Devarim lekhabu sung ahin Parasha 11 aum'e. Khakhamim ho seidan in Moshe'n hiche ho sese hi aboncha drasha (sermon) khat'a asei chai suohkei ahi. Tulai'a thusei hobang'a khatvei asei'a, khawl phot'a nidang le aseiban ajom kit jiy ah ahipoi. Hinla Rabbeinu Moshe chu etobang mi ham eti leh Torah seidan in midang'oh chuleh milah'a thusei theilou ahi'e. Atile hitobang mi chun eti lekhabu khat aboncha drasha khat'a asei chai jieng thei ahidem? Egel leh thil hahsa tah khat ahi.
Khakhamim hon asei uve: Moshe chu abultill'in "lei'oh leh pao ganglou, milah'a thusei theilou" hita jongle P-thien in ami Israel te Egypt akuon puidoh ding in ana lheng in, chuleh hiche "lei'oh le pao ganglou, milah'a thusei theilou" pachu achai nalang'ah "Hiche thu hohi Jordan gallam gamthip......Moshe'n Israel chate jouse hieng'a asei ahi" tin Torah in tuchung E Parasha uvah asei'in ahi. Hiche bep hilou'a Devarim lekhabu hi aboncha drasha khat'a aseichai ahi'e.
Hiche'n eihil nuom uchu P-thien thaa hatdan chu ahi. Israel chate lah achun Moshe sang'a bolthei jo, thusei thiem tamtah ana um nai, hinla P-thien in amite lamkai dingchu mihem lunggel deidan toh kituoh ave sese poi. Mibol thei, thusei thiem ana hita le Moshe chu mihon P-thien jaal hilou'a ama mihem hina dol'a athil bolthei jih ho jaal'a thupi ahi ana tiding uh ahi. Hinla hiche ahin P-thien loupi nale P-thien thaa hatna mudoh thei in aum'e. Ama'n thilkhat chu hihen atile Israel sung'a amimo leh apaomo khat jongchu amanchah'a Israel telah'a Lamkai ding'a atundoh jieng thei ahi.
Atile thukhat kidong tadi leuhen. Devarim lekhabu hi Khumash lekhabu 4 ho Moshe'n Israel chate hieng'a avelsei namai mai ahileh eti dan'a hiche lekhabu hi Torah sung'a hung kihap be khel khel ahidem? Lekhabu 4 hochu lhingset ahi talou ham.
Khakhamim hon hitin eihil uve: Khumash lekhabu 4 hochu alhingset ahinai. Hijieng jongle amaho (lekhabu 4 ho) kivelseina Devarim, Torah sung'a hung kihap be hin Mussar poimotah eihil nuom uh ahi. Hichu epi ham eti leh thiemjil na'a repetition (avel avel'a kithiemchuh ) poimodan ahi. Thiemjil khat chun athil jil chu avel avel'a ajil/asim loule ema ajildoh louding, chujongle hitobang michun athil jilna ajong lolhinna kiti amu loudi ahi.
Khakhamim hon aseibe na'uva: Ajil bep chu poimo ahipon, avel avel'a repetition bol chu poimo dehset ahi'e. Thiemjil na'a repetition poimo dan chu Talmud, Sanhedrin ah hitin akijih'e: Thiemjil'a ahivang'a athiljil repetition bollou chu chaang tu'a ahivang'a aatlou tobang ahin, chuleh thiemjil'a ahetsa manghil kiti chu numei naovop'a, anao suo nikho mama'a anao ki-vui tobang ahi.
Chukitle Devarim lekhabu hi evetle Khumash lekhabu dang ho bang lou in asung'ah Moshe'n Israel chate apho'na (reproof) mun tamtah'a muthei ahi. Tuchung E Parasha uh kisan jong evetleh kiphona'ah akipan'e. Parasha kipatna veleu hen:
"Hichie thu hohi Jordan gallam gamthip, Suf kawm, langkhat'a Arava, Paran le Tophel Laban le Hazertoh chule Di-zahab kikah'a Moshe'n......."(Devarim 1:1)
Rashi seidan in hiche achung'a kisei khomin hohi atah tah'a um khatcha aumpoi. Hinla Israel chateho'n P-thien ana chou lunghang namun hou kiseina ahijoi. Israel chateho jachat nalou ding'a Moshe'n paolhem mang'a Israel te'n P-thien ana patepna namuon hou asei'a, Israel chate chu apho masang'a athil bolkhel hou ageldoh sah kit ahibou'e.
E parasha uh kipatna pasuk hi Ivrit'a veleu hen hitin akijih'e:
"אֵלֶּה הַדְּבָרִים אֲשֶׁר דִּבֶּר משֶׁה אֶל כָּל יִשְׂרָאֵל"
"Hiche thu hohi Moshe'n Israel te jouse heng'a asei..."(Devarim 1:1)
Torah sung mundang'ah Moshe'n Israel te ahoupi tieng "אל בני ישראל" (Israel chate hieng'a) akiti jingkei in hinla tuchung avang ahileh mundang toh kibang lou hiel in "אל כל ישראל" (Israel te jouse hieng'a) akitiy. Epi jih'a tuchung E Parasha uva hi apao jah chuom ahidem? Hiche hin epi avetsah ham?
Midrash in hiche chungchang ahin hilchetna naltah khat apei. Hitin akijih'e Midrash ah: Hiche "אל כל ישראל" (Israel te jouse hieng'a) hi "אל בני ישראל" (Israel chate hieng'a) toh akibah lou na epi hija, chuleh "אל כל ישראל" kiti thucheng'a "כל"(jouse) hin koi koi ahuoptha ahidem? "Israel chate hieng'a" kiti hin Thuseipa ahuoptha po'n hinla "Israel te jouse hieng'a" kiti hin "Israel te jouse" Thusei apang pa pum'a ahuoptha tina ahi. Hiche hin avetsah chu Moshe amatah jong kiseitha ahi'e. Hiche hin eihil nuom uchu epi ham etile koi hile midang khat phoh ding kisa achu amatah jong amasapen'a "akiphosal" ngai ahi. Midang apho masang'a ama leh ama kikhol chilna aneiding, athil bolkhel chuleh asei khel jouse asuhdih masat ding, hiche jou tieng chule bou midang phoh ding'a lawm le tah hipan bep ding ahi.
Shabbath Shalom U'Tzom Kal lekulam.Yishar Koakh.
