Kiryat Yam Suf ahin P-thien in amite Israel te a ding in gaal asaat in. Amalek chunga gaal kibol hi ahikit le Israel ten Pathien loupi nading a asaat u ahie. Midrash in asei dan in Yitro hin P-thien dihtah mu nading in milim P-thien jouse le P-thien lhem jouse ana hou in ahi. Hinla adihlou dan ahepai jieng jiy in chomkhat joule adalha jiy tai. Hiche thilsoh kidang teni ahin jahphat chun atahsan pei pon hijih achu kamit tah in jong gamu'ng kate tia hung ahe.
Khakhamim ho seidan in Yitro chun moh mai mai a Israel te ahung villhah ahipoi. Hinla Yitro chu Giur bol ding a hung joh a ahi atiuve. Hoi akuon a hiche hi hetthei ham? A donbutna chu a Parasha sung mama a muthei ahi. "...hichea chun Aharon le Israel mi upa ho tamtah jong P-then angsunga Moshe nupa pa Yitro toh changlhah nekhom ding in ahung uvin ahi" (Shoftim 18:12).
Midrash le Mefarshim tamtah ho seidan in hiche va golvah annkong hi Yitro Giur bol lopna ahi atiuve. Halakha dung juiya Goy khat changlhah chu nehphal ahipoi. Ahitahle hiche pet a Yitro'n P-then heng a pumgo thiltu ato a golvah abol chu Giur lou hile Halakha dung juiya nehphallou ding ahi. Yitro Giur bol ahi hiche vakon chun kichihtah in akihei.
Tuchung Parasha ahin Thusom peh chung chang jong akisei e. Thusom peh athu kisei ho hi evet le mikhat chung bou a kimang jiy pao (Singular) in akisei e.Vetsahna: "Nangman P-thien dang...", "Na Nu le Na Pa jaa bol in..." le adang dang....
Khakhamim hon asei uve: Eti dan a Israel te Sinai muol a kikhom hochula Pasal galbol thei maimai sim a 600,000 lang aphan, E atile thusom peh achu P-thien in "Nangho" ti thucheng manglou a "Nang" (Plural hilou a Singular) bou aman ham? Ajih chu Torah hi mijouse achancheh ding a kipe ahi. Khonung le Jew khat chun ken Mitzvot ho kajui angaipoi, ka Jews chanpi adang hon ajui ule aphaset e atithei lou na ding ahi e.
(Hiche Parasha hilchetna hi lekhabu chuom chuom akuon a hung kile doh ahie. Tamtah hin suothei ahin hinla asim ho boring lou nading a achom thei pen a hung kibol ahie)
יפה מאוד!
ReplyDelete