וַיִּקַּ֣ח קֹ֔רַח בֶּן־יִצְהָ֥ר בֶּן־קְהָ֖ת בֶּן־לֵוִ֑י(Vayikakh Korach ben Yitzhar ben Kehath ben Levi...)
Mefarshim tamtah in adoh u chu ahileh, tuchung i Parasha u kipatna pasuk a kisun, "Vayikakh Korach.." ( Chuin Korach in ala'n...) kiti hi ipi kiseina hi'a, ipi ham Korach in alah ah chu?
Hilchetna tamtah aum in, hiche ho lah'a khat chu ahileh Pasuk a kisun " Vayikakh Korach ben Yitzhar ben Kehath ben Levi.." akuon mudoh thei chu Korach in "Levi chapa Kehath chapa Yitzhar chapa Korach" ahina lai tah chu "akilah a", Moshe Rabbeinu dehna a aman ahi e.
Am Israel sung'a phung lamkai ding ahung kilhen uva, chujou'a Levi ho sung'a lamkai ding ahung kilhen chun Kehath innsung lamkai ding in Elizaphan ben Uziel chu lhendoh in ana hitai. Levi chapa Kehath chun chapa 4 - Amram, Yitzhar, Hevron le Uziel - ananei ah ahi'n. Elizaphan chu hiche sopi pasal 4 holah'a achapang pen, Uziel chapa chu hi ah ahi e.
Korach in asei chu ipi ham iti leh," Amram chate ni - Aharon le Moshe la khat Leng in apang ta'n, khat Kohen Gadol ahikit a ahileh, Amram banchet a asopi pasal Yitzhar chapa keima Korach hi Kehath innsung lamkai ding dol kahi" ti ahi e.
Hiti a chu Korach hin a-innsung gui pa chu "alah" a Moshe Rabbeinu dehna a kiphinna ahin pat a ahitai.
Hilchetna dang kit khat, Midrash a kimu dungjui a chu Korach in ipi alah em iti leh, thildang hilou'a Tallit le Mezuzah alah ah ahi.
Korach in Tallit apumchang kei a dum (blue) ahinchoi in, Moshe Rabbeinu jah a,"Hiche Tallit hi Tzitzit khai ngai in tem? " ti'a adoh leh Moshe Rabbeinu in,"Khai ngai ding ahi" ti'n anadon but e.
Chuin Korach in hitin adohbe kit e," innsung khat a Sefer Torah dimset in kikoi taleh hiche inn chu Mezuzah tah ngai in tem?". Moshe Rabbeinu'n amasa a adonbutna bang ma'n "Mezuzah khai ngai thou thou ding ahi" ti'n anale donbut kit e.
Chutah chun Korach ahung kipan in, Moshe Rabbeinu douna'n alei ahin leh pan ta'n, ajah a hitin asei e:
Tzitzit a Tekhelet ( tzitzit khao adum pa ) khat bouseh ikhai jong leh akhao dang ho dum hih jong leh Mitzvah kisubulhit ahi nati'n. Hinlah Tallit abon a dum chu Tzitzit khai angai tei tei e nati kit.
Mezuzah sung'a Parasha 2 bou kisun a, hichu kot a itah leh Mitzvah kisubulhit ei e nati. Ahivang'a innsung khat a Sefer Torah dimset a kikoi jieng jong leh Mezuzah tah ngai tei tei ahi e nati kit.
HIche daan hohi P-thien akuon ahipo'n, nang in nahin kisemthu ahibou e.
Hiti'a chu Makhloket pa chu hung machal be jing a, ihetsau ma bang'a, achaina lei in avallhum gam uva ahi e.
Ahileh hilai a hetthiem hahsa tah khat chu ipi atileh thildang dang hilou a Korach chun Moshe Rabbeinu chu hiche Tzitzit le Mezuzah teni Mitzvah ahi ahin nielkal ahidem? Torah sung'a chu Mitzvah tamtah, ikiniel nuom beh a ahileh kinielna thei um a ahi e. Vetsahna a Parah Aduma ho bang chu achien-achai a tuni nikho gei a kihelou a ahita'n, hiche daan pa bang chu alah a Moshe Rabbeinu nielna a aneithei ahi e.
