Tuchung Shabbath Parasha ahin Mishkan kisahna chung chang'a akhum khana (consclusion), Bongnou lim Israel te'n ahou thu uh chule Songpheng(Tablets) akhatna le anina thu akisei in ahi.Mishkan sahna ding'a Thilto hung kitoh ding ho jouse chu Atohpa'n ama nopdaan le deidaan a adei jaat jaat ahin toding a thu kipe ahi. Hinla hiche Thilto toding'a kisei holah ahin Dangka(Silver) hi ahile ahao hihen avaai hitale abon chakei uva Shekel Kehkhat (MaKhatzit HaShekel) bou ato ding uva thupeh achuom beleh a kipe ahie.
Khakhamim hon asei uve: Epi ding a Shekel Khat hilou a Shekel Kehkhat bou toding kiti ham? Hiche hin eihil nom uchu ahile Mihem hi koima achamkim aki umpoi. Abulhing koima aki umpon, khat le khat kithuto a epankhom tieng lebou kichamkim'a kibulhing bep jiy ahi'e.
E atile Thilto dang ho bang lou'a epi jih'a Dangka chu amitakip in kibang chet a ahin toding uva thu kipe aham? Ajihchu Thilto hung kitoh holah ahi Dangka hi Mishkan sahna ding'a abul (Foundation) patna/sahna a kimang ahie. Mihem chu koima Thepna, Mihina, Melput, chule Lhagao lang a kibang akiumpoi. Hinla P-thien toh eki guijopna bul uh, e Neshama(Soul) uva hin, ebon uvin eki bang suh kei uvin ahi. Chule Mishkan chu Israel te lah'a P-thien ahung chen thei nading'a kisa ahi. P-thien le Mihem kikah a kigui jopmatna abul (Foundation) akibah suhkei vetsahna'a ahou le avaai khen chuom umlou a abon uva Dangkha Shekel Kehkhat ahin toding uva thu kipe'u ahi'e.
Tuchung Parasha ahin lungsung tongkha tah le pohnat umtah "Khet Ha'Egel" (Bongnou lim anahou uh) chungchang jong ajao'e. Midrash a kijih daan in Sinai muol a Israel ten Torah akisaan jou uva lhagao lang'a asaan dan uchu Adam HaRishon achonset masang'a darga(rank) chan ana lhung uvin ahi.
Khet Ha'Egel chu ana umlou hitale Israel techun suongpheng masapa akisan uva gentheina, hahsatna le Thina kisan bei ding ah ahitai. Hichu anoi a pasuk akuon ahi muthei ahi-
"והלחת מעשה אלוהים המה והמכתב מכתב אלוהים הוא חרות על הלחת" (Shemot 32:16)
("Suongpheng chu P-thien khutsoh ahin, Thu kisun jong chu P-thien sut (חרות) ahi suongpheng chung'ah")
Rashi, Talmud chule Rav thupitah adang tamtah hon ahilchet na'uva "Sut (חרות)" kiti thucheng chu "Kharut" hilou in "Kheirut (Freedom)" joh in sim in atiuve. Khuti ahitahle pasuk akisun chamlhatna (Freedom) hi epi akon chamlhatna ham? Midrash Rabbah akijih dan in Thina Vantil akon a chamlhatna ahi'e. Suongpheng masa chu P-thien khutsoh ahi'n hichu ana selou hitale Israel chate chun leiset achu Olam Haba ana kailut ding uh ahitai.
Atile epi ding'a Moshe'n Suongpheng masa chu ase siet ahi tadem? Chesang'a datmah umjo chu ahile Israel te'n Bongnou lim ahou uva achonset uchu Moshe'n Sinai muol akon ahung kumsuh masang'a ahet ahitan, e atile Suongpheng chu ahin kichoi tei tei ahidem? Tuchung e Parasha'u velechun P-thien in Moshe kom'a "Kumsuh in, Na mite achonse tai..." atiy. Ehet mabang uva Suongpheng teni achu Thusom peh chu kisun ahie. "Milim semthu nahou lou ding" ti kisun hilou ham Suongpheng achu? Bongnou lim houte ding achu epi phachom tading ham Suongpheng chu?
Khakhamim hon adonbutna hitin ape'uve: Suongpheng teni chu Ni ahivang in kichih diu'a sei di hile Khat ahilhon bou'e. Suongpheng chu Ni, Ajietlang le Aveilang, a kikhen'a ahivang'a kijopmat lhon ah ahie. Ajietlangpa achu P-thien le Mihem kikah a daan kisun'a, Aveilangpa achu ahile Mihem le Mihem kikah a daan kisun ahi. Ahinai Moshe'n Israel te'n bongnou lim ahou uvin achonse ta'uve ti Sinai mol apat ahung kumsuh ma'n ahetai. Chule Israel techu Suongpheng saang thei ding dinmun le saang ding a lawm jong ahita pouve ti jong ahei. Hinla Moshe chun Bongnou lim ahou jih uvin P-thien le Mihem kikah achun ding jou tahih ujongle, Suongpheng veilang a kisun Mihem le Mihem kikah beh achun lhu pou vinte ti akinep jih achu Suongpheng chu ahin kichoi tei tei ahie.
Hinla Moshe kinepna banglou tah in Israel techu golnop anabol uvin, Ju le Sa in ana kham taovin, Akina loi, agucha loi, Akithat tu loi chule Numei kisan jong hunam a suse loi ana um taovin ahi. P-thien toh Mihem kikah bou hilou in Mihem le Mihem kikah ajong ding jou talou in ana chonse gam tauvin ahi. Hichun Moshe'n jong Suongpheng teni chu asepse tai.
Khakhamim hon asei uve: Hiche akon ekihil nathei chu epi ham eti le Koi hile Amihem chanpi toh kitohlou chu P-thien toh akikah ajong chamna umpontin, chule P-thien toh akikah chamna umlou chu amihem chanpi toh ama kikah ajong chamna um deh ponte. Suongpheng teni akijopmat a suhkhen thei ahilou bang'a chu Mihem le Mihem kikah apoimo daan chu P-thien toh Mihem kikah poimo daan toh thakhat ahi'e.
Moshe'n Suongpheng teni chu sepse lou hile P-thien in Israel chate chu abon uva asuh bei maithei ahi. P-thien in Israel techu suhbei a Moshe akon nam lentah, namthah semdoh ding ana tin hinla Midrash in asei na'ah: Moshe'n suongpheng chu aseset jou in P-thien kom ah " Tu'n keijong ama hobang in kachonse tai, Israel te nasuh mang dile kei jong neisumang tan" atiy.
Chujong le Israel techun Songpheng chu ana kisaan man uh hitale achonset nau chu gihjo cheh ding, chule achonset jih uva agotna mu ding ujong hahsa jo cheh ding ahi ti Moshe'n ahet jih a Suongpheng teni chu ase siet ahie tin jong Midrash in asei'e.
Shabbath Shalom lekulam
Meod Tov!!!Had it not for the sin of the golden calf People who commit the worsest sin in this world would give up hope and God would be angry at them and khas ve khalila It will be a great khilul Hashem!!!Khazak ve emotz!!!!dear editor!!!!
ReplyDelete