"..Hebrew mi soh a vul ding a nachoh a ahile aman nangma naa kum gup atoh ding, kum sagi alhin tieng bat neilouva chamlhat tah a sohpa chu potdoh ding ahi...". Midrash in hitin asei e: Tuchung Parasha a kisei "Hebrew soh" hi Jews mi khat aguchat jih a kiman doh a athil guh anung sah nading a Beit Din in soh a ajuh doh kiseina ahi. Hinla Beit Din chun hiche Juda pa chu Goy khat kom a ajuh doh ding phal ahipoi. A Jews chan khompi mama kom ham ahiloule Gair Tzedek kom bou a ajuh phal ahi. Chujongle mi jalah a lhangphuong a ajuh a mipa chu asuh jachat ding jong phal ahipoi.
HaRav Yonah Metzger (tu le tua Israel Ashkenazi Chief Rabbi) in hitin asei e:
Etih a hiche thupeh "Kum sagi alhin tieng bat neilouva chamlhat tah a sohpa chu potdoh ding ahi" hi Israel te kipe a ham? Israel te'n Egypt ahin dalhah ni ding uva chu hiche thupeh hi kipe'u ahie. Hiche chu hoi apat kihe thei am? Haftarat Mishpatim a kon in aki hethei e. "Pakai Israel P-thien in hinti'n aseiye: Napu Napateu asoh channau Egypt gama kuona kahin puidoh nichun kitepna khat kana neipiin" (Yeremiah 34:13). Epi ham "Kitepna khat" kiti chu? Haftarah aban esim be le hitin akisun e,"Nasopi Yehuda mi khat soh a vul dinga nachoh chu kum sagi alhin phaat le na chamlhatsah ding ahi...." (Yeremiah 34:14). Hichun avetsah chu Israel te Egypt apat ahung potdoh ding niu a chu P-thien in hiche thupeh hi ana peh ahitai.
E hetsa mabang uvin Israel te chu Egypt ahin dalhah ding uva chu luong muongsel a hung pot doh ahipouve. Kigot tup nading phat jong anei pouvin. Lampi a aneh ding u changlhah kisang jong kisiem manlou khop a Egypt techun ano a ahin nodoh tho jieng u ahi. Ahung potdoh ding nikho uva aboi ding dan uchu egel jong le e lunggel in jong abaan phapoi tithei khopset ahi. Khuti ahitah le epi ding a chu P-thien in hiche nikho sese a chu hiche thupeh chu apeh ahidem? Sinai muol a chu Mitzvot dang jouse toh apeh khom thei lou ham?
Achunga thu kidong ho hetthiem thei nading in Rav pa'n thusiem khat apei.
Nikhat Napoleon lengpa leng ana himasang chun agaal mite akuon ahung jaam nan Juda inn khat a ahung jaamlut khan ahi. Inn neipa kom achun,"kagaal miten eihin del e, nei sel in lang nei huhdoh in lungset tah in" tia atao tho jieng le Inn neipan jong koi ahi jong helou in ana kithopi tai. Innsung aum lupna chung a chun Napoleon akijam in achung ah a Inn neipa'n blanket saa tahtah tampitah akhu khum in ahi.
Hiche jou chomkhat jouchun gaal mite hochu inn sung a chun ahung lut uvin Napoleon hol in innsung jouse akhuol chil uvin aginmo namun houchu a bayonet uvin adawt uvin ahi. Lupna chung adawt na'uva chun themkhat hasunglut jep le Napoleon oi asut khah ding dan ahi. Ami holpa'u amu lou phat uvin chomkhat jou in apot tauve.
Phat ahung che'n ahile Napoleon chu France leng ahung hitai. Aman jong masang a ana huhdoh Juda pa chu akou in akom ah "Kei kahie na inn a hung kisel a nana huhdoh pa chu. Epi nadei am,nadei dei sei in, kabol peh ding nahi" atiy. Juda pa chun thukhat kadong nuom e atin, Napoleon in epi ham atile,"Lupna chung a nakisel pet a nagaal miten bayonet a nahin sut khah dihchet pettah a chu epi nati am?epi lunggel nanei am?" tin Juda pachun adong tai. Napoleon chu alung navaal in a eojah jieng in,"Nadei dei thum le chun kapeh thei nahi'n nang in hitobang a ngol umtah thu neidoh" tin asei in Juda pa chu a sepai hon aman uvin songkul sung ah akhum tauve.
