" ...וַיְדַבֵּר יְהוָה אֶל-מֹשֶׁה לֵּאמֹר:דַּבֵּר אֶל-בְּנֵי יִשְׂרָאֵל, וְיִקְחוּ-לִי תְּרוּמָה "
("P-thien in Moshe ahoupi'n hitin asei'e: Israel chate houpi'n lang kei ading thilto hinla uhen...")
Tu Shabbath Parasha ahin Mishkan kisah nading a Israel chaten thilto ahin choi khawm thu ule Mishkan kisah ding dan thu akisei in ahi.
E Parasha uh kipat na pasuk chu sim leuhen thucheng(word) hetthiem hah le lungdon um tah khat muthei ahi- E atile P-thien in "kei ading thilto hinpe uhen(Hebrew a "ויתנו לי")" tile dihjo le kilawm a "hinla uhen(Hebrew a "ויקחו לי")" joh ati ham? Thilto kiti chu kipeh tho joh a hilou ham, kon alah ngei a ham? Hiche pasuk a kisei bang chet achu lahding hitale "Thilto" kitoh ding hochu Israel te'n apeh ding uh hilou a ahung kilah ding joh uh ahie. Hinla ehet mabang uvin Israel techun Thilto hochu ahin to'u ahijoi. Ahitah le hiche pasuk hi a kijih khel ngap ahidem?
Khakhamim hon asei uve: Tuchung Parasha ahin Tzedaka chung chaang a kihilna Mussar phatah akimudoh thei'e. "Kei ading thilto hinla uhen" tihin tzedaka pehtoh kimatna lentah le kichihtah anei in ahi. Hiche pasuk in eihil nom uchu ahile koi hile Tzedaka ahiding bang tah a pe achu ama'n apeh doh joh hilou a akilah lut joh ahi. Mihem ahinkho akichai teng hiche leiset akon epi aki nung poh em? Olam Haba aluot nading a epi'n akilhon pi em? Adam laiya Tzedaka ana peh ho le Mitzvot ana boldoh ho ahie. Hiche akon hetthei chu Tzedaka napeh chu,nangma lunggel a midang napeh a nakigel vanga, napeh doh hilou in khonung a Olam Haba a nakilah dinga naki khol joh ahibou'e. Khuti ahile e Parasha uva " thilto hinla uhen" kiti chu khonung a Olam Haba a nachan di hung kipeh in tina ahi. P-thien in hitin asei'e " Tzedaka pe'n khonung le Olam Haba a nang mama'n na kilah kit ding, nang chan mama ding ahi". Tzedaka kiti chu apeh toh alah thakhat tobang ahi.
"...Thilto ding chu hicheng hi hiding ahi: Sana, Dangka, chule Sum-eng............le Song mantam toh hitha ding ahi"
Khakhamim ho seidan in Mishkan sahna dinga kisei Thilto kitoh hochu evetle amanluot daan dung jui in aki minphah'e. Amanluo jo chu kiminphah masa'a abana asang'a manluo loujo jep hita chu a seder chu che ahi(vetsahnaa-Sana, Dangka, Sum-eng...chule adang dang). Hinla kidang tah chu khuti ahile eti daan a Song mantam(Diamond) chu akichai na'a pang aham? Song mantam chu sana sang a manluo jo ahingal in e-atile amasapen a kiminphah lou ham?
Khakhamim hon hitin ahilchetna ape'uve. Moshe'n Israel te kawm a hiche Mishkan sahna dinga thilto ahin choi ding uva thu apeh chun Israel te chu, aneo alien le numei pasal ti umlou in, amitakip in thilto ajo kham dung jui cheh un ahin choi un ahi. Hinla Israel sung a phung lamkai (Nesi'im) hochun, amaho amasapen a pan tahsang in, keiho anukhah lang in pang uving katin avaat vaat toh nau ving kate atiu vin ahi. Achai nalang achu epi titam? Thilto hung kitoh hochu atam vaal in Moshe'n Israel te jah achun ahin choibe tahlou ding uvin thu ape'n ahi. Phung lamkai hochu ato ding'u umtalou in Songmantam hobou chu atoh uvin ahi.
Phung lamkai ho mipi ding a vetton thei hitah sanga anukhah lang a thilto ahin choi bep uchu Moshe'n athaset jih ule hiche kin thudol a thanopna le kipumpehna avaat jih u ahi tin alungnopmoi. Akom uva Moshe'n hitin aseie "nang ho amasapen apanglou a mipi ho thanop nading le vetton thei a naum lou uh, kihet uvin Thilto kitoh ding ho kajih tieng le nathil hinto uhi anukhah pen a kapansah ding ahi". Hitia chu Song mantam chu tuchung Parasha a thil kitoh ding ho lah a chu amanluo pen hita jong le ahin toh hon ahiding bangtah a apeh lou jih uva anukhah pen a pang ah ahi.
P-thien in thil hung kitoh hochu manluo am, manluo lou am tin avepoi, P-thien in adei le avet chu athil tohpa'n etobang a thanopna, kipana le kipeh dohna puma alunggil apat ahin toham joh chu ahi. Hiche akon ejil doh thei uchu Mitzva jouse apoimo daan akibang suh kei e. Mitzva jouse chu aneo, alien, apoimo, apoimo loujep, ahahsa, anom dom tia gellou a aboncha thanom tah, kipahtah le kipeh dohna nei'a elunggil apat ejo theichan a suh bulhit ding tina ahi.
P-thien in thil hung kitoh hochu manluo am, manluo lou am tin avepoi, P-thien in adei le avet chu athil tohpa'n etobang a thanopna, kipana le kipeh dohna puma alunggil apat ahin toham joh chu ahi. Hiche akon ejil doh thei uchu Mitzva jouse apoimo daan akibang suh kei e. Mitzva jouse chu aneo, alien, apoimo, apoimo loujep, ahahsa, anom dom tia gellou a aboncha thanom tah, kipahtah le kipeh dohna nei'a elunggil apat ejo theichan a suh bulhit ding tina ahi.
Khodesh Tov uShabbath Shalom lekulam
(Parasha hilchetna na hohi lekhabu chuom chuom akon a hung kiledoh ahie. Chule thu hung kisuo hohi blog a ahung kitah doh nung ajong kithah vet a adihlou ham akivaat ham aumle hin kisutoh kit jiy ahi.Ana sim jouse chunga Toda rabbah)
(Parasha hilchetna na hohi lekhabu chuom chuom akon a hung kiledoh ahie. Chule thu hung kisuo hohi blog a ahung kitah doh nung ajong kithah vet a adihlou ham akivaat ham aumle hin kisutoh kit jiy ahi.Ana sim jouse chunga Toda rabbah)
