a kiphallou 39 Av Malakhot ho chu ana hil in ahi.

Khakhamim ho seidan in Shabbath toh Mishkan hin kimatna tampitah anei in ahi. Talmud Mesachet Shabbath 49b kimu dung jui le Rashi hilchet dan in Mishkan kisah masang'a Shabbath daan avel'a hung kisei kit hin thil poimotah eihil nom uh ahi. Hiche thil poimotah chu ahile Mishkan sah nading toh kisai natoh kiti jouse chule akibahpi taphot chu Shabbath nikho abol phallou (Asur) ahi. Hinla epi hitale Mishkan sahna ding toh kisai natoh hotoh kimatna neilou chu Shabbath nikho a bol phal (Mutar) ahi. Hiche akon ahi 39 Av Malakhot ho hung kiladoh ahie.

Hiche akon ejil dohthei uchu Shabbath ni'a bol phallou naa(Malakha) kiti chu etha sen'a, ulsa kaileu a kisuh gim nathei hobep  ahipoi. Thilkhat akon aumlou beh thilthah khat ga boldoh/ siemdoh joh seina ahi. Vetsahna eiho'n natoh ajong esim lou uh tamtah: Lekha chung'a pen a thil gajih...Electric on/off le adang dang ho jong seina ahi'e.

Khakhamim hon aseibe nauva: P-thien ni Sagi ni'n acholdoi kiti chu agim jih le alal jih ham? Ahipoi, Che hitah sang achu P-thien chun nigup sung'a thil asiem achu atha emacha ajangpoi, Akam a asei le thil hochu ama le ama hung um jieng ah ahi. P-thien ni sagi ni'n akichol'e kiti chu "Thilthah" asiem angah'a, thilsiem akon kichol kiseina joh ahi. Hijeh achu eiho jong Shabbath ni'a eki chol tieng ule natoh hahsa, gim um tah tah ho akon bep hilou'a thil aumlou khat umsah lou nading'a Hilkhot Shabbath ho phatah'a ejui ding uh ngai ahi.

Mishkan kisah toh P-thien in leiset asep hin kibah na tampi tah anei in ahi. P-thien in leiset ni gup sung'a asep a ni sagi ni'a akichol bang'a Israel tejong chun Mishkan asah uva chu ni sagi ni'a ana kicholdo uh ahi. Khakhamim ho seidan in Mishkan kitun doh masangse achu Leiset chu bulhing (complete) lou ahi. Israel ten Mishkan ahin tundoh uva chu Leiset kisep chu kichaipan/bulhing(complete) panbep ahie.

"Koima'n nachenna mun uva Mei jieng jong ati lou ding ahi Shabbath nikho le.." (Shemot 35:3)
Hiche pasuk akon ahi Mussar phatah jildoh thei ahi. Zohar HaKadosh a kijih dan in hiche pasuk a "Mei" hin Shabbath ni'a mei ti ding phallou bouseh eihil nom uh ahipoi. "Mei" kiti hi lungsat jih,kinel kibou jih ahiloule kitomona jih'a hung koudoh "Mei" seina jong ahi.

Shabbath hung lhun guot kon ahiloule Shabbath nikho lehin Yatzer Hara hin ahithei chan'a Shabbath ahibang tah'a eman lou nading uvin nupa kikah ham ahilou le Inn sungmi kikah a kinel na, kibouna chule lunghan nathei ajat chuom chuom elungsung uva ahin koi jin ahi. Hinla ahina theichan'a kichih thei ding, Shabbath nihi kipahtah le thanomtah a man gotding ahi. Chule Shabbath Shulkhan chung'a kinel lou ding, koima chan lungnatna ahiloule kinelna "Mei" chu Shabbath nile tikou lou hielding ahi. Shabbath hi kinelna,kibouna le lungnat naho bei'a nomtah'a manding tina ahi.

                                    Khazak Khazak veNitkhazek. Shabbath Shalom lekulam.