Nithum jou in Juda pa chu songkul akon chun ahin puidoh uvin khopi sung a mi jalah tah a Napoleon lengpa jaona'n khailih ding ago tauvin ahi. Juda pa chu akikhailih nading mun achun adin sah un, amai puon in atuum un, akikhailih nading khao jong chu a lol ah akhit un ahi. Akhailih ding kuon chet un Napoleon lengpa'n akhot ahin jah in Juda pa chu anai in kaangchan abil ah,"Tu pettah a na umchan, na lunggel tobang chet chu ahe kenjong katuo le kagel ka gaal miten lupna a kakisel a bayonet a ahinsut uva chu" atipeh e.
Hichun Juda pa chu lhadoh ding in thu apen, ahung kikhom mi hochun epi kibol na helou in alung dong lheh uvin ahi. Hinla Juda pa chun Napoleon thilbol ajih chu a hethiem taan akom ah, " Epi ding a hiche ka thudoh kahet thiem nading bep a hitia hi neibol ham?" tia adoh le Napoleon in,"Kakichat dan le katijaat dan sei leng, epi ti nakichat ham? epi ti natijaat ham? tia neidoh beding....hiche pettah a kaumchan le kalunggel ho etobang in seijong leng nahet thiem theilou helding, hijih chun nang in jong natahsa tah in tuoh lechun mikhat thiding dinmun a aum pettah a alunggel etobang ahi hethiem pen in nate katia kabol ahe" atipeh e.
E parasha a lut kit leu hen. Gel leuchun masang a mihaosa soh ana vul hochun eti nop asah u hitam. Soh khat kiti chu apupa'n bol in ati jouse nom le daa le abol ngaiding, anatohman jong emacha amu kit louding chule apupa'n anop nop alothei nahlaiset ahie. Apupa'n agena ding le aneh ding an le tui apeh le kichai jieng ahi.
Vetsahna'n suh navul te, akum khat sung vang chu anatoh ding le abol ding jouse phatah a nahil ngai ding, nang jong nabuoi phah nahlai ding ahi. Akum nina lechun nasoh chun atoh ding le abol ding ho atam jo ahet ding ahitai. A kum thum natieng levang thiemvaal tading atoh ding ho nahil jong ngaise talou ding, Kum li lhin lang lechun na Inn a jong ama chang a nadalhah a ema jouse vetup ding a na nganse le natahsan thei ahitai. Hichun phat ahung chaal in kum GUP ahung kichai ta'n, chu in miho ahung uvin nasohpa/nasohnu chu nalhadoh angai tai hung ti taleu nanom nadem? Nasoh aloman jong napeh lou ahivanga nadei dei nabol sah chu.
Hiche jih a chu P-thien in jong Israel techu ama ho tah soh ahi nauva kon ahung chamlhat ding kon pettah uva hiche thupeh hi Moshe kom a aseipeh ding uva ana peh ahi e. Achung a thusim Napoleon le Juda pa esei tobang uva chu ahahsat dan le anatdan, achawl umdan le agim umdan abon a ama honjong ahet pettah uva chu hiche thupeh hi kipe lou uhile Israel techu nuomlou maithei u ahi. P-thien in ,"Egypt a kum sottah nasoh channau va kon kahin puidoh a chamlhatna namu uva anop dan chu geldoh uvin lang khonung a nahung haosat tieng u jongle nasohpa/nasohnu chu aphattah a chamlhatsah ding manghil hih uvin. Egypt te ho tobang hiding nagot louding u ahi" atiy.
Shabbath Shalom lekulam.
(Tuchung Parasha hilchetna hi alhangpi a Midrash le HaRav Yonah Metzger in drash apehna akon a hung kile doh ahie.)