Chukit leh phung lamkai ho kilhenna hi Bamidbar lekhabu kipatna lang a chu kisun ah ahita'n. Ipi atileh Korach chun thil kibol, laa kisa hochu adeilou a ahileh apet a boina siemlou beh a um a, tu vaikhonung sang'a lamkai achan lou jeh a boina ahin sem hitan tem?
Achung'a ithudoh teni uhi achomlam tah a donbut ding hitaleh ima jouse "Kavod" - loupina le letna dei jeh ahibou e.
Korach hin abul tiel'a chu hiti'a hi lung anagel a ama le ama anakilhamuon ah ahi e:
Tu'n lamkai kihi tadi hih jong leh akhohpoi. Phat chomkhat jou tieng Canaan gam kilut ding ah ahita'n. Chutieng lamkai thah hung kilheng kit in ti'n, eijong panmun khat beh kichang tei nante.
Hinlah Korach vangsetna lut lut iti diu ham, langkhat lang ah Gam velhi ding'a cheho'n jong Kavod pa adei vaal jeh uchun ," Canaan gam kilhung leh lamkai thah hung kilheng ding, eiho jouse ipanmun uva kuon ihai sohkei diu ahi e..." ti'n agam lut lou na tei ding sawm in thuse ahin lhah kit tauvin. Hichun P-thien lunghanna ahung deo jah jieng in, Canaan gam lut ding kuon cha ho chu gamthip gam'a kum 40 joh ana vaitham den tauve.
Chutobang dinmun a ahung din phat uchun Korach in jong kum 40 ngah ngap talou in letna-lalna pa chu Moshe Rabbeinu le Aharon akuon chuodoh ding ahin got a ahitai.
Chukit leh thildang dang hilou'a Korach in Tzitzit le Mezuzah a Moshe Rabbeinu ahin nielkalna chu hiti ahi. Chunglang'a isei u Korach le Moshe Rabbeinu kinielna a Korach thudoh hochu ipi dang vetsahna a adoh ahipo'n, chulai a Tzitzit le Mezuzah teni toh kisamkai thudoh ho'a kuon a chu Korach in Moshe Rabbeinu chu ama le ama kidomsang mai mai a angoh nuom jeh hibou ah ahi e.
Korach in asei chu Tallit apum pi'a dum a chu, apum a Tekhelet hi ah ahita'n, athiengsa hi ah ahitai. Chuti ahileh Tzitzit khi angai khoh poi. Sefer Torah kikoina inn jong chu apumpi a thieng ah ahita'n, chuti ahileh Torah a kuon Parasha 2 mai mai kistuna Mezuzah tah angaise kitpoi.
Am Israel jong anam pumpi a thieng ahi'n, chuti ahileh mikhat achang'a lamkai luboh a agakichuom tunsang ding angaipo'n ahi. "Nang ho, Am Israel teho hi nanam pumpi uva keima ding'a nam thieng, namtin vaipi jalah a Kohen ding'a kalhendoh nahitai" ti'a P-thien in aseisa ahita'n. Hiche nung'a nang in nasopipa Aharon Kohen Gadol a napansah a, nangma Leng a nakitun a ahileh hiche ho jouse hi nangma macham a nabol ahi'n, P-thien akuon ahipoi e ti'a Korach chun Moshe Rabbeinu angoh a ahi.
Pirkei Avoth, Perek 4, Mishna 21 na a Khazal ho'n asei u, "Hakin'ah ve'hata-avah ve'hakavod motzi'im eth ha'adam min ha'olam" ( Thangthipna, avum-avaal a thil deichatna le Lal ding nopna ho'n hiche leiset a kuon mihem apuimang e..) tobang chet in Korach le anung jui ho jouse hiche lal ding nopna "Kavod" pa chun hiche leiset akuon ana puimang gam tauve. Chu bep hilou'a Khazal ho khen khat in ahung lhung ding "Olam Haba" jieng a jong Korah le aloiho'n chanvou anei pouve ti'n asei uvin ahi.
Akoi jouse P-thien in phatthei eiboh u hen lang, Korah le aloiho nung jui hilou'a Moshe Rabbeinu le Aharon ha'Kohen nungjui ihina ding uvin ichung cheh uva P-thien in phattheina hin lhut tahen.
SHABBAT SHALOM LEKULAM
