Shemot lekhabu a Moshe hung pen akipat Parasha jouse ahin Moshe min khatvei tei akiminphah e. Hinla kidang tah in tuchung Parasha ahin Moshe min khatvei jong aki phapoh poi. Moshe min kijah nading dol munseh a "Nangma(אתה)" ti thucheng joh akimang e. E atile Moshe min khatvei jong tuchung Parasha ahi chuong lou ah ahidem?
Khakhamim hon ahilchetna uva ajih ni tah apeuve:
Akhat na'ah: Rabbeinu Moshe hi 7th Adar a peng'a, hiche nikho mama ajong hi aleiset hinkho ana bei ahi. Chule Parashat Tetzaveh hi kumsih le 7th Adar toh don Shabbath a kisim jingkei ahi. Hijeh achu hiche Parasha ahi amin (Moshe min) panglou ahi.
Anina ahile hiti ahi: Israel te'n bongnou lim ana hou uva, ana chonset uchun P-thien in "Israel te kasuh manga nang akon namlentah khat kasem doh ding ahi" tin Rabbeinu Moshe kom ah ana sei in ahi. Hinla Rabeinu Moshe atao in, P-thien kom ah Israel chate angaidam tei nading in ana thum in ahi. Rabbeinu Moshe amatah jieng jong ki'iit lou hiel in ana kipedoh in, Israel chate ngaidam achan tei nading uvin P-thien kom ah hitin ana tao'e, "Israel chate ngaidam achan louding le na lekhabu thieng akon in kamin noi mang tan". Hichun P-thien in jong Israel chate chu ana ngaidam tai.
Rabbeinu Moshe taohat jaal le kipum pehdoh najaal a Israel chate chu P-thien in ana ngaidam tajing jongle, Khakhamim hon asei uve ,Tzadik Gamur khat akon hung potdoh kamcheng chu apha ding hihen ase ding hita jongle lhung tei tei jiy ah ahi. Chejih achu tuchung Parasha ahi Rabbeinu Moshe min khatvei jong kiphapoh talou ahie.
Hinla hiche chungchon a kidang tah le datmah umtah chu ahile epi ding'a hiche teni jih bou a Rabbeinu Moshe min Parashat Tetzaveh a kiminphah lou aham? Rabbeinu Moshe pen nikho le thi nikho toh kinai Shabbath a hiche Parasha kisim jiy jih ahitahle Moshe min chu ama jaa na'a kiminphah jole kilawm jo hilou? Israel te ngaidam chan nading'a ataona "kamin noimang tan" ati jih ahi'e eti kit jongle adih theilou kit danchu Moshe taona jaal le akipumpeh dohna jaal a P-thien in Israel techu angaidam ahi kit jel'e. Epi jih a thilpha bol khat chu gotna kipe'a chule Parasha khat alhung kei a amin kimoh suhmang jieng diham? Egel le hilchetna kipe teni chu dih le akilawm lou jojen in ahi.
Khuti ahitahle tuchung Parasha ahi Rabbeinu Moshe chu gotna kipe'a khatvei jong kimin phahlou ahi tadem? Khakhamim hon hitin eihil uve: Rabbeinu Moshe chu gotna kipe ahipoi, Amin kiphahlou chu aphalou hitah sang'a phattheina joh ahi. Zohar Hakadosh ah hitin akisun'e "Rabbeinu Moshe loupi daan, thupi daan le choisanga aumdaan chu mundang sang in Parashat Tetzaveh ah muthei ahie."
Khakhamim hon asei uve: Rabbeinu Moshe ding'a adamsung'a phaat loupipen (greatest moment) chu Torah agalah chu ahipoi, Tuipi san kehni asosah jong chu ahipoi, chule Israel te Egypt akon ahung pot uva ahin lamkai jong chu ahipoi. Hinla P-thien mai'a kitah tah'a adin a, Israel chate ngaidam achanna ding uva atao'a, chule ama masang ding jong gellou a akipum pehdoh a "Na lekhabu thieng akon kamin noimang jieng in" atipettah chu aleiset hinkho a phaat loupipen chu ahi.
P-thien in Israel te chu angaidam bep hilou in tuchung Parasha ahin Moshe jong a choisang in, Parasha dang ho'a "P-thien in Moshe ahoupin"....."P-thien in Moshe kom ah asei in.."...ti hitalou in "Nangma'n" ti thucheng joh amang in ahi. Khakhamim hon asei uve: Min kiti chu alhangpi'a khat le khat ki koutu na, kihou matna bou a kimang ahi. Mihem in apenpe jong ahipon chule tahsalang toh kisai a vetding'a leiset thil toh kimatpen/kinaipen jong ahi. Min kiti chun mihing asunggil'a ahina dihtah pachu aphong dohpoi. Vetsahnan: Mi tampi tah amin kibang aum'e hinla amin kibah vang uvin a ahinau akibang dihpoi.
Min kiti chun lhagao lang sangin leiset thil lang avetsah in ahi. Hinla tuchung Parasha a P-thien in "Moshe" tia amin phapoh lou a "Nangma" ati chun thil thupitah le loupitah lhagao lang a avetsah ahi. Hiche "Nangma" kiti chun Rabbeinu Moshe lhagao lang'a ahinapa, chule det chet a Israel chate dinga akipumpeh dohna pa chu avetsah ahi. Moshe min chu e Parasha uva ajao tapoi. Hinla amatah, lhagao langa ahina pachu e Parasha uva apang'e ti hetthei in aum jing in, chule "Moshe" min kiminphah a kiphong doh joulou aloupina tamtah jong aki phongdoh be'n ahi.
Khag Purim Sameakh uShabbath Shalom Lekulam
Subscribe to:
Post Comments (Atom